19 ވަނަ ރައްޔިތުންގެ މަޖިލީހުގެ ހުސްވެފައިވާ ގޮނޑިތަކަށް މެންބަރުން ހޮވުމަށްޓަކައި ބައި-އިލެކްޝަނެއް ނޯންނާނެކަމަށް އިލެކްޝަންސް ކޮމިޝަނުން ބުނެފި އެވެ.

ރައްޔިތުންގެ މަޖިލީހުގެ 5 ދާއިރާއެއްގެ ގޮނޑި ހުސްވެފައިވަނީ އެ ގޮނޑިތައް ތަމްޞީލްކުރައްވަމުން ގެންދެވި މެންބަރުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ވަޒީރުންގެ މަޖިލީހަށް ޢައްޔަނުކުރެއްވުމާއު އެކު މެމްބަރުކަމުން އިސްތިއުފާ ދެއްވުމާއި ގުޅިގެން ނެވެ.

ރައީސް ޑރ. މުޢިއްޒުގެ ކެބިނެޓް އެކުލަވާލައްވާ، ވަޒީރުން ހުވާކުރައްވާފައިވަނީ ރޭ ރައީސުލްޖުމްހޫރިއްޔާގެ އޮފީހުގައެވެ.

Advertisement

އައު ސަރުކާރުގެ ކެބިނެޓަށް ޢައްޔަނުކުރެއްވި މަޖިލިސް މެންބަރުންނަކީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް ގެ މަގާމަށް ނައިފަރު ދާއިރާގެ މެންބަރު އަޙްމަދު ޝިޔާމް،މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް ގެ މަގާމަށް މާވަށު ދާއިރާގެ މެންބަރު މުޙައްމަދު ސަޢީދު،މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް ގެ މަގާމަށް މަޑުއްވަރީ ދާއިރާގެ މެންބަރު އާދަމް ޝަރީފް، މިނިސްޓަރ އޮފް ޑިފެންސް ގެ މަގާމަށް ގުރައިދޫ ދާއިރާގެ މެންބަރު މުޙައްމަދު ޣައްސާން މައުމޫން އަދި އެޓަރނީ ޖެނެރަލް ގެ މަގާމަށް ވިލިމާލޭ ދާއިރާގެ މެންބަރު އަލްއުސްތާޛު އަޙްމަދު އުޝާމެވެ.

ހުސްވެފައިވާ މި 5 ދާއިރާގެ ގޮނޑީގެ އިތުރުން، އިލެކްޝަންސް ކޮމިޝަނުން ވަނީ ފަރެސްމާތޮޑާ ދާއިރާގެ ބައި އިލެކްޝަން ވެސް ނުބޭއްވުމަށް ނިންމަވާފައެވެ. އެދާއިރާގެ ގޮނޑި ހުސްވެފައިވަނީ ކުރިން އެ ދާއިރާ ތަމްޞީލުކުރައްވަމުން ގެންދެވި އަލްއުސްތާޛް ޙުސައިން މުޙައްމަދު ލަޠީފް ރައީސުލްޖުމްހޫރިއްޔާގެ ނައިބުގެ މަޤާމަށް އިންތިޚާބުވެވަޑައިގަތުމުންނެވެ.

އިލެކްޝްންސް ކޮމިޝަންގެ ނައިބް ރައީސް އިސްމާއިލް ޙަބީބް ވިދާޅުވީ، ރައްޔިތުންގެ މަޖިލީހުގެ މެންބަރުކަމުން ވަކިވުމުގެ ސަބަބުން އެ ގޮނޑިތަކަށް މެންބަރު އަލުން އިންތިޚާބު ކުރުމަށްޓަކައި ޤާނޫނުގައި ބުނާ މުއްދަތެއް ނުލިބޭކަމަށެވެ. އެހެންކަމުން އެ ދާއިރާތަކަށް މެންބަރުން އިންތިޚާބުކުރުމަށްޓަކައި ބައި-އިލެކްޝަނެއް ނުބާއްވާނެކަމަށް ހަބީބް ވިދާޅުވިއެވެ.

ދިވެހި ރާއްޖޭގެ ޤާނޫނު އަސާސީގައި ބަޔާންކޮށްފައިވަނީ، ރައްޔިތުންގެ މަޖިލީހުގެ މެންބަރަކު، މެންބަރުކަމުން ވަކިވުމުގެ ސަބަބުން ހުސްވާ ގޮނޑިއަށް އެ ގޮނޑި ހުސްވާ ތާރިީޚުން ފެށިގެން 60 ދުވަހުގެ ތެރޭގައި މެންބަރަކު އިންތިޚާބު ކުރަންވާނެކަމަށެވެ.

އެހެން ނަމަވެސް މެންބަރުކަމުގެ ގޮނޑި ހުސްވާ ތާރިޚުން ފެށިގެން ރައްޔިތުންގެ މަޖިލީހުގެ ކުރިއަށްއޮތް ޢާންމު އިންތިޚާބާ ދެމެދު އޮތީ 6 މަސް ދުވަސް ނުވަތަ އެއަށްވުރެ ކުރު މުއްދަތެއްކަމުގައިވާނަމަ ހުސްވާ ގޮނޑިއަށް މެންބަރަކު އިންތިޚާބު ކޮށްގެން ނުވާނެކަމަށް ޤާނޫނު އަސާސީގައި ބަޔާންކުރެއެވެ.

ޙަބީބް ވިދާޅުވީ، އަންނަ އަހަރުގެ މާރިޗު ފަހުކޮޅު ނުވަތަ އޭޕްރީލް ކުރީ ކޮޅު 20 ވަނަ ރައްޔިތުންގެ މަޖިލީސް އިންތިޚާބު ބޭއްވުމަށް ނިންމާފައިވާކަމަށެވެ. އަދި ސީދާ ތާރީޚެއް ކަނޑައެޅުމަށްޓަކައި ރައްޔިތުންގެ މަޖިލީހާއެކު މަޝްވަރާކުރުމަށް ނިންމާފާއިވާކަމަށް ވެސް ވިދާޅުވިއެވެ.