ސަޕްލިމެންޓްރީ ބަޖެޓްގެ ނަމުގައި ސަރުކާރުން ރައްޔިތުންގެ މަޖިލީހަށް ފޮނުއްވާފައި ވަނީ މި ސަރުކާރުން ކޮށްފައިވާ ވައްކަން ތަކުގެ ރަސީދެއް ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ މައްޗަން ގޯޅި މެދު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެ އެވެ.
ސަޕްލިމެންޓްރީ ބަޖެޓަށް ބަހުސް ކުރައްވަމުން ރައީސް ނަޝީދު ވިދާޅުވީ، ބަޖެޓާއި ގުޅޭ ކަންކަން ކުރިއަށް ގެންދާނޭގޮތް ދިވެހިރާއްޖޭގެ މާލިއްޔަތު ގާނޫނާއި ގަވާއިދުތަކުގައި އޮންނަ ކަމަށެވެ. އެގޮތުން ދައުލަތުގެ ފައިސާ ޚަރަދު ކުރުމަށް އޮންނަނީ މަޖިލީހުން ފާސް ކުރުމުން އެ ފާސް ކުރާ މިންވަރަށް، އެ ހުއްދަ ދޭ ކަންކަމަށް އެކަނި ކަމަށެވެ.
ދައުލަތުގެ ފައިސާ ޚަރަދު ކުރުމެއް ނޯވޭ ރައީސުލްޖުމްހޫރިއްޔާ ބޭނުންވެވަޑައިގަންނަވާ ކަންކަމަށް، ނުވަތަ ވަޒީރު ބޭފުޅުން އެދިވަޑައިގަންނަވާ ކަންކަމަށް.
ރައީސް މުހައްމަދު ނަޝީދު
ރައީސް ނަޝީދު ވިދާޅުވީ، އަދުގެ ސަރުކާރަށް ކުރިމަތިވެފައިވާ އެންމެ ބޮޑު މައްސަލަ އަކީ 'ކޭޝްފްލޯ' ބަލަހައްޓަވަން އެނގިވަޑައި ނުގެންނެވުން ކަމަށެވެ. އޭގެ ސަބަބުން މަސް ނިމޭއިރު އަތްމަތި ދަތިވާ ކަމަށް އެމަނިކުފާނު ވިދާޅުވި އެވެ.
މިއީ ސަޕްލިމެންޓްރީ ބަޖެޓު ހުށަހެޅި ފުރަތަމަ ފަހަރެއް ނޫން މި ސަރުކާރުން. އެހެންނަމަވެސް މިފަހަރު މިވާ ގޮތަކީ، ކެޔޮ ކޭ ވަރު މާ ބޮޑަށް އެނގެނީ. ބިތުފަންގި ނެގޭތީވެ.
ރައީސް މުހައްމަދު ނަޝީދު
ނަޝީދު އިތުރަށް ވިދާޅުވީ ދައުލަތުގެ ބަޖެޓް ހުސްވެފައިވާކަން ވީކްލީ ފިސްކަލްމަންޓް ސީރީސް އިން އެނގެން އޮތް ކަމަށެވެ.
މީގެން މާ ބޮޑަށް ސާފުވާން މި އޮތީ، ބަޖެޓް އެކީ ހުސްކޮށްލައްވައިފިކަން. ބައްލަވާ ޕްލޭނިންގ މިނިސްޓްރީގެ ޔުޓިލައިޒްޑް މިންވަރާ އަން ޔުޓިލައިޒްޑް މިންވަރާ. އަން ޔުޓިލައިޒްޑް މިންވަރެއް ނެތް. 44 ވަނަ ހަފްތާއަށް އައި އިރުގައި.
ރައީސް މުހައްމަދު ނަޝީދު
ނަޝީދު ވިދާޅުވީ ދައުލަތުގެ އިދާރާތަކުން ހާމަކުރަންޖެހޭ މައުލޫމާތު ހާމަކޮށްނުދީ ނުބެހެއްޓޭނެ ކަމަށާ، ރައްޔިތުންގެ ފައިސާއަކީ ބޭނުންވާހާ ގޮތަކަށް ބޭނުން ބަޔަކަށް ބަހާލަން ހުރި ފައިސާއެއް ނޫންކަމަށެވެ. އަދި ދައުލަތުގެ ފައިސާއަކީ އެއީ ގައުމުގެ މުސްތަގުބަލުކަމަށާއި، ރައީސުލްޖުމްހޫރިއްޔާ ބޭނުންވާ ގޮތަށް އެ ފައިސާއަށް ހިޔާނާތްވެ ވައްކަންކޮށްގެން ނުވާނެކަމަށްވެސް ރައީސް ނަޝީދު ވިދާޅުވި އެވެ.
މިއާއެކު ނަޝީދު ވަނީ ސަޕްލިމެންޓްރީ ބަޖެޓަކީ މި ސަރުކާރުން ކުރި ވައްކަމުގެ ރަސީދެއް ކަމަށް ވިދާޅުވެފައެވެ.
މިއީ ސަޕްލިމެންޓްރީ ބަޖެޓެއް ނޫން. މިއީ ވައްކަމުގެ ރަސީދެއް. ވަރަށް މަދުން ވައްކަމުގެ ރަސީދެއް އަޅުގަނޑުމެންނަށް ލިބޭނީ. އެއްޗެއް ގަތީމާ ގިނަ ފަހަރަށް ރަސީދެއް މި ލިބެނީ. މިއޮތީ. މާލީ ވަޒީރާއި ސަރުކާރު ވައްކަން ކުރައްވާފައި، ރަސީދެއް މިތަނަށް ފޮނުއްވާފައި. މިއޮތީ ވައްކަމުގެ ރަސީދެއް. މިއަށްވުރެ ވަރުގަދަ ހެއްކެއް، ވަރުގަދަ ގަރީނާއެއް ނެތް. މިއޮތީ ބައިތުލްމާލުން އެތައް ބައެއް ނަގާފައި.
ރައީސް މުހައްމަދު ނަޝީދު
ރައީސް ނަޝީދު ވިދާޅުވީ ސަރުކާރުން މިހާރު ކުރަމުން ދާ މަސައްކަތަކީ ދައުލަތް ބަނގުރޫޓުކޮށްލުން ކަމަށެވެ. އަދި އިތުރަށް ގައުމަށް ގެއްލުން ދިނުމަށް ފުރުސަތު ނުދީ، މި ވެރިކަން ނިމުމަކަށް ގެނައުމަށް ރައްޔިތުން ނިންމި ނިންމުމަކީ ދިވެހިންގެ ނަސީބުކަމަށް ރައީސް ނަޝީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
