ހައި ކޯޓުގެ ފަނޑިޔާރު ކަމަށް ޖުޑީޝަލް ސާވިސް ކޮމިޝަން (ޖޭއެސްސީ) ގެ ކުރީގެ މެމްބަރު އަލްއުސްތާޛު އަބްދުލްމާނިއު ހުސައިން މިއަދު އައްޔަން ކުރައްވައިފިއެވެ.
ހއ.އިހަވަންދޫ، އަންބަރީގެ، މާނިއު ފަނޑިޔާރު ކަމަށް އައްޔަން ކުރުމަށް ނިންމީ، ކޮމިޝަނަށް ލަފާދޭ ކޮމިޓީން އޭނާއާ އިންޓަވިއު ކުރުމަށް ފަހު، ކޮމިޝަނަށް ދީފައިވާ ލަފައާ މެދު ގޮތެއް ނިންމަން މިއަދު ބޭއްވި ބައްދަލުވުމުގައެވެ.
އަލްއުސްތާޛު އަބްދުލްމާނިއު މިއަދު އައްޔަން ކުރައްވާފައިވަނީ ހައި ކޯޓުގެ ފަނޑިޔާރުކަމުގައި ހުންނެވި އަލްއުސްތާޛް އަޙުމަދު ޝަކީލް އެ މަގާމުން ރިޓަޔަރ ކުރެއްވުމާއި ގުޅިގެން ޝަކީލް އަދާކުރެއްވި މަގާމަށެވެ.
އެ މަޤާމަށް ކުރިމަތިލުމަށް ހުޅުވާލި ފުރުސަތުގައި މާނިއު ހިމެނޭހެން ނުވަ ބޭފުޅަކު ވަނީ ކުރިމަތިލައްވާފައެވެ.
ހައި ކޯޓުގެ ފަނޑިޔާރު ކަމަށް މާނިއު އައްޔަން ކުރެއްވީ ޖޭއެސްސީގައި މިއަދު މެންދުރުފަހު ބޭއްވި ރަސްމިއްޔާތެއްގައެވެ.
ހައިކޯޓު ފަނޑިޔާރު ކަމަށް އައްޔަނު ކުރެއްވުމުގެ ކުރީ މާނިއު ވަނީ ޖޭއެސްސީގެ މެންބަރު ކަމުގެ މަގާމު އަދާކުރައްވާފައެވެ. ޖޭއެސްސީގެ މެންބަރުކަމުން މާނިއު އިސްތިއުފާ ދެއްވީ މި ހަފުތާތެރޭގައެވެ.
މާނިއު ޖޭއެސްސީގެ މެންބަރު ކަމަށް އައްޔަނު ކުރެއްވީ ޖުލައި 31، 2019 ގައެވެ. އޭނާއަކީ ކޮމިޝަނުގައި އިންނަވާ ގާނޫނީ ވަކީލުން ތަމްސީލް ކުރެއްވި މެންބަރެވެ.
.
Advertisement
This content is created and paid for by advertisers and does not involve Voice Journalists
