އިންދޮނީސީ ހޮސްޕިޓަލްގައި އެތައް ސަތޭކަ ބަޔަކު، ދެވޭނެ ފަރުވާއެއް ނެތިފައި އެބަތިބި ކަމަށް ފަލަސްޠީނުގެ ހެލްތް މިނިސްޓްރީ އިން ބުނެފިއެވެ.
ފަލަސްޠީނުގެ ހެލްތް މިނިސްޓްރީ އާއި ހަވާލާދީ އަލްޖަޒީރާގައި ބުނެފައިވަނީ އިޒްރާއިލުން ހަތިޔާރާއި އެކު ވަށައިލައިފައިވާ އިންދޮނީސީ ހޮސްޕިޓަލްގައި އެތައް ބަޔަކު ދެވޭނެ ފަރުވާއެއް ނެތި ތާށިވެފައި ތިބި ކަމަށެވެ.
އެގޮތުން 550 މީހަކު ދެވޭނެ ފަރުވާ އެއް ނެތި އިންދޮނީސީ ހޮސްޕިޓަލް ގައި އެބަތިބި ކަމަށާއި، އަދި އިޒްރާއިލް ސިފައިން ހޮސްޕިޓަލްގެ ވަށަލައި ހިޞާރުކޮށްގެން ތިބުމުގެ ސަބަބުން ޒަޚަމްވެގެން ގެނެސްފައިވާ މީހުން ހޮސްޕިޓަލުން ނެރެގެން ފަރުވާދޭން ތަނަކަށް ގެންދެވޭނެ ގޮތެއް ނެތި ހޮސްޕިޓަލުގެ ތެރޭގައި ޝަހީދުވަމުން ދާކަމަށެވެ.
ޖަބަލިއްޔާ ރެފުޔުޖީ ކޭމްޕްގެ ތެރޭގައި ހުންނަ އިންޑޮނީސީ ހޮސްޕިޓަލް ހުޅުވީ 2015 ވަނަ އަހަރުއެވެ. އިންދޮނީސީ ހޮސްޕިޓަލަކީ އިންޑޮނޭޝިއާގެ ވޮލެންޓިއަރުންގެ އޮގަނައިޒޭޝަނެއް ކަމަށްވާ މެޑިކަލް އެމަޖެންސީ ރެސްކިޔު ކޮމިޓީ އިން ހިންގާ ހޮސްޕިޓަލެކެވެ.
އެހޮސްޕިޓަލަކީ 140 މީހުންނަށް އެޑްމިޓް ކޮށްގެން ފަރުވާ ދެވޭ ގޮތައް ފަރުމާކޮށްފައިވާ ހޮސްޕިޓަލަކެެވެ. ނަމަވެސް ޣައްޒާ ހަނގުރާމައަށް ފެށުނުފަހުން އެހޮސްޕިޓަލްވެސް ވަނީ ފުރި ބާރުވެފައެވެ.
އިންދޮނީސީ ހޮސްޕިޓަލްގެ ތެރޭގައި 500 އެއްހާ މީހުން ތާށިވެފައި ތިބި ކަމަށާއި ޑޮކްޓަރުންނާއި ނަރުހުން ތިބީ ބަލިމީހުންނަށް ދޭނެ ފަރުވާއެއްނެތި ބޭސް ނެތި ހާސްކަމުގެ ތެރޭގައި ކަމަށް އަލްޖަޒީރާގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
