ރާއްޖޭގެ މިސްކިތްތަކުގެ އިމާމުންގެ ތެރެއިން މާސްޓަރސް އާއި ހަމައަށް ކިޔަވާފައި ތިބި ފަރާތްތަކަށް ބޭރުގެ ޔުނިވާސިޓީއަކުން ޕީއެޗްޑީއަށް ކިޔެވުމުގެ ފުރުސަތު ވަރަށް އަވަހަށް ހުޅުވާލެވިގެން ދާނެ ކަމަށް މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެ އެވެ.
އައު ސަރުކާރުގެ ކެބިނެޓް އެކުލަވާލިތާ ފުރަތަމަ 24 ގަޑިއިރު ތެރޭގައި އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ގިނަ ކަންކަން އިއުލާނުކުރައްވައި އެމަނިކުފާނުގެ މިނިސްޓަރުކަމުގައި ކުރައްވަން ނިންމަވާފައިވާ ކަންކަން އިސްލާމިކް މިނިސްޓްރީގެ ސޯޝަލް މީޑިއާ މަންސަތަކުގައި މިހާރު ވަނީ ހާމަކުރައްވާފަ އެވެ.
އެގޮތުން އިމާމުންނަށް އޮތް ފުރުސަތުތަކާ ގުޅޭ ގޮތުން ޑރ. ޝަހީމްގެ އަމިއްލަ ޓްވިޓަރ ހޭންޑަލްއިން ކުރެއްވި ޓްވީޓެއްގައި ވިދާޅުވީ, ޕީއެޗްޑީއަށް ކިޔެވުމުގެ ފުރުސަތުގެ އިތުރުން, މިޞްރާއި ސައުދީ އަރަބިއްޔާއާއި މޭލޭޝިއާއާއި, ބުރޫނާއި އަދި އިންޑޮނޭޝިއާ ފަދަ ޤައުމުތަކުން އިމާމުންނަށް ތަމްރީންވުމުގެ ފުރުސަތު ހޯދަވައިދެއްވާނެ ކަމަ ށެވެ.
ޑރ. ޝަހީމަކީ މީގެ ކުރިން ރައީސް ޔާމީންގެ ވެރިކަމުގައި ވެސް އިސްލާމިކް މިނިސްޓަރުކަން ކުރެއްވި ބޭފުޅެކެވެ.
އޭރު ވެސް ޑރ. ޝަހީމް ގިނަ މަސައްކަތްޕުޅުތަކެއް ކުރެއްވިއެވެ. އަދި ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރުކަމުގެ އިތުރުން ވައިސް ޗާންސެލަރުކަން ވެސް ޑރ ޝަހީމް ވަނީ ކުރައްވައިފަ އެވެ.
Advertisement
This content is created and paid for by advertisers and does not involve Voice Journalists
