އޮކްޓޫބަރު 7ގައި އިޒްރާއިލުން ފަލަސްޠީނުގެ ޣައްޒާއަށް ދޭން ފެށި ހަމަލާތަކުގައި މިހާތަނަށް ޣައްޒާގެ 60 މިސްކިތެއް އިޒްރާއިލުން ހަލާކުކޮށްލައިފިއެވެ.

ފަލަސްޠީނުގެ ވަފާ ނޫހަށް ހަވާލާދީ އަލްޖަޒީރާގައި ބުނެފައިވަނީ އިޒްރާއިލުން ޣައްޒާގެ ޞަބްރާ ނެއިބަރހުޑްގައި ހުންނަ އަލް ސަލާމް މިސްކިތައް އަމާޒުކޮށް ހަމަލާދީ އެމިސްކިތް ހަލާކުކޮށްލައިފައި ވާކަމަށެވެ.

އަދި އެމިސްކިތް ހަލާކުކޮށްލުމާއި އެކު އޮކްޓޫބަރު 7 ކުން ފެށިގެން އިޒްރާއިލުން ހަލާކުކޮށްލި މިސްކިތް ތަކުގެ ޢަދަދު 60 އަށް އެރީ ކަމަށް އަލްޖަޒީރާގައި ބުނެފައިވެއެވެ.

Advertisement

އަޅުކަން ކުރާ މިސްކިތްތަކާއި ފައްޅި ފަދަ ތަންތަނަށް ހަމަލާދީ ހަލާކުކުރުމަކީ ބައިނަލް އަޤްވާމީ އިންސާނީ ހައްޤުތަކާއި ބެހޭ ޤަވާއިދުގެ ދަށުން މަނާކޮށްފައި އޮންނަ ކަމެކެވެ.

ރޭވެސް އިޒްރާއިލް ސިފައިން ވަނީ ޣައްޒާާގެ އެތަން މިތަނަށް ބޮމުގެ ހަމަލާތައް ދީފައެވެ.

އެގޮތުން ރޭވެސް ނުސައިރަތް ކޭމްޕަށާއި، ޖަބަލިއްޔާ އަދި ޚާން ޔޫނިސްއަށް ވަނީ ވަރުގަދަ ހަމަލާތަކެއް ދީފައި ކަމަށް އަލްޖަޒީރާގައި ބުނެފައިވެއެވެ.

ރޭ ޖަބަލިއްޔާއަށް ދިން ހަމަލާގައި ރޭވެސް 19 މީހަކު ވަނީ ޝަހީދުވެފައެވެ. އަދި ހަމަލާދިން ސަރަހައްދުތަކުގައި ވެއްޓުނު ޢިމާރާތްތަކުގެ ދަށުގައި އެތައް ބަޔަކު ތާށިވެފައި ވާކަމަށް އަލްޖަޒީރާގައި ބުނެފައިވެއެވެ.