ހައްދުފަހަނައަޅާފައިވާ އިޒްރާއިލުން ފަލަސްޠީނުގައި ހިންގަމުންދާ ގަތުލު ޢާއްމު 4 ދުވަހަށް މެދު ކަނޑާލުމަށް އެއްބަސްވެއްޖެއެވެ.

4 ދުވަހަށް ހަމަލާތައް ހުއްޓާލުމަށް ފަލަސްޠީނުގެ މިނިވަންކަމަށްޓަކައި ޖިހާދުކުރަމުންދާ މުޖާހިދުން ޝަރުތުކޮށްފައިވަނީ އިޒްރާއިލްގެ ޔަހޫދީ ސިފައިން ރަހީނުކޮށްފައިވާ ފަލަސްޠީނުގެ މީހުންގެ ތެރެއިން އަންހެނުންނާއި ކުޑަކުދިން ހިމެނޭހެން 150 މީހުން ދޫކޮށްލުމަށެވެ.

އަދި އިޒްރާއިލުން ޝަރުތުކޮށްފައިވަނީ ފަލަސްޠީނުގެ ހަނގުރާމަވެރިން ރަހީނު ކޮށްފައިވާ އިޒްރާއިލްގެ ރައްޔިތުންގެ ތެރެއިން 50 މީހަކު ދޫކޮށްލުމަށެވެ.

Advertisement

ހަމަލާތައް ހުއްޓާލުމުގެ އިޢްލާނު ކުރިއަށް މިއޮތް 24 ގަޑިއިރުތެރޭގައި އިޢްލާނު ކުރާނެ ކަމަށް އަލްޖަޒީރާގައި ބުނެފައިވެއެވެ.

އިޒްރާއިލާއި ހިންގަމުންދާ ގަތުލު އާއްމު މެދުކަނޑާލަން އެއްބަސްވުމަކަށް އައިސްފައިވަނީ ޤަޠަރާއި މިޞްރު އަދި އެމެރިކާ މެދުވެރިވެގެން ދެކެވުނު ވާހަކަތަކުގެ ސަބަބުންނެވެ.

އެގޮތުން ޤަޠަރުން ލަފާކޮށްފައިވަނީ 4 ދުވަހަށް ހަމަލާތައް މެދުކަނޑާލިމަނަމަވެސް އެމުއްދަތު އިތިުރު ވެގެން ހިނގައިދާނެ ކަމަށެވެ. އަދި ހަމަލާތައް މެދުކަނޑައިލާ 4 ދުވަހު ޣައްޒާއަށް އިންސާނީ އެހީގެ 300 އެއްހާ ޓްރަކް ވެއްދޭނެ ކަމަށްވެސް ވަނީ ބުނެފައެވެ.

އިޒްރާއިލްގެ ބޮޑުވަޒީރު ނަތަންޔާހޫ ބުނެފައިވަނީ ހަނގުރާމަ މެދުކަނޑާލުމުގެ މާނައަކީ ހަނގުރާމަ އެއްކޮށް ހުއްޓައިލުން ނޫން ކަމަށާއި މެދުކަނޑާލަން ބުނެފައިވާ މުއްދަތު ފާއިތުވުމުން ހަމަލާތައް ފަށާނެ ކަމަށެވެ.

އިޒްރާއިލާއި ފަލަސްޠީނުގައި ހިންގަމުންދާ ލާ އިންސާނީ ޖަރީމާތައް ކުރިއަށްދާތާ 47 ދުވަސް ވަނީ މިހާރު ވެފައެވެ.