އަދާކުރެއްވި މަޤާމުތަކުން އިސްތިއުފާ ދެއްވި ތިން ފަހަރުވެސް އިސްތިއުފާގެ ސިޓީގައި އެއް އިބާރާތެއް ތަކުރާރު ކުރައްވައިފައިވާނެ ކަމުގައި މިއަދު ރައްޔިތުންގެ މަޖިލީހުގެ ރައީސްކަމުގެ މަޤާމުން އިސްތިއުފާދެއްވި ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިދާރާގައި ކުރިއަށް ދިޔަ ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ، އެމަނިކުފާނުގެ ހުރިހާ އިސްތިއުފާއެއްގެ ސިޓީއެއްގައިވެސް އެއް އިބާރާތެއް ފެންނާނެ ކަމުގައިވިދާޅުވެފައެވެ.
ތިހުރިހާ އިސްތިއުފާއެއްގައިވެސް އަޅުގަނޑަށް ހީވަނީ އެއް އިބާރާތެއް ފެންނާނެހެން ސިޓީގައި
ރައީސް ނަޝީދު
މިއާ ވިދިގެން އެމަނިކުފާނު ވިދާޅުވީ، އަބަދުވެސް ބަލަންޖެހޭނީ އިންސްޓިޓިއުޓްއަށް ގެއްލުމެއް ވާނެތޯ ނުވަތަ ނޫންތޯ ކަމަށާއި އިންސްޓިޓިއުޓްގެ ބާރު ކެނޑޭ ހާލަތަށް ކަންކަން ދާންފެށުމުން، ރައްޔިތުންގެ މަޖިލީހަށް ގެއްލުންވާ ފަދަ ކަންކަން ވުމަށް އެމަނިކުފާނު ޖާގަ ދީގެން ހުންނެވުމަކީ ރަނގަޅު ގޮތަކަށް ނުވާނެކަމަށް ދެކި ލައްވާކަމަށެވެ.
2012 ވަނަ އަހަރު ރައީސް މުހައްމަދު ނަޝީދު ވަނީ އޭރު އެމަނިކުފާނު އަދާކުރައްވަމުން ގެންދެވި ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމުން އިސްތިޢުފާ ދެއްވައިފައެވެ. އަދި މި އަހަރު އެމްޑީޕީގެ ރައީސްކަމުގެ މަޤާމުންވެސް އަމިއްލަފުޅަށް އިސްތިއުފާ ދެއްވައިފައެވެ. އަދި މިއަދު އެމަނިކުފާނުގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހުގައި ތާވަލު ކުރެވިފައި ވަނިކޮށް އެމަނިކުފާނު އަމިއްލަފުޅަށް ވަނީ އެ މަޤާމުން އިސްތިޢުފާ ދެއްވައިފައެވެ.
ފާހަގަ ކޮށްލަންޖެހެނީ ރައީސުލްޖުމްހޫރިއްޔާ ކަމުގެ މަޤާމުން އިސްތިޢުފާ ދެއްވި ސިޓީގައިވަނީ އެ މަނިކުފާނު އެ މަގާމުގައި ހުންނަވައިފި ނަމަ ދިވެހި ގައުމާ ރައްޔިތުންނަށް ގެއްލުން ލިބިދާނެ ކަމަށް ދެކިލައްވާތީ އެ މަގާމުން އިސްތިއުފާ ދެއްވާކަމަށެވެ. އަދި މިއަހަރު އެމްޑީޕީގެ ރައީސްކަމުން އިސްތިއުފާ ދެއްވި ސިޓީގައި ވެސް ވަނީ އެ ޕާޓީގެ ރައީސް ކަމުގައި ހުންނަވައިފި ނަމަ ޕާޓީއަށާއި ޕާޓީގެ މެންބަރުންނަށް ގެއްލުން ލިބިދާނެ ކަމަށް ދެކިލައްވާތީ އެ މަގާމުން އިސްތިއުފާ ދެއްވާކަމަށެވެ. އަދި ހަމަ އޭގެ އިތުރުން ރައްޔިތުންގެ މަޖިލީހުގެ ރައީސް ކަމުގެ މަގާމުން އިސްތިޢުފާ ދެއްވައި މިއަދު ފޮނުއްވި ސިޓީގައިވެސް ވަނީ އެމަނިކުފާނު މަޖިލީހުގެ ރައީސް ކަމުގެ މަގާމުގައި ހުންނަވައިފި ނަމަ ރައްޔިތުންގެ މަޖިލީހަށް އެކަމުގެ ސަބަބުން ގެއްލުން ލިބިދާނެ ކަމަށް ގަބޫލުކުރައްވާތީ އެ މަގާމުން އިސްތިއުފާ ދެއްވާ ކަމުގައެވެ.
Advertisement
This content is created and paid for by advertisers and does not involve Voice Journalists
