ޑރ. މުހައްމަދު މުއިއްޒު އަންނަ ހުކުރު ދުވަހު ހުވާކުރައްވާ ރަސްމިއްޔާތަށް އިންޑިއާ އިން މިނިސްޓަރު އޮފް އާތު އެންޑް ސައިންސް ކިރެން ރިޖިޖޫ ފޮނުވަން ނިންމައިފިއެވެ.
ކިރެން ރިޖިޖޫ އަކީ މި އަހަރުގެ މެއި މަހު ކެބިނެޓަށް އައްޔަން ކުރެއްވި ބޭފުޅެކެވެ. އޭނާ އަކީ ކުރިން ސްޓޭޓް މިނިސްޓަރެކެވެ.
އިންތިހާބީ ރައީސް ޑރ. މުހައްމަދު މުއިއްޒު އާއި އިންތިހާބީ ނައިބު ރައީސް ހުސައިން މުހައްމަދު ލަތީފު ހުވާކުރައްވާ ރަސްމިއްޔާތަށް ކިރަން ވަޑައިގަންނަވަނީ އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ މަންދޫބެއްގެ ގޮތުގައިއެވެ.
ރައީސް އިބްރާހިމް މުހައްމަދު ސޯލިހު ހުވާ ކުރުމުގެ ރަަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީ ވަޑައިގަތެވެ. އަދި މި ސަރުކާރުން އިންޑިއާ އާ ވަރަށް ގާތް ގުޅުމެއް ބާއްވައި އެ ގައުމުގެ ނުފޫޒު ދާޚިލީ ކަންކަމާއި ޚާރިޖީ ކަންކަމުގައި ވެސް ގަދަކުރި އެވެ.
ނަމަވެސް ޑރ. މުހައްމަދު މުއިއްޒު ވައުދުތަކުގެ ތެރޭގައި އިންޑިއާ ސިފައިން ބޭލުމާއި ބައެއް އެއްބަސްވުންތަކުގެ މައްސަލަ ބެލުން ހިމެނެ އެވެ. އަދި އިންޑިއާއާ ވެސް ވަކި ހާއްސަ ގުޅުމެއް ނުބާއްވަވާނެ ކަމަށާއި އެ ގައުމާ ވެސް އޮންނާނީ އެހެން ގައުމުތަކާ އޮންނަ ގުޅުން ކަމަށް ވިދާޅުވެފައިވެ އެވެ.
މިއީ ފަހުގެ ތާރީހެއްގައި، ރާއްޖޭގެ ރައިސުލްޖުމްހޫރިއްޔާއަކު ހުވާ ކުރެއްވުމުގެ ރަސްމިއްޔާތަށް އިންޑިއާ އިން މިހާ އާދައިގެ ބޭފުޅަކު ފޮނުވާ ފުރަތަމަ ފަހަރުކަން ފާހަގަ ކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
