ފަލަސްޠީނުގެ ޣައްޒާގައި ހުންނަ އެންމެ ބޮޑު ހޮސްޕިޓަލް އަލް ޝިފާ މެޑިކަލް ކޮމްޕްލެކްސް އަށްއިޒްރާއިލް ސިފައިން ވަދެ ބަލާފާސްކުރަމުން އެބަދެއެެވެ.

އަލްޖަޒީރާގައި ބުނެފައިވަނީ ޝިފާ ކޮމްޕްލެކްސް އަށް އިޒްރާއިލް ސިފައިން ވަދެ އެތަން ބަލައި ފާސްކުރުމުގެ ނަމުގައި ވަދެ ހޮސްޕިޓަލުގައި ތިބި ބަލިމީހުންްނާއި މެޑިކަލް އޮފިސަރުންނާއި އެހޮސްޕިޓަލުގައި ވަގުތީ ހިޔާވަހިކަން ހޯދަމުން އަންނަ މީހުން ބިރުގަންނަވައި އެމީހުންނަށް އުނދަގޫ ތައް ދެމުންދާ ކަމަށެވެ.

އަލް ޖަޒީރާގައި ބުނެފައިވަނީ އިޒްރާައިލުން އަލް ޝިފާ އަށް ވަދެ އެތަނުގެ ތެރޭގައި ހިންގަމުންގެންދާ ބަލައި ފާސްކުރުމަކީ ހަމާސް އާއި ދެކޮޅަށް ހިންގަމުންގެންދާ ކަމެއް ކަމަށް އިޒްރާއިލުން ބުނާކަމަށެވެ.

ނަމަވެސް ހަމާސް އިން ދަނީ އިޒްރާއިލުން އެ ޖަމާޢަތުން ރައްކާތެރިވުމަށް ހޮސްޕިޓަލް ބޭނުން ކުރާ ކަމަށް ބުނެ ބައިނަލް އަޤްވާމީ ދުނިޔެއަށް ބުނަމުންދާ ބުނުން އެތައް ފަހަރަކު ދޮގުކޮށްފައެެވެ.

އަލް ޝިފާގެ ޗީފް ޑރ މުޙައްމަދު ޒަޤޫތް އަލް ޖަޒީރާ އަށް ވިދާޅުވެފައިވަނީ އިޒްރާއިލްގެ ސިފައިން ހަތިޔާރު ތަކާއި އެކު ހިސްޕިޓަލް ތެރޭގައި ހަރަކާތް ތެރިވަމުން ދާ ކަމަށެވެ. އަދި ހަމާސްގެ ހަނގުރާމަ ވެރިން ހޯދަން ކަމަށް ބުނެ އެހޮސްޕިޓަލްގެ ބޭސްމަންޓްގެ ތެރެއަށް ވަދެފައިވާ ކަމަށެވެ.

އަދި އެ ކޮމްޕްލެކްސް ގައި ހުންނަ ސާޖިކަލް އަދި އެމެޖަންސީ ޢިމާރަތް ތަކަށްވެސް އިޒްރާއިލް ސިފައިން ވަދެފައިވާ ކަމަށް އަލްޖަޒީރާގައި ޑރ މުޙައްމަދަށް ހަވާލާދީ ބުނެފައިވެއެވެ.

މީގެ އިތުުރުން އޭނާ ވިދާޅުވެފައިވަނީ އިޒްރާއިލް ސިފައިން ޝިފާ ކޮމްޕްލެކްސް އަށް ވަދެ ރައްކާތެރި ތަންތަން ކަމަށް ކަނޑައެޅި ކޮރިޑޯތަކުން، ހޮސްޕިޓަލް ދޫކޮށް ދިޔުމަށް މަސައްކަތް ކުރި ބައެއް މީހުން ގަޔަށް އިޒްރާއިލް ސިފައިން މަތިިން ބަޑިޖަހައި ފައިވާކަމަށެވެ.

އަލްޝިފާ އަށް އިޒްރާއިލް ސިފައިން ދިން ވަރުގަދަ ހަމަލާއެއްގެ ސަބަބުން އެތަނުން އެތައް ބަޔަކު ޝަހީދުވެފައިވާ އިރު، ކަރަންޓު ނުލިބުމުގެ ސަބަބުން ޝިފާގެ އައިސީޔޫގައި ތިބި ބަލިމީހުންނާއި ނިކޫގައި ފަރުވާ ދެވެމުންދިޔަ އެތައް ކުއްޖަކު ވަނީ ޝަހީދުވެފައެވެ.

އިޒްރާއިލުން 7 އޮކްޓޫބަރުގައި ޣައްޒާއަށް ދޭން ފެށި ހަމަލާތަކުގެ ސަބަބުން މިހާތަނަށް 11،200 އަށް ވުރެ ގިނަ މީހުން ވަނީ ޝަހީދުވެފައެވެ.