ރައްޔިތުންގެ މަޖިލީހުގެ މެމްބަރުން އަމަލުކުރާންޖެހޭ ސުލޫކީ ޤަވާއިދެއް އެކުލަވާލުމުގެ މަސައްކަތް ކުރައްވާނޭކަމަށް ރައްޔިތުންގެ މަޖިލުހުގެ ރައީސްކަމަށް އަލަށް އިންތިޚާބުވެވަޑައިގެންނެވި ހިތަދޫ އުތުރު ދާއިރާގެ މެމްބަރުން މުހައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލިހުގެ މިއަދުގެ ޖަލްސާ ފައްޓަވާ ވާހަކަ ދައްކަވަމުން އަސްލަމް ވިދާޅުވީ ރައްޔިތުންގެ މަޖިލިހުގެ ރައީސަކީ، ޤާނޫނު އަސާސީއާއި އަދި މަޖިލިހުގެ ޤަވާއިދުގައިވާ ގޮތުގެ މަތިން، މަޖިލިހުގެ މެމްބަރުން ނިންމާ ކަންކަން ތަންފީޒު ކުރުމުގެ އެންމެ އިސްވެރިޔާކަމުގައެވެ.

އެހެންކަމުން ރައްޔިތުންގެ މަޖިލިހުގެ ރައީސް މަޖިލީހުގެ ޤަވާއިދު ހިފެހެއްޓުމާއި، ރައްޔިތުންގެ މަޖިލިހުގެ ޤަވާއިދަށް އުނިކަމެއް އަދުވެދާނެ ކަންކަން ހުއްޓުވުމަކީވެސް ރައްޔިތުންގެ މަޖިލިހުގެ ރައީސްކަމުގެ މަޤާމުގައި ހުންނަ މީހެއްގެ ޒިންމާއެއް ކަމުގައިވެސް އަސްލަމް ވިދާޅުވިއެވެ.

އަސްލަމް ވިދާޅުވީ އެއް ފިޔަވަޅެއްގެ ގޮތުގައި މީގެ ކުރީގެ މަޖިލިސްތަކުގައި މަސައްކަތް ކުރެވިފައިވޭ ޤާނޫނު އަސާސީގެ 88 ވަނަ މާއްދާގެ ހ، 2 ގައި ބަޔާންކުރާ މަޖިލީހުގެ މެންބަރުން އަމަލުކުރަންޖެހޭ ސުލޫކީ ކަންކަމުގެ ޤަވާއިދެއް އެކުލަވާލުމަށް މީގެ ކުރީގެ މަޖިލިސްތަކުގައި އެކަމަށް މަސައްކަތްތަކެއް ކުރެވިފައިވާ ކަމަށެވެ.

އެހެން ނަމަވެސް 19 ވަނަ މަޖިލީހުގައި އެކަމަށް މަސައްކަތްތަކެއް ކުރެވިފަ ނެތުމުން ޤާނޫނު އަސާސީގައި ބަޔާންކުރާ މި ދެންނެވި މަޖިލީހުގެ މެންބަރުން ތަބާވާންޖެހޭ ސުލޫކީ ޤަވާއިދުގެ މަސައްކަތް މެމްބަރުންގެ އެއްބާރުލުމާއެކު އެ ޤަވާއިދު ފާސްކުރެވޭތޯ ކުރިއަށް އޮތްތަނުގައި މަސައްކަތްކުރައްވާނެ ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ރައްޔިތުންގެ މަޖިލިސް ހުއްޓުމަކަށް ނައިސް ކުރިޔަށް ގެންދެވޭނެގޮތަށް ކަންކަން އިންތިޒާމް ކުރުމަކީ މުހިންމު ކަމެއްކަމަށް ފެންނާތީ އެގޮތުން ބައެއް ފިޔަވަޅުތައް އެޅުމަށް ވިސްނަވަމުން ގެންދަވާ ކަމުގައެވ.ެ