ފަލަސްޠީނުގެ ޣައްޒާއަށް އިޒްރާއިލުން ހުއްޓައިނުލައި ދެމުންއަންނަ ހަމަލާތަކުގައި ޖަބަލިއްޔާ އަށް ހަމަލާދީ 30 މީހަކު ޝަހީދުކޮށްލައިފިއެވެ.
އަލްޖަޒީރާގައި ބުނެފައިވަނީ ރޭ ޖަބަލިއްޔާ ރެފިޔުޖީ ކޭމްޕަށް ހަމަލާދީ އެކޭމްޕުން 30 މީހަކު ޝަހީދު ކޮށްލައިފައިވާކަމަށެވެ.
ޖަބަލިއްޔާއަށް ދިން ހަމަލާއަށް ފަހު ޒަޚަމްވި މީހުންތައް ފަރުވާއަށް ގެންގޮސްފައިވަނީ އިންދޮނީސީ ހޮސްޕިޓަލަށެވެ. އޭގެ ތެރޭގައި ގިނަ ޢަދަދެއްގެ ކުޑަކުދިން ހިމެނެއެވެ.
ޖަބަލިއްޔާއަށް ދިން ހަމަލާތަކިގެ އިތުރުން ނާދީ ޚަދަމަތް ޑިސްޓްރިކްގެ 12 ގެއަކަށް ވައިގެމަގުން ހަމަލާދީ އެގެތައް ވަނީ ހަލާކުކޮށްލައިފައެވެ.
މީގެ އިތިުރުން ޚާން ޔޫނިސް އަސް ދިން ހަމަލާތަކެއްގައި 10 މީހަކު ވަނީ ޝަހީދުކޮށްލައިފައެވެ. ޚާން ޔޫނިސް ގައި ހުންނަ އަލް އައްޣާ އާއިލާ އާއި އަބޫ ގަމެއިޒާ އާއިލާގެ ގެއަށް އަމާޒުކޮށް ދިން ހަމަލާތަކުގެ ސަބަބުން އެ ދެ ޢިމާރާތުން އެތައް ބަޔަކަށް އަނިޔާވެ އެމީހުން ވަނީ ފަރުވާ ދިނުމަށް އަލް ނައްސިރް ހޮސްޕިޓަލަށް ގެންދެވިފައެވެ.
ފަރުވާ ދިނުމަށް އެ ހޮސްޕިޓަލަށް މީހުން ގެންދެވުނު ނަމަވެސް ފަރުވާ ދެވޭނެ ގޮތް ނެތި އެ ހޮސްޕިޓަލުގެ ޑޮކްޓަރުންވެސް ދަނީ އެތައް ދަތިތަކަކާއި ކުރިމަތިލަމުންނެވެ.
އިޒްރާއިލްގެ ހަމަލާތަކުގައި ޝަހީދުވި މީހުންގެ ޢަދަދު 11،200 އިން މައްޗަށް ވަނީ އަަރައިގެން ގޮއްސައެވެ.
ފަލަސްޠީނުގެ ސަރުކާރާއި ހަވާލާދީ ޤުދްސް ނެޓްވޯކް ގައި ބުނެފައިވަނީ އިޒްރާއިލްގެ ހަމަލާތަކުގެ ސަބަބުން ސަރުކާރުގެ 94 ހެޑްކުއަރޓާސް އެއް ހަލާކުވެފައިވާކަމަށެވެ. އަދި 253 ސްކޫލަކާއި، 71 މިސްކިތަކާއި 3 ފައްޅިއެއް ހަލާކުކޮށްލައިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
