ދިވެހި ބަހާއި ސަގާފަތާއި ތަރިކައިގެ ވަޒީރު އާދަމް ނަސީރު އިބްރާހީމް، ފަލަސްތީނުން ރާއްޖެއަށް ކަނޑައަޅުއްވާފައިވާ ސަފީރު ވާލިދު އަބޫ އަލީ އާ މިއަދު ބައްދަލު ކުރައްވައިފި އެވެ.
އަލަށް އުފެއްދެވި ދިވެހި ބަހާއި ސަގާފަތާއި ތަރިކައިގެ ވަޒީރުގެ މި ބައްދަލު ކުރެއްވުމަކީ ހުވާ ކުރެއްވުމަށްފަހު އެމަނިކުފާނުގެ ފުރަތަމަ ރަސްމީ ބައްދަލު ކުރެއްވުމެވެ.
ބަހާއި ތަރިކަ ވުޒާރާ އިން ބުނި ގޮތުގައި މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރައްވާފައި ވަނީ މި ވަގުތު ޣައްޒާގެ ހާލަތާ ގުޅޭ ގޮތުންނެވެ. މީގެ އިތުރުން ދިވެހިންގެ މެދުގައި ފަލަސްތީނާ މެދު އޮތް ލޯބި ފެނި މި ހިތްދަތި ދަނޑިވަޅުގައި ދިވެހި ލޮބުވެތި ރައްޔިތުންގެ ފަރާތުން ފަލަސްތީނުގެ އަހުންނާއި އުހުތުނަށް ވެދެއްވާ އޯގަތެރިކަމާއި ބަހައްޓަވާ ގާތްކަން ފަލަސްތީނުގެ ސަފީރު ވަނީ ފާހަގަ ކުރައްވާފައެވެ.އަދި މިކަން މިގޮތަށް ދަމަހައްޓަވައި ދެއްވުމަށާއި ފަލަސަތީނަށް އަޑު އުފުލުން މަތީ ދެމި ތިއްބެވުމަށް އެމަނިކުފާނު ވަނީ ދިވެހި ރައްޔިތުންގެ ފަރާތުން އެދިވަޑައިގެންފައެވެ.
މި ބައްދަލު ވުމުގައި މިނިސްޓަރ ނަސީރު ވިދާޅުވީ ފަލަސްތީނުގެ ހާލަތަކީ ދިވެހީންގެ އެންމެ ހަގު އުމުރުފުރާއިން ފެށިގެން އެންމެ ދޮށީ އުމުރުފުރާގެ ފަރާތްތަކާ ހަމައަށް ވެސް އެއް ޝުއޫރެއްގެ ގޮތުގައި އޮތް މައްސަލަ އެއް ކަމަށެވެ.
ފަލަސްތީނުގެ ދިފާއުގައި މުޅި ދުނިޔޭ ގައި ވެސް ދިވެހީންގެ އަޑަކީ ގަދަ އަޑެކެވެ. ދިވެހީންނަށް ވެވުނު މިންވަރަކުން ފަލަސްތީންގެ ރައްޔިތުންނަށް އެހީތެރިކަން ފޯރުކޮށް ދެމުން ދިޔަ އެވެ.
ދިވެހީންގެ ހިތްތަކުގައި ފަލަސްތީނަށް އޮތް ލޯތްބާއި ގަދަރު އުފެދިގެން ދިއުމުގައި ރައީސް މައުމޫންގެ 30 އަހަރުގެ ވެރިކަމުގައި ފަލަސްތީނުގެ މައްސަލަ އަށް ދެއްވި އަހަންމިއްޔަތު ބޮޑު ދައުރެއް އަދާކުރި އެވެ. ފަަަލަސްތީނަށް ނަސްރަށް އެދި ހިންގުނު ހަރަކާތްތަކާއި އެހީތެރިވުމަށް ކުުރިއަށް ގެންދިޔަަ ކެމްޕެއިންތައް މުހިންމު ދައުރެއް އަދާކުރި އެވެ.
Advertisement
This content is created and paid for by advertisers and does not involve Voice Journalists
