ފަލަސްޠީނުގެ ޣައްޒާގައި އިޒްރާއިލުން ޝަހީދު ކޮށްލި މީހުންގެ ޢަދަދު 13،300 އަށް އަރައިފިއެވެ.

އަލްޖަޒީރާގައި ބުނެފައިވަނީ 7 އޮކްޓޫބަރުގައި އިޒްރާއިލުން ޣައްޒާ އަށް ދޭން ފެށި ހަމަލާތަކުގައި މިހާތަނަށް 13،300 މީހުން ޝަހީދުކޮށްލައިފައި ވާ ކަމަށެވެ.

އަދި އޭގެ ތެރޭގައި ހިމެނޭ 5600 ޝަހީދުންނަކީ ކުޑަކުދިން ކަމަށްވެސް ބުނެފައިވެއެވެ. މީގެއިތުރުން އިޒްރާއިލުން ޣައްޒާގެ އެކި ހިސާބުތަކަށް ދީފައިވާ ހަމަލާތަކުގައި މިހާތަނަށް 30،000 އަށް ވުރެ ގިނަ މީހުން ވަނީ ޒަޚަމްވެފައެވެ. އޭގެތެރެއިން ހަތަރު ބައިކުޅަ ތިން ބަޔަކީ އަންހެނުންނާއި ކުޑަކުދިންނެވެ.

Advertisement

އަލްޖަޒީރާގައި ބުނެފައިވަނީ ޣައްޒާއިން 6000 އަށް ވުރެ ގިނަ މީހުން ވީނުވީ އެއް ނޭނގި ގެއްލިފައިވާ ކަމަށެވެ.

މީގެއިތުރުން ފަލަސްޠީނުގެ ހުޅަނގު އައްސޭރިން 217 މީހަކު ޝަހީދުވެފައި ވާއިރު އޭގެ ތެރެއިން 50 ޝަހީދުންނަކީ ކުޑަކުދިންނެވެ. މީގެ އިތުރުން ހުޅަނގުއައްސޭރިން 2750 އަށްވުރެ ގިނަ މީހުންނަށް އެކިވަރުގެ އަނިޔާތައް ވަނީ ލިބިފައެވެ.

މިއީ ޖީއެމްޓީ ގަޑިން 5:00 އާއި ހަމައަށް ރިކޯޑް ކުރެވިފައިވާ ޢަދަދުތަކެވެ.

މިއަދުވެސް އިޒްރާއިލުން ދަނީ ޣައްޒާގެ އެކި ހިސާބުތަކަށް ނުރައްކާތެރި ހަމަލާތައް ދެމުންނެވެ. އެގޮތުން ޣައްޒާގެ ނުސައިރަތް ރެފިޔުޖީ ކޭމްޕަށާއި ޖަބަލިއްޔާ އަށް މިއަދުވެސް ވަނީ ހަމަލާދީފައެވެ. މީގެއިތުރުން އިޒްރާއިލުން ދަނީ ޣައްޒާގެ އުތުރުގައި ހުންނަ އިންދޮނީސީ ހޮސްޕިޓަލުގެ ގޯތިތެރެޔާއި ކަމަލް އަދްވާނީ ހޮސްޕިޓަލްގެ ގޯތިތެރެޔަށް ބޮމުގެ ހަމަލާތައް ދީފައެވެ.