މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ މެޖޭނިން ޑިރެކްޓަރު (އެމްޑީ) އަދި ސީއީއޯގެ މަޤާމުގައި ހުންނެވި މަހުޖޫބު ސުޖާއު މިއަދު އެ މަގާމުން އިސްތިއުފާ ދެއްވައިފިއެވެ. 

އެމްއޭސީއެލްގެ އެމްޑީގެ މަޤާމުން މަހުޖޫބު އިސްތިއުފާ ދެއްވައިފައިވަނީ، މި ވެރިކަމުގެ ދައުރު ނިމެން އެއް ދުވަހަށް ވެފައިވަނިކޮށް އެ ބޭފުޅާ ފުރުއްވަމުން ގެންދެވި މަޤާމުން އިސްތިއުފާދެއްވިކަން ހާމަކުރައްވައި ކުންފުނީގެ މުވައްޒަފުންނަށް ފޮނުއްވި މެމޯއަކުންނެވެ. 

އެ މެމޯގައި ބުނެފައިވަނީ، މާދަމާ އިން ފެށިގެން އެމްއޭސީއެލްގެ އެމްޑީކަމުގެ މަގާމުން އިސްތިއުފާ ދެއްވާ ކަމަށާއި،  ސަރުކާރުން އެ މަގާމަށް ބޭފުޅަކު އައްޔަން ކުރައްވަން ދެން ކުންފުނި ހިންގާނީ ޑެޕިއުޓީ މެނޭޖިން ޑިރެކްޓަރު އިބްރާހިމް ތާހާ ކަމަށެވެ.

Advertisement

މީގެ އިތުރުންވެސް ކުންފުނީގެ ކަންކަމުގައި މުވައްޒިފުން ދިން އެއްބާރުލުން ފާހަގަ މަހުޖޫބުގެ މެމޯގައި ވަނީ އެ ކުންފުނީގެ މުވައްޒަފުންނަށް ޝުކުރު އަދާކުރައްވައިފައެވެ. 

ވިލާނާ އިންޓަރނޭޝަނަލް އެއަރޕޯޓްގެ ތަރައްގީ އަކީ އައު ސަރުކާރުން އެންމެ އިސްކަން ދޭނެ މަސައްކަތެވެ. އެ މަސައްކަތް އެކަށީގެންވާ ހަލުވި މިނެއް ގައި ނިމިގެން މިދާ ސަރުކާރަށް ކުރެވިފައިވާ ކަމަށް އިންތިހާބީ ރައީސް ދެކެވަޑައެއް ނުގަންނަވައެވެ. މަގާމާއި ހަވާލުވެވަޑައިގެންނެވުމުގެ ކުރީން ވެސް ރައީސް ޑރ މުއިއްޒު ވަނީ ވީއައިއޭގެ އައު ޓަރމިނަލްއަށް ޒިޔާރަތް ކުރައްވާ އެ ތަނުގެ މަސައްކަތްތައް ބައްލަވާލައްވާފައެވެ.