މާލީ ވަޒީރު އިބްރާހީމް އަމީރު، ރައްޔިތުންގެ މަޖިލީހަށް ވަޑައިގެން އިންނެވީ ކުށުގެ ތުހުމަތަކާއި އެކު ކަމަށް ރައްޔިތުންގެ މަޖިލީހުގެ ކުރީގެ ރައީސް، އަދި މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު ވިދާޅުވެއްޖެއެވެ.
ނޮވެމްބަރު މަހުގެ 1 ވަނަ ދުވަހުގެ ކުރީން ރައްޔިތުންގެ މަޖިލީހަށް ހުށަހަޅަންޖެހޭ 2024 ވަނަ އަހަރުގެ ބަޖެޓްގެ މަސައްކަތް، މިނިސްޓަރ އަމީރު މަޖިލީހަށް ހާޒިރުވެވަޑައިނުގެންނެވުމުންނާއި، މަޖިލީހުގެ ކޯރަމް ހަމަ ނުވުމުން މިހާތަނަށްވެސް ވެސް ވަނީ ކުރިއަށް ނުގެންދެވިއެވެ.
އެ މަސައްކަތް ކުރިއަށް ގެންދަން، މަޖިލީހުގެ މެޖޯރިޓީ ޕާޓީ، އެމްޑީޕީން ފުރުސަތު ދީފައި ނުވަނީ އެޕާޓީން މަޖިލީހަށް ހުށަހެޅި، ނަޝީދުގެ އިތުބާރު ނެތް ކަމުގެ މައްސަލަ، ކުރިއަށް ނުގެންގޮސް އިތުރު އެއްވެސް މަސައްކަތެއް ކުރިއަށް ނުގެންދެވޭނެ ކަމަށްބުނެއެވެ. ނަމަވެސް، އިއްޔެ ނަޝީދު އިސްތިޢުފާ ދެއްވުމާއެކު އެކަން ހައްލުވެ، މަޖިލީހުގެ އައު ރައީސް އަކަށް، އެމްޑީޕީގެ މުހައްމަދު އަސްލަމް ރޭ ހަމަޖައްސަވައި، މިއަދު އަނެއްކާވެސް ބަޖެޓްގެ މަސައްކަތް ކުރިއަށް ގެންދެވޭތޯ އެކަމުގެ މަސައްކަތް އަސްލަމް ވަނީ ފަށްޓަވާފައެވެ. އެކަމަށްޓަކައި މިނިސްޓަރ އަމީރުވެސް ވަނީ މިއަދު މަޖިލީހަށް ހާޒިރުވެ ވަޑައިގެންފައެވެ.
ނަމަވެސް ބަޖެޓް ހުށަހެޅުމުގެ އެފުރުސަތު އަމީރަށް ނުދެއްވައި ޑިމޮކްރެޓްސް ގެ މެންބަރުން ވަނީ ފުލުފުލުން ނިޒާމީ ނުކުތާ ނަންގަވަން ފަށްޓަވާފައެވެ.
އެގޮތުން މަޖިލީހުގެ ކުރީގެ ރައީސް އަދި، މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު ވެސް ވަނީ ނިޒާމީ ނުކުތާ ނަންގަވާ، އަމީރު މަޖިލީހަށް ވަޑައިގެން އިންނެވު ކުށުގެ ތުހުމަތުގައި އިންނަވައިގެން ކަމަށް ވިދާޅުވެފައެވެ.
"މާލީ ވަޒީރު މިތަނަށް ވަޑައިގެން އެ އިންނެވީ، ކުށުގެ ތުހުމަތުގައި އިންނަވައިގެން. މި މަޖިލީހަށް ބަޖެޓް ހުށަހެޅުމަށް މާލިއްޔަތު ގާނޫނު ވަރަށް ސާފުކޮށް ބަޔާން ކުރޭ އެކަން ކުރަންވީ މުއްދަތު. ސިޔާސީ ބޭނުމަށް އެބޭފުޅުން މިތަނުގައި އެކަން އަނބުރަމުން އެ ގެންދަވަނީ. ދިވެހި ދައުލަތުގެ ނިޒާމް ގެއްލުވާލައިގެން ނުވާނެ. މާލީ ވަޒީރު މިވަގުތު ޝަރީއަތަށް ފޮނުވުން އެއީ މިވަގުތު އަޅުގަނޑުމެން ކުރަން އޮތް އެންމެ މުހިންމު މަސައްކަތް. މީ ނިޒާމީ ނުކުތާއެއް. މިއީ މުޅި ރައްޔިތުންގެ މަޖިލީހުގައި އޮތް އެންމެ މުހިންމު ނިޒާމީ ނުކުތާ. މާލީ ވަޒީރަކަށް މަޖިލީހަކަށް ގޮމެއް ނުޖެހޭނެ"
މައްޗަންގޮޅި މެދު ދާއިރާގެ މެންބަރު މުހައްމަދު ނަޝީދު
ނަމަވެސް ނަޝީދުގެ ނިޒާމީ ނުކުތާ ބަލައިނުގަންނަވައި އަސްލަމް ވަނީ ބަޖެޓް ހުށަހަޅުއްވަން އަމީރަށް ފުރުސަތު ދެއްވާފައެވެ. އަމީރު ބަޖެޓް އިއްވި ވަގުތު، ޑިމޮކްރެޓްސް ގެ މެންބަރުން ދިޔައީ ގޮނޑިކޮޅުތަކުން ތެދުވެ މަޖިލީހުގެ ތެރޭގައި އަޑުގަދަކުރައްވަމުންނެވެ.
Advertisement
This content is created and paid for by advertisers and does not involve Voice Journalists
