އިޒްރާއިލްގެ ފަތުރުވެރިން ރާއްޖެ އައުން މަނާކުރުމަށް ސަރުކާރަށް ލަފާ ދިނުމަށް ރައްޔިތުންގެ މަޖިލީހުގެ ޚާރިޖީ ގުޅުންތަކާއި ބެހޭ ކޮމިޓީއިން ނިންމައިފިއެެވެ.
މިމައްސަލަ ރައްޔިތުންގެ މަޖިލީހަށް ދެ މެންބަރަކު ވަނީހުށަހަޅުއްވާފައިވެ އެވެ. އެގޮތުން ވިލިނގިލި ދާއިރާގެ މެންބަރު ސަޢުދު ހުސައިން ހުށަހެޅުއްވީ ގަރާރެކެވެ. އަދި މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް ވަނީ ކޮމިޓީން އެ މައްސަލަ ބަލައި ގޮތެއް ނިންމައިދިނުމަށް އެދިވަޑައިގެން ސިޓީއެއް ފޮނުއްވައިފަ އެވެ.
އެކަމާ ގުޅޭ ގޮތުން މިއަދު ބޭއްވި ކޮމިޓީ ބައްދަލުވުމުގައި އައްޑޫ މަރަދޫ ދާއިރާގެ މެންބަރު އިބްރާހިމް ޝަރީފު ވިދާޅުވީ ޚާރިޖީ ސިޔާސަތު ކަނޑައެޅުމަކީ ޤާނޫނު އަސާސީން ރައީސުލްޖުމްހޫރިއްޔާއަށް ލިބިދޭ ބާރެއް ކަމެވެ.
އެހެންވެ އޭނާ ހުށަހެޅުއްވީ ކޮމިޓީން ނިންމާ ނިންމުން ދިވެހި ސަރުކާރަށް ރައްޔިތުންގެ މަޖިލީހުގެ ލަފައެއް ގޮތަށް އެރުވުމަށެވެ.
މެންބަރު ޝަރީފު ހުށަހެޅުއްވުމަށް ތާއީދު ކުރައްވަމުން ހޯރަފުށި ދާއިރާގެ މެންބަރު އަހުމަދު ސަލީމް ވިދާޅުވީ އިޒްރާއިލްގެ ފަތުރުވެރިން ރާއްޖެ ނައުމަށް އަންގައި އެ ޤައުމުން ވެސް މިހާރު ޓްރެވެލް އެޑްވައިޒަރީއެއް ނެރެފައިވާ ކަމަށެވެ.
ދިވެހިން ވެސް އިޒްރޭލު ފަތުރުވެރިންނަށް މަރުހަބާ ކިޔައި އެ ފައިސާ ދިވެހި އިޤްތިޞާދުގައި ދައުރުވާން ކޮންމެހެން ބޭނުން ނުވާ ކަން ފެންނަމުންދާ ކަން ފާހަގަކުރެއްވި އެވެ. ސަރުކާރަށް އަރުވާ ލަފާގައި ޚާރިޖީ ސިޔާސަތު އެ ގޮތަށް ބައްޓަން ކުރަން ހިމަނަން ވާނެ ކަމަށް ސައްލެ ވިދާޅުވި އެވެ.
ކޮމިޓީގެ އެހެން މެންބަރުން ވެސް ވަނީ އެ ހުށަހެޅުއްވުމަށް ތާއީދު ކުރައްވައިފަ އެވެ.
ކޮމިޓީގެ މުގައްރިރު އަދި ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވީ ކޮމިޓީގެ މެންބަރުން އެ ގޮތަށް ތާއީދުކުރައްވާތީ އެ ގޮތަށް ރިޕޯޓު އެކުލަވާލެއްވުމަށް އަންގަވާނެ ކަމަށެވެ.
ފަލަސްޠީނުގެ ބިންތައް ހިފުމަށް އިޒްރޭލުން ހިންގަމުންދާ ޤަތުލްއާންމުގައި މި ފަހުން މަހެއްހާ ދުވަހު ދިން ހަމަލާތަކުގައި 11،000 އަށް ވުރެ ގިނަ މީހުން ވަނީ ޝަހީދު ކޮށްލައިފައެވެ.
Advertisement
This content is created and paid for by advertisers and does not involve Voice Journalists
