ދެ މިލިއަން ރުފިޔާއާއެކު ދިވެހި ރެޑް ކްރެސެންޓްގެ ފަލަސްތީން ރިލީފް ފަންޑު ބަންދުކޮށްފިއެވެ.
ރެޑް ކްރެސެންޓުން ނެރުނު ބަޔާނެއްގައި ވަނީ މިދިޔަ މަހުގެ 28 ވަނަ ދުވަހުގެ ނިޔަލަށް އެ ފަންޑަށް 2،105،337.14 ރުފިޔާ ލިބިފައިވާ ކަމަށް ބުނެފައެވެ.
މިދިޔަ މަހުގެ 14 ވަނަ ދުވަހު ހުޅުވާލި މި ފަންޑު ބަންދުކޮށްފައި ވަނީ މިދިޔަ އާދިއްތަ ދުވަހުއެވެ.
އެ ޖަމިއްޔާއިން ބުނީ، ފަންޑަށް ލިބުނު ފައިސާ ފޮނުވާނީ ފަލަސްތީނުގެ ރެޑް ކްރެސެންޓަށް ކަމަށެވެ. އަދި އެ ފައިސާ ބޭނުންކުރާނީ، ސިއްހީ ޚިދުމަތްތަކަށް ބޭނުންވާނެ ސާމާނާއި، އުޅަނދުތަކަށް ބޭނުންވާ ތެލާއި ޚަރަދުތަކުގެ އިތުރުން ހާލުގައި ޖެހިފައިވާ ފަރާތްތަކަށް ކާބޯތަކެއްޗާއި ސާފު ބޯފެން ފޯރުކޮށްދިނުމަށެވެ. މީގެ އިތުރުން ބޯހިޔާވަހިކަން ފޯރުކޮށްދިނުމަށް ވެސް މި ފައިސާ ބޭނުންކުރާނެ ކަމަށް އެ ޖަމިއްޔާއިން ބުންޏެވެ.
"އަމާޒަކީ މިމަހުގެ 12 ވަނަ ދުވަހުގެ ނިޔަލަށް ފަންޑަށް ލިބިފައިވާ ފައިސާ ވީހާވެސް އަވަހަށް ޣައްޒާގެ ހާލުގައި ޖެހިފައިތިިބި ފަރާތްތަކަށް ފޯރުކޮށްދިނުން،" ރެޑް ކްރެސެންޓުން ބުންޏެވެ.
އިސްރާއިލުން ޣައްޒާއަށް ދެމުންގެންދާ ލާއިންސާނީ އަނިޔާވެރި ހަމަލާތަކުގެ ސަބަބުން އެތައް ބަޔަކު ބަނޑުހައިހޫނުކަންމަތީ ތިބިއިރު އަނެއް ބަޔަކު އަމިއްލަ ގެދޮރު ދޫކޮށް މަގުމަތިވެފައި އެބަތިއްބެވެ.
ފަލަސްތީނުގެ ހާލުގަ ޖެހިފަތިބި ރައްޔިތުންނަށް އެހީތެރިވުމުގެ ގޮތުން ރާއްޖޭގެ ގިނަ ޖަމިއްޔާތަކުންނާއި އަމިއްލަ ފަރާތްތަކުން ވެސް އަންނަނީ މަސައްކަތްކުރަމުންނެވެ.
Advertisement
This content is created and paid for by advertisers and does not involve Voice Journalists
