ނިމިދިޔަ އޮކްޓޫބަރު މަހުގެ 7ވަނަ ދުވަހުން ފެށިގެން އިޒްރާއިލުން ފަލަސްޠީނުގެ ޣައްޒާއަށް ދެމުންދާ ހަމަލާތަކުގެ ސަބަބުން ޝަހީދުވަމުންދާ މީހުންގެ ޢަދަދާއި ޒަޚަމްވަމުންދާ މީހުންގެ ޢަދަދު އަދިވެސް އަންނަނީ މަތިވަމުންނެވެ.

ފަލަސްޠީނުގެ ޣައްޒާގެ އެންމެ ފަހުގެ އަދާހަމަތަކަށް ބަލާލާއިރު އަލްޖަޒީރާގައި ވަފާ ނިއުސް އަށް ހަވާލާދީ ބުނެފައިވަނީ އަލް ނުސައިރަތް ރެފިޔުޖީ ކޭމްޕަށް އިޒްރާއިލުން ވައިގެމަގުން ދިން ހަމަލާގައި 17 މީހަކު ޝަހީދު ވެފައިވާ ކަަމަށެވެ. އަދި ޖަބަލިއްޔާ އަށް ދިން ހަމަލާއެއްގައި 3 މީހަކު ޝަހީދު ކޮށްލައިފައިވާ ކަމަށް އަލްޖަޒީރާގައި ބުނެފައިވެއެވެ.

މިދެހަމަލާގައި ޝަހީދިުވި މީހުންގެ ތެރޭގައި ޣައްޒާއަށް ނިސްބަތްވާ ނޫސްވެރިޔެއް ކަމަށްވާ އާޔަތް ޚަދޫރާ ވެސް ހިމެނެއެވެ. އޭނާ ޝަހީދު ކޮށްލުމާއި އެކު ފާއިތުވި 24 ގަޑިއިރުތެރެއިން ޣައްޒާގެ 2 ނޫސްވެރިޔަކު ޝަހީދުވީއެވެ.

ހަމާސްގެ އެންމެ އިސް ލީޑަރު އިސްމާއިލް ހަނިއްޔާ ވިދާޅުވެފައިވަނީ ހަނގުރާމަ ހުއްޓައިލައި ހަމާސް އިން ރަހީނުކޮށްފައިވާ މީހުން ދޫކޮށްލުމަށް ހުޅުވާޅި ދޮރު މިހާރު ބަންދު ވެފައިވާ ކަމަށެވެ.

އަލްޖަޒީރާގައި އިތުރަށް ބުނެފައިވަނީ ޣައްޒާގެ އިންދޮނީސީ ހޮސްޕިޓަލުގެ ވަށައިގެން އިޒްރާއިލުގެ ޔަހޫދީން ސިފައިން ބަރުހަތިޔާރާއި އެކު ތިބުމުގެ ސަބަބުން އެހޮސްޕިޓަލްގެ ތެރޭގައި އެތައް މެޑިކަލް ވޯކަރުންނަކާއި އެތައް ބަލިމީހުންނެއް އެތަނުގައި ތާށިވެފައިވާ ކަމަށެވެ. އަލްޖަޒީގައި ޑަބްލިޔުއެޗްއޯ އަށް ހަވާލާދީ ބުނެފައި ވަނީ އެހޮސްޕިޓަލުގައި ތިބި މީހުންގެ ތެރެއިން 12 މީހަކު އިޒްރާއިލުން ޝަހީދު ކޮށްލައިފައިވާ ކަމަށެވެ.

އިންދިނީސީ ހޮސްޕިޓަުގައި ތިބި ބައެއް މީހުން އެހޮސްޕިޓަލުން ނުކުމެ ޣައްޒާގެ ދެކުނަށް ފައިގެ މަގުން ވަނީ ގޮސްފައެވެ. ޣައްޒާގެ ދެކުނަށް ވެސް އިޒްރާއިލުން ދަނީ ހަމަލާދެމުންނެވެ. އަދި އެސަރަހައްދުގެ ހޮސްޕިޓަލްތައް ވެސް ހުރީ ފުރި ތޮއްޖެހިފައެވެ.

މީގެ އިތުރުން ފަލަސްޠީނުގެ ހުޅަނގު އައްސޭރީގައިވެސް އިޒްރާއިލުން ދަނީ އަނިޔާވެރި ޢަމަލުތައް ހިންގަމުންނެވެ. އެގޮތުން އަރައްބާ އަވަށުގައި ހިންގި މިލިޓަރީ ރެއިޑެއް ގައި އެކަކު ޒަޚަމްކޮށްލައިފައިވެއެވެ. މީގެ އިތުރުން ޣިއްފިން އަދި ޣިބްތިއްޔާ ގައިވެސް މިލިޓަރީ ރެއިޑްތައް ވަނީ ހިންގައިފައެވެ.