ފުލުހުންގެ އޮފިޝަލުން ތަކަކަށް ޕްރޮމޯޝަން ދީފައިވަނީ ގަވާއިދު ތަކާއި އުސޫލުތަކާއި އެއްގޮތަށް ކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން މިފަދައިން ބުނެފައިވަނީ، ދައުރު ނިމެން ކައިރިވެފައި ވަނިކޮށް ޝަރުތުހަމަނުވާ ގިނަ އަދަދެއްގެ ފުލުހުންނަށް ޕްރޮމޯޝަން ދީފައިވާކަމަށް ބުނެ ދެކެވެމުންދާ ވާހަކައާ ގުޅިގެންނެވެ.

އެގޮތުން ފުލުހުން ބުނީ، އިންތިގާލީ މަރުހަލާގައި ފުލުހުންނަށް ދީފައިވާ ޕްރޮމޯޝަންތަކަކީ ރިޔާސީ އިންތިޚާބުގެ މާކުރިން، އޭޕްރިލް މަހުން ފެށިގެން އިއުލާންކޮށް ދިނުމަށް ހަމަޖެހިފައިވާ ޕްރޮމޯޝަންތަކެއްކަމަށެވެ.

އަދި ޕްރޮމޯޝަން އޭރު ހަވާލުނުކުރީ އިންތިހާބު ކައިރިވެފައި އޮތުމުންނާއި އެކަމުގެ ސަބަބުން ނޭދެވޭ ތަސައްވުރެއް އުފެދިދާނެ ކަމަށް ދެކޭތީ ކަމަށްވެސް ބުނެފައިވެއެވެ.

ޚިދުމަތުގެ މަގާމުގެ ކުރިއެރުން ދިނުމުގެ ގަވާއިދާ އެއްގޮތްވާ ގޮތުގެ މަތިން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ދެމުން ގެންދާ ޕްރޯމޯޝަން ތަކެއް ކަމަށް ފުލުހުން ވިދާޅުވިއެވެެ.

"މި ޕްރޮމޯޝަން ތަކަކީ މި ޚިދުމަތުގެ މަގާމުގެ ކުރިއެރުން ދިނުމުގެ ގަވާއިދާ އެއްގޮތްވާ ގޮތުގެ މަތިން އެކަމަށް ކަނޑައަޅާފައިވާ އުސޫލުތަކާ އެއްގޮތަށް ދެމުން ގެންދާ ޕްރޯމޯޝަން ތަކެއް." ފުލުހުން ބުނެފައިވެއެވެ. 

ވެރިކަން ބަދަލުވާ މި މަރުހަލާގައި އެއްވެސް ޕްރޮމޯޝަނެއް އަދި ފައިސާ ނުވަތަ އެނޫންވެސްދައުލަތުގެ މުދަލާއި ގުޅޭ މުއާމަލާތްތައް ނުހިންގުމަށް އޭސީސީން ވަނީ އިދާރާތަކަށް އަންގާފައެވެ. އަދި މި ގޮތައް އަންގާފައި ވަނިކޮން އެފަދަ މުއާމަލާތްތައް ހިންގާނަމަ ފިޔަވަޅު އަޅާނެކަމަށްވެސް އޭސީސީން ބުނެފައިވެއެވެ.