ދިވެހި ސަރުކާރުގެ ދަރަންޏާއި ސަރުކާރުން ޒިންމާވާ ގޮތަށް ސޮވެރިން ގެރެންޓީ ދީގެން އެކި ފަރާތްތަކުން ނަގާފައިވާ ޖުމުލަ ދަރަނި 118.9 ބިލިއަން ރުފިޔާއަށް އަރައިފިއެވެ.

މިނިސްޓްރީ އޮފް ފިނޭންސް އިން އާންމުކުރި ތަފާސްހިސާބުތަކަށް ބާލާއިރު،  ސެޕްޓެމްބަރު މަހުގެ ނިޔަލަށް ރާއްޖޭގެ ޕަބްލިކް އަދި ޕަބްލިކް ގެރެންޓީ ދަރަނި ވަނީ ޖީޑީޕީގެ ނިސްބަތުން 110.9 އިންސައްތައަށް އިތުރުވެފައެވެ. އެއީ 118.9 ބިލިއަން ރުފިޔާއެވެ. މިއީ ނިސްބަތުން ރާއްޖޭގެ އާބާދީގެ ބޮލަކަށް ގާތްގަނޑަކަށް ގާތްގަނޑަކަށް 227,812ރ ގެ ދަރަންޏެކެވެ.

މީގެ އިތުރުން ފިނޭންސް މިނިސްޓްރީގެ ތަފާސް ހިސާބުތަކަށް ބަލާއިރު ސަރުކާރަށް ބޭރުގެ ފަރާތްތަކުން ނަގާފައިވާ ދަރަނީގެ އަދަދު 50.9 ބިލިއަން ރުފިޔާއަށް އަރާއިރު އެެތެރޭގެ ފަރާތްތަކުން ނަގާފައިވާ ދަރަނީގެ އަދަދު 66.3 ބިލިއަން ރުފިޔާއަށް އަރައެވެ.

ސަރުކާރުން އެންމެ ގިނަ ލޯނު ނަގާފައިވަނީ ކޮވިޑާ ގުޅިގެން 2020 ވަނަ އަހަރެވެ.

އެގޮތުން ކޮވިޑު އިމަޖެންސީ ސަޕޯޓުގެ ގޮތުގައި ސަރުކާރުން ނަގާފައިވާ ލޯނުތަކުގެ އަދަދު 92 މިލިއަން ޑޮލަރަށް ވުރެ އިތުރު ވާއިރު، މީގެ ތެރެއިން ސީދާ ސަރުކާރުން ނަގާފައިވާ ދަރަނީގެ އަދަދަކީ 103.6 ބިލިއަން ރުފިޔާކަން އެ ތަފާސްހިސާބުތަކުން ދައްކައެވެ. 

އެގޮތުން ބަޔާސް ކްރެޑިޓްގެ ގޮތުގައި ނަގާފައިވާ 14.7 ބިލިއަނާއި މަލްޓިލޭޓަރަލް 6.9 ބިިލިއަނާއި ބައިލޭޓަރަލް ފަސް ބިލިއަނާއި އެހެނިހެން ގޮތްގޮތުން ނަގާފައިވާ 7.7 ބިލިއަނުގެ އިތުރުން އަމިއްލަ ވިޔަފާރިތަކުން ނަގާފައިވާ 1.5 ބިލިއަން ރުފިޔާ ހިމެނެ އެވެ.
އަދި ސަރުކާރުން ޒިންމާވާ ގޮތަށް ނަގާފައިވާ ދަރަނީގެ އަދަދު 15.2 ބިލިއަން ރުފިޔާއަށް އަރާއިރު ސަރުކާރުން ނަގާފައިވާ ސަބްސިޑަރީ ލޯނުތަކުގެ އަދަދު 10.9 ބިލިއަން ރުފިޔާއަށް އަރަ އެވެ.

ފާއިތުވި ސަރުކާރު ފާހަގަ ކުރެވިގެން ދިޔައީ ރާއްޖޭގެ ދަރަނި އިންތިހާއަށް މައްޗަށް ދިޔަ ސަރުކާރެއްގެ ގޮތުގައެވެ.