އިޒްރޭލުގެ ގައުމުގެ ފަތުރުވެރިން ރާއްޖެ އައުން މަނާކޮށް އެގައުމުގެ ޕާސްޕޯޓު މަނާކުރުމަށް ގޮވާލައި ކުރަމުންދާ މުޒާހަރާގެ ބައިވެރިން ފޮރިން މިނިސްޓްރީ ދޮށަށް ދިއުމުން މިނިސްޓަރު މޫސާ ޒަމީރު ނުކުމެވަަޑައިގެން ފަލަސްތީނު މީހުންގެ ދިފާއުގައި ޝުއޫރު ފާޅުކުރައްވައިފި އެވެ.

މުޒާހަރާގެ ބައިވެރިން ވަނީ ފޮރިން މިނިސްޓްރީ ދޮށަށް ގޮސް، އިޒްރޭލުގެ ޕާސްޕޯޓު މަނާކުރުމަށާއި އިޒްރޭލުގެ އިސް ފަރާތްތައް ބްލެކު ލިސްޓު ކުރުމަށް ގޮވާލާފައެވެ. އަދި މުޒާހަރާގެ ބައެއް ބައިވެރިން މިނިސްޓަރު ޒަމީރާ ބައްދަލުކުރަން އެދުމުން އެބޭފުޅާ ވަނީ މުޒާހަރާގެ ބައިވެރިންނާއި ބައްދަލު ކުރައްވާ މުޒާހަރާ ކުރަމުންދިޔަ ފަރާތްތަކުގެ ވާހަކަތައް އަޑު އައްސަވާފައެވެ.

"ރައީސް މިދިޔަ ދުވަސްތަކުގެ ތެރޭގަ އޯއައިސީގެ ސެކެޓްރީ ޖެނެރަލާއި ފަލަސްތީނުގެ ސަފީރުގެ އިތުރުން، އެހެން ގައުމުތަކުގެ ބޭފުޅުންނާ ބައްދަލުކުރެއްވި، އެ ހުރިހާ ބޭފުޅުންގެ އަރިހުގައިވެސް ވިދާޅުވެފައިވީ އިމީޑިއެޓް ސީޒްފަޔާ އެއް އަޅުގަނޑުމެން ބޭނުންވާ ކަމަށާއި ހިއުމަނިޓޭރިއަން ކޮރިޑޯޒް ހުޅުވާލަން ޖެހޭނެ ކަމަށާއި 1967 ގެ ބޯޑަރުތަކަށް އަނބުރާ ދިއުމަށް، އެއީ އަޅުގަނޑުމެން ހުށަހަޅާ ހުށަހެޅުމަކީ" މިނިސްޓަރ ޒަމީރު ވިދާޅުވި އެވެ.

"ސީޒް ފަޔާ ނައު އިނގޭތޯ އަޅުގަނޑުމެންގެ ވެސް ސްޓޭންޑަކީ. ސީޒް ފަޔާ ނައު" މިނިސްޓަރު އެމޭރުމުން ވާހަކަ ދައްކަވަނިކޮށް، ހަމަލާ ދިނުން މިހާރު ހުއްޓައިލުމަށް މުޒާހަރާގެ ބައިވެރިން އަޑު އުފުލަން ފެށުމުން ވިދާޅުވިއެވެ.

މިދިޔަ އޮކްޓޫބަރު މަހު 7 ގައި ފެށި ހަނގުރާމައިގައި މިހައިތަނަށް އިޒްރޭލުގެ ހަމަލާތަކުގައި ފަލަސްތީނުގެ 12،000 އަށްވުރެ ގިނަ މީހުން ވަނީ ޝަހީދުކޮށްލައިފަ އެވެ. އޭގެތެރެއިން 5000 އަކީ ކުޑަކުދިންނެވެ.

މިއަދު ވަނީ އިޒްރޭލާއި ދެކޮޅަށް މަޖިލިސް ކުރިމަތީގައިވެސް މުޒާހަރާ ކޮށް، 1000 މީހުންގެ ސޮޔާއެކު ޕެޓިޝަނެއް ވެސް ރައްޔިތުންގެ މަޖިލީހަށް ހުށަހަޅައިފައެވެ.