ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ މަގާމުން ވަކިވެވަޑައިގަންނަވަމުންވެސް ދިވެހި ރައްޔިތުންނަށް ދެއްވީ ކެއްސެއް ކަމަށް މާލެ ސިޓީގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް ވިދާޅުވެއްޖެއެވެ.

ސައިފް މިފަދައިން ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ހިޔާނާތުގެ މޭސްތިރިންކަމަށް ދައުލަތުން ބުނާ އަދި އެ މައްސަލައިގައި ހުކުމް ވެސް އިއްވާފައިވާ ކުރީގެ ނައިބު ރައީސް އަހުމަދު އަދީބާއި އެ ކުންފުނީގެ ކުރީގެ މެނޭޖިން ޑިރެކްޓަރު ލ ޒިޔަތަށް މާފު ދީ މިނިވަންކުރެއްވުމަށް ރައީސް ޞާލިހު ނިންމެވުމާއި ގުޅިގެންނެވެ.

އެގޮތުން ސައިފް ވިދާޅުވީ، އެމްއެމްޕީއާރްސީ ޚިޔާނާތުގެ ސަބަބުން ދައުލަތުން ގެެއްލުނު ފައިސާ ރައީސް ޞާލިހު އަށް ހޯދައިނުދެއްވުނުއިރު، އެމަނިކުފާނު ހުންނެވީ އެ ޚިޔާނާތުގައި ބައިވެރިވި 'ވަގުންނަށް' ސަލާމަތްދެއްވައިގެން ކަމަށެވެ. 

"ކަރަޕްޝަންގެ މައްޗަށް ކަރަޕްޝަންގެ ހިންގަވާފައި، ވަކިވަމުން ދަމުންވެސް ދިވެހި ރައްޔިތުންނަށް އެދެއްވީ ކެއްސެއް. މިއީ އިބޫ ޞާލިހްގެ ފެންވަރު. ދެވަނަ ދައުރެއް ނުލިބުނީ މިފެންވަރުގެ މީހެއްކަން ދިވެހިންނަށް ސާފުވާތީ." ސައިފް ވިދާޅުވިއެވެ.

އެމްއެމްޕީއާރުސީގެ ހިޔާނާތުގެ މައްސަލައިގައި އަދީބުގެ މައްޗަށް ދައުލަތުން ކްރިމިނަލް ކޯޓުގައި ހަތް ދައުވާއެއް އުފުލުމުން، އެ ހުރިހާ ދައުވާއެއް ވެސް ކޯޓުގައި ވަނީ ސާބިތުވެފަ އެވެ. އެމްއެމްޕީއާރުސީ މައްސަލައިގައި އަދީބަށް އުފުލި ދައުވާތަކުގެ ތެރޭގައި ޓޫރިޒަމް މިނިސްޓަރު ކަމުގެ މަގާމުގައި ހުންނަވައިގެން މަގާމުގެ ނުފޫޒު ބޭނުންކޮށްގެން ފައިދާ ހޯދައިދިނުމުގެ ދައުވާ ހިމެނެއެވެ. އަދީބުގެ މައްޗަށް އެ ހަތް ދައުވާ ވެސް އުފުލީ އެމްއެމްޕީއާރްސީގެ ތެރެއިން 2014 ވަނަ އަހަރުން ފެށިގެން 2015 ވަނަ އަހަރާއި ދެމެދު ހިންގި ކޮރަޕްޝަނާއި މަނީލޯންޑްރިން މައްސަލައާއި ގުޅިގެންނެވެ.

މީގެއިތުރުން ޒިޔަތަކީ ވެސް އިއުތިރާފުގެ އެއްބަސްވުމުގެ ދަށުން ޖަލު ހުކުމް ގޭގައި ތަންފީޒު ކުރައްވަމުން އައި ބޭފުޅެކެވެ. އޭރު އޭނާގެ މައްޗަށް ޝަރީއަތްތައް ކުރިޔަށް ދިޔައިރު ދައުލަތުން ބުނެފައި ވަނީ ޒިޔަތަކީ ހިޔާނާތް ހިންގުމުގެ އެއް މޭސްތިރިޔާ ކަމަށެވެ. ޒިޔަތުގެ މައްޗަށް އިއްވި ހުކުމުގެ އަދަބު ވެސް ލުއިވީ އެއްބަސްވުމެއް އޮތުމާއި އެކު ރައީސް ޔާމީންގެ މައްސަލައަށް ހެކި ބަސް ދެއްވުމުންނެވެ.

ވެރިކަމުގެ ދައުރު ނިމެން 3 ދުވަހަށްވެފައި ވަނިކޮށް އަދީބާއި ޒިޔަތަށް ރައީސް މިވަނީ މައާފު ދެއްވާފައެވެ.