އީވާ އިންނެވީ "ބޭބެ ސަލާމަތްކުރަން ރިޔާސަތަށްވެރިވެ" ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ރޮޒައިނާ މިހެން ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަޅާފައިވާ ގަރާރުގެ މަސައްކަތް މިއަދު 11:00 އަށް އެޖެންޑާ ކޮށްފައިވީ ނަމަވެސް މަޖިލީހުގެ ނައިބު ރައީސް އީވާ ރިޔާސަތުގައި އިންނަވާ ޖަލްސާ ކުރިއަށް ނުގެންދެވިފަވާ މައްސަލައާ ގުޅިގެން އެކްސްގައި ހިއްސާކުރެއްވި މަޖިލީހުގެ ވީޑިއޯއަކާ އެކުއެވެ.

ރޮޒައިނާ ވިދާޅުވި ގޮތުގައި، މަޖިލީހުގެ އަމީން އާއްމު ވިދާޅުވުމުންވެސް އީވާ ރިޔާސަތުން ފައިބާވަޑައިނުގެންނަވާ ކަމަށެވެ. އަދި އީވާ އިންނެވީ އޭނާއާއި ދެބެންގެ ދެދަރި ބޭބެ، އަދި މަޖިލީހުގެ ރައީސް މުހައްމަދު ނަޝީދުގެ ގޮނޑީގައި "ބައްދައިގެން" ކަމަށްވެސް ރޮޒައިނާ ވިދާޅުވި އެވެ. 

ނަޝީދުގެ އިތުބާރު ނެތް މައްސަލަ މިއަދު 11:00 އަށް އެޖެންޑާ ކޮށްފައިވަނިކޮށް އެމްޑީއަށް ނިސްބަތްވެވަޑައިގަންނަވާ މެންބަރުން މަޖިލީހަށް ވަން ނަމަވެސް އޭރު ރިޔާސަތުގައި އީވާ އިންނެވުމުން މެންބަރުން ވަނީ އަޑުގަދަކޮށް އީވާ ރިޔާސަތު ދޫކުރައްވައި ވަޑައިގަތުމަށް ގޮވާލައިފަ އެވެ.

މަޖިލީހުގެ އެމްޑީޕީ މެންބަރުން އެފަދައިން ކަން ކުރެއްވީ، މަޖިލީހުގެ އާންމު ކޮމިޓީއަށާ އަމީން އާއްމަށް ބަންޑާރަ ނާއިބު ދެއްވި ލަފާއާއި ގުޅިގެންނެވެ. އެ ލަފާގައި ބުނާ ގޮތުން ނަޝީދުގެ ނުފޫޒު އޮންނަ މެންބަރުންނަށް އެމަނިކުފާނުގެ އިތުބާރު ނެތް މައްސަލަ ބަލަން ރިޔާސަތުގައި ނީނދެވޭނެ އެވެ.