ރައްޔިތުންގެ މަޖިލިހުގައި މިއަދު ކުރިޔަށް ގެންދަން ހަމަޖެހިފައި އޮތް، ދެ މަސައްކަތުގެ ތެރެއިން، މަޖިލިސް ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދަވަން ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުالله ފުރުސަތު ނުދެއްވުމުން މައްސަލަ ކުރިއަށް ނުގެންދެވި މަޖިލިސް މެދުކަނޑާލަން ޖެހިއްޖެއެވެ. 

މިއަދު އެންމެ ފުރަތަމަ ބާއްވާގޮތަށް ހަމަޖެހިގެން ދިޔައީ އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުމުގެ ޖަލްސާއެވެ. އެއަށްފަހުގައި އޮތީ ނަޝީދުގެ ރިޔާސަތުން ވަކިކުރާ ޖަލްސާ އެވެ. އެހެންނަމަވެސް ކޯރަމް ހަމަނުވެގެން ބަޖެޓް ޖަލްސާ ކުރިއަށް ނުގެންދެވުމުން އީވާ ވަނީ އެ ޖަލްސާ މެދުކަނޑާލުމަށްފަހު އަލުން ޖަލްސާ ބާއްވާނެކަން އިއުލާން ކުރައްވާފައެވެ.

ޑިމޮކްރެޓްސްގެ ބައެއް މެންބަރުން މަޖިލީހުން ބޭރު ކުޑަ ދަށުގައި މަޝްވަރާ ކުރިއަށް ގެންދަވަނީ-- ފޮޓޯ/ވޮއިސް 

އެ ޖަލްސާ މެދުކަނޑާލުމުގެ ކުރިން އީވާ ވިދާޅުވެފައިވަނީ ބަޖެޓަށްވުރެ މުހިންމު އެހެން ޖަލްސާއެއް ނޯންނާނެ ކަމުގައެވެ.

އެގޮތުން އިވާ ވިދާޅުވީ، އަންނަ އަހަރަށް ލަފާ ކުރާ ދައުލަތުގެ ބަޖެޓާއި އަދި ސަޕްލިމެންޓްރީ ބަޖެޓު ހުށަހެޅުމުގައި މަޖިލީހުން މަސައްކަތް ކޮށ،ް އެ މަސައްކަތަށް ކުރިއެރުން ނުލިބި ލަސްވާނަމަ އޭގެ ގޮންޖެހުންތައް އެންމެނަށް ކުރިމަތި ވާނެ ކަމަށެވެ. 

"މިއަދުގެ މި ޖަލްސާއަކީ އަންނަ އަހަރަށް ލަފާކުރާ ދައުލަތުގެ ބަޖެޓާ، އަދި ސަޕްލިމެންޓަރީ ބަޖެޓުވެސް ހުށަހަޅާފައިވާ ޖަލްސާ. ބަޖެޓުގެ ކަންކަން ކުރިއަށް ގެންދިޔުމަކީ ކިހައި މުހިންމު ކަމެއްކަން އެންމެނަށްވެސް އަދި މިހާރުގެ ސަރުކާރުގެ މާލީ ވަޒީރަށްވެސް އެނގިވަޑައިގަންނަވާނެ. ދަތިތައް ދިމާވާނީ ސަރުކާރަށް އެކަންޏެއް ނޫން. ބަޖެޓާ ގުޅިފައިވާނީ ތަރައްގީގެ ހުރިހާ މަޝްރޫއެއް. ބަޖެޓާ ގުޅިފައިވާނީ އަމިއްލަ ރައްޔިތުން، އަމިއްލަ ވިޔަފާރިތައް ކުރާ ހުރިހާ މަސައްކަތެއް ވެސް ގުޅިފައިވާނީ ދައުލަތުގެ ބަޖެޓާ." އޭނާ ވިދާޅުވިއެވެ.

މަޖިލީހުގެ މިއަދުގެ ޖަލްސާގެ ތެރެއިން--

އީވާ އިތުރަށް ވިދާޅުވީ ސްޕްރީމްކޯޓުން ނިންމި ހުކުމުގައިވެސް ރައްޔިތުންގެ މަޖިލީހުން ކޮންމެހެން ވެސް ކުރަންޖެހޭ މަސައްކަތްތައް ކުރަން އަންގާފައިވާ ކަން އޭނާ ފާހަގަކުރެއްވިއެވެ. އެގޮތުން، އެ ހުކުމުގައި ވަރަށް ސާފު ޞަރީހަ ބަހުން، ނަޝީދުގެ މައްސަލަ ނުނިމުނު ނަމަވެސް ދައުލަތުގެ ބަޖެޓްގެ މަސައްކަތް ކުރިއަށް ގެންދަންޖެހޭނެކަން އަންގާފައިވާ ކަމަށް އީވާ ވިދާޅުވި އެވެ. 

ކަންމިހެން ހުރި ނަމަވެސް، ބަންޑާރަ ނާއިބުގެ ލަފާއާއި އެކު ފިނޭންސް މިނިސްޓަރު އަމީރުވެސް މަޖިލީހަށް ހާޒިރު ނުވާއިރު، މަޖިލީހުގެ މެޖޯރިޓީ ޕާޓީ، އެމްޑީޕީ މެންބަރުން ވެސް ތިއްބެވީ މަޖިލީހުން ބޭރުގައި ކުޑަ ދަށުގައި ކަމަށް އީވާ ވިދާޅުވި އެވެ. އެހެންކަމުން ކޯރަމް ހަމަނުވެގެން ޖަލްސާ ނުފެށުނު އިރު ދެންވެސް ކުރިއަށް ގެންދަވަން މަސައްކަތް ކުރައްވާނީ ބަޖެޓްގެ މަސައްކަތް ކަން އީވާ ފާހަގަކުރެއްވިއެވެ. 

މަޖިލީހުގެ މިއަދުގެ ޖަލްސާގެ ތެރެއިން--

އެގޮތުން ޖަލްސާ މެދު ކަނޑާލުމަށްފަހު ދެންވެސް އީވާ މަސައްކަތް ކުރެއްވީ، ރައީސް ނަޝީދުގެ އިތުބާރު ނެތް ކަމުގެ މައްސަލައިގެ ޖަލްސާއަށް ފުރުސަތު ނުދެއްވައި ބަޖެޓްގެ ޖަލްސާ ކުރިއަށް ގެންދިޔުމަށެވެ. އެހެންނަމަވެސް އެޖަލްސާގައި އެމްޑީޕީގެ މެމްބަރުން އިހުތިޖާޖު ކުރަން ފެށުމުން ޖަލްސާގެ ނިޒާމްވަނީ ގެއްލި މަޖިލިސް މެދުކަނޑާލުމަށްފަހު އަދިވެސް މަޖިލިސް ނުފެށެއެވެ.