މި ހިނގާ 19 ވަނަ ރައްޔިތުންގެ މަޖިލީހަކީ ދިވެހިރާއްޖޭގައި މިހައިތަނަށް ހިނގައިފައި އޮންނާނެ އެންމެ ޑިމޮކްރެޓިކް މަޖިލިސް ކަމަށް މަޖިލީހުގެ ރައީސްގެ މަޤާމުން މިއަދު އިސްތިއުފާ ދެއްވި ރައީސް މުޙައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލިހުގެ ރައީސްކަމުގެ މަޤާމުން އިސްތިއުފާ ދެއްވުމަށްފަހު، އެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ދެއްވި ޖަވާބުގައި ރައީސް ނަޝީދު ވިދާޅުވީ، އެއްވެސް ތައައްސުބެއް ނެތި ބައްލަވައިފިނަމަ، މި ހިނގާ 19 ވަނަ ރައްޔިތުންގެ މަޖިލީހަކީ ދިވެހިރާއްޖޭގައި މިހައިތަނަށް ހިނގައިފައި އޮންނާނެ އެންމެ ޑިމޮކްރެޓިކް މަޖިލިސް ކަމަށެވެ.
އަދި މީގެ އިތުރުން އެމަނިކުފާނުގެ ވާހަކަފުޅުގައިވަނީ 19 ވަނަ ރައްޔިތުންގެ މަޖިލީހަކީ މިހާތަނަށް އެންމެ ގިނަ މަސައްކަތްތަކާއި އެންމެ ގިނަ ބިލުތައްވެސް ފާސްކުރެވިފައިވާ މަޖިލިަސްކަމުގައި ވިދާޅުވެފައެވެ.
އެންމެ ގިނަ ބިލު ވެސް ފާސްކުރީ މި މަޖިލީހުން. އަދި އެހެންވެސް މަޖިލީހުގައި ހުރި އެންމެ ގިނަ ކަންކަން ކުރެވިފައިވާ މަޖިލިސް. އަޅުގަނޑު ވަރަށް އުފާވޭ، އަޅުގަނޑަށް ފުރުސަތު ލިބުމުން
ރައީސް ނަޝީދު
މީގެ އިތުރުން ރައީސް ނަޝީދު ވިދާޅުވީ، ޑިމޮކްރެޓިކް ނިޒާމެއްގައި ރިޔާސަތުތަކަށް ޖެލެންޖުކުރަން ޖެހޭނެ ކަމަށާއި އެކަމަކީ ޒާތީވުން ކަމުގައި އެމަނިކުފާނު ދެކި ނުލައްވާކަމުގައިވެސް ރައީސް ނަޝީދު ވަނީ ވިދާޅުވެފައެވެ.
ހަމައެޔާއެކު އެމަނިކުފާނުގެ އިތުބާރު ނެތްކަމުގެ މައްސަލަ ހުށަހެޅުމަށްފަހު އެމްޑީޕީން ގެންދަނީ މަޖިލީހުގެ ބާރުތައް އަބަދުގެ އަބަދަށް ހަނިވެގެންދާފަދަ ކަންކަން ކުރަމުން ކަމަސްވެސް ރައީސް ނަޝީދު ވަނީ ވިދާޅުވެފައެވެ.
އިތުބާރު ނެތްކަމުގެ މައްސަލައާއި ގުޅިގެން ސުޕްރީމް ކޯޓުން ނެރުނު ހުކުމުގައި ވެސް މިކަމުގެ ބިރުވެރިކަމާމެދު އަލިއަޅުވާލާފައިވާ ކަމަށް ނަޝީދު ވިދާޅުވިއެވެ.
ރައްޔިތުންގެ މަޖިލީހުގެ ރައީސް ކަމުން ނަޝީދު މިއަދު އިސްތިއުފާ ދެއްވި އިރު އެމަނިކުފަނުގެ އިތުބަރު ނެތްކަމުގެ މައްސަލަ 49 މެމްބަރުންގެ ސޮޔާ އެކު އެމްޑީޕީން ވަނީ ހުށަހަޅައިފައެވެ.
Advertisement
This content is created and paid for by advertisers and does not involve Voice Journalists
