ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ބޯހިޔާވަހިކަން ފޯރުކޮށްދިނުމުގައި ރައްޔިތުންނާމެދު ވެފައިވާ ބޭއިންސާފާއި ދެކޮޅަށް އަޑު އުފުލުމަށް ބޮޑު އެއްވުމެއް ބާއްވަން ނިންމައިފި އެވެ.

ބޯހިޔާވަހިކަމުގެ މައްސަލަ ތަކުގައި އާންމު ރައްޔިތުންގެ ހައްގުގައި ވަކާލާތުކުރާ "އާންމުންގެ އެކުވެރި ޖަމިއްޔާއިން" އިންތިޒާމުކުރާ އެ ހަރަކާތް އޮންނާނީ މިއަދު ހަވީރު 4:00 ގައި މާލޭ ރަސްފަންނު ސަރަހައްދުގަ އެވެ.

މި ހަރަކާތާއި ގުޅޭ ގޮތުން މައުލޫމާތު ދެމުން އެ ޖަމިއްޔާއިން ބުނީ، މި އެއްވުމަކީ ރައީސް ޞާލިހުގެ ވެރިކަމުގެ އާރާއި ބާރު ދޫކޮށް ނިކުމެގެން ދާ ދުވަހު ސަރުކާރުގެ ވެރިންނަށް އާންމުންގެ އަޑު އިއްވުމަށް ބާއްވާ އެއްވުމެއް ކަމަށެވެ.

އެގޮތުން މި އެއްވުމުގެ ތެރެއިން، ދާދިފަހުން ސަރުކާރުން ނެރުނު 4000 ފުލެޓް ލިބޭ މީހުންގެ ލިސްޓާއި އަދި ޖުމްލަކޮށް ފާއިތުވި 5 އަހަރު ‎ރައީސް ޞާލިހުގެ ސަރުކާރުން ފްލެޓުވެރިންނަށް "ޖެއްސި އުދަގޫތަކާއި ނިގުޅައިގަތް ހައްގުގެ" އަޑު، އެމަނިކުފާނަށް އިއްވާނެ ކަމަށް އެ ޖަމިއްޔާއިން ބުނެފައިވެއެވެ. 

ވުމާއެކު ހިޔާ ފްލެޓުތައް ފިނިޝިން ނުނިންމާ ހަވާލުކުރުމުންނާއި ކުލި ބޮޑު ކުރުމުން އާއްމުންނަށް ކުރިމަތިވި އުނދަގޫތަކާއި، ގޯއްޗާއި ފުލެޓް ދިނުމުގައި ވެފައިވާ ބޭއިންސާފާއި ދެކޮޅަށް އަޑު އުފުލަން ވީހާވެސް ގިނަ ބަޔަކު މިއަދުގެ އެއްވުމުގައި ބައިވެރިވުމަށް އެ ޖަމިއްޔާއިން އެދެ އެވެ.