ގައުމީ ޗާޕްޚާނާ އިޢާދަ ކޮށް، ފޮތްތެރި މުޖުތަމަޢުއެއް އުފެއްދުމުގެ މަސައްކަތް ހަފްތާ 14 ގައި ފެށޭނެ: މިނިސްޓަރ
ދިވެހިރާއްޖޭގެ ގައުމީ ޗާޕު ޚާނާ އަލުން އިއާދަކޮށް، ފޮތްތެރި މުޖުތަމަޢުއެއް އުފެއްދުމުގެ މަސައްކަތް މ، ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ވެރިކަމުގެ ފުރަތަމަ 14 ހަފްތާގައި ފެށިގެންދާނެ ކަމަށް ދިވެހި ބަހާއި، ތަރިކަ އާއި ސަގާފަތާއި ބެހޭ ވުޒާރާގެ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ދިވެހި ބަހާއި، ތަރިކަ އާއި ސަގާފަތާއި ބެހޭ ވުޒާރާއިން ހަފްތާ 14 ގައި ކުރަން ރޭވިފައި ހުރި މަސައްކަތް ތަކާއި މިހާރު ކުރެވުނު ކަންކަމާއި ގުޅޭގޮތުން މަޢުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، ސުކޫލް ތަކާއި ޔުނިވާސިޓީ ތަކުގެ ލައިބްރަރީތަކުގައި ދިވެހި ވާހަކަފޮތް ތަކާއި، އެނޫންވެސް ދިވެހި ފޮތްތައް އިތުރުކޮށް، ދިވެހި ލިޔުންތައް ލިޔުމަށް ޝައުގުވެރިވާ ފަރާތްތަކަށް ފުރުސަތު ފަހިކޮށްދިނުމަށް ރޭވިފައިވާ ކަންކަމާއި ގުޅޭގޮތުން ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން މިނިސްޓަރ ނަސީރު ވިދާޅުވީ، އެކަމަށްޓަކައި ސަރުކާރުގެ ފުރަތަަމަ 14 ހަފްތާގައި ފަށަން ރޭވިފައިވާ ވަރަށް މުހިންމު ކަންކަން ހުރި ކަމަށެވެ.
އެގޮތުން ގައުމީ ޗާޕު ޚާނާ އަލުން އިއާދަކޮށް، ވާހަކަ ފޮތްތަކާއި ޢިލްމީ އެކިއެކި ލިޔުންތައް ލިޔެ ޗާޕުކުރަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ފެށުމަށް ހަމަޖެހިފައިވާ ކަމަށް ނަސީރު ވިދާޅުވި އެވެ.
ތަރިކަ އާއި ސަގާފަތާއި ބެހޭ ވުޒާރާގެ ވަޒީރު އާދަމް ނަޞީރު އިބްރާހީމް--- ފޮޓޯ/ވޮއިސް
އިރާދަކުރެއްވިޔާ ގައުމީ ޗާޕު ޚާނާ، އަލުން އިއާދަކުރުން އޮންނާނެ މިސަރުކާރުގައި. ދައުލަތުގެ ގައުމީ ޗާޕު ޚާނާއެއް އުފަންވެގެން އަންނާނެ. ހަފްތާ 14 ގެ ތެރޭގައި އެ މަސައްކަތް ފަށާނަން. އެ މަސައްކަތް ފެށުނީމަ، އޭގައި އަޅުގަނޑުމެންގެ އެންމެ ބޮޑު އަމާޒަކަށް ވާނީ، މިހާރުވެސް، އަޅުގަނޑަށް އެނގިފައި އެބަހުރި، ވަރަށް ރަނގަޅު، ވަރަށް ޢިލްމީ، ދިވެހިންގެ އަމިއްލަ ތާރީޚާ ގުޅޭ ފޮތް ތަކާއި، ވަރަށް ގިނަ ފޮތްތަކުގެ ތަރުޖަމާވެސް ވަރަށް ގިނަ ބޭފުޅުން އެބަ ތިއްބެވި އަމިއްލަފުޅަށް ފޮތް ލިޔުއްވާ ހިތްޕުޅުން ފޮތް ލިޔުއްވާފައި، އެކަމަކު، ޗާޕުގެ އަގުބޮޑު ކަމާއި އަޅުގަނޑުމެންގެ ފޮތުގެ ޝައުގުވެރިކަން އޮންނަލެއް ކުޑަ ކަމުން، މާލީ ސަބަބުތަކާއި ހުރެ އެ ޗާޕު ނުކުރެވިފައި.
ތަރިކަ އާއި ސަގާފަތާއި ބެހޭ ވުޒާރާގެ ވަޒީރު އާދަމް ނަޞީރު އިބްރާހީމް
މިނިސްޓަރު ވިދާޅުވީ، ފޮތް ލިޔެ ޗާޕުކޮށް ނެރެން ބޭނުންވާ ފަރާތްތަކަށް އެ ކަމަށް އެހީވެ، ފޮތްތެރި މުޖުތަމަޢުއެއް އުފެއްދެވުމަކީ ރައީސް ޑރ. މުޢިއްޒުގެ ވިސްނުން ފުޅެއް ކަމަށެވެ.
"ގައުމިއްޔަތު މަޝްރޫއު ތެރޭގައި ރައީސް ގެ ވިސްނުންފުޅަކީ ފޮތް ތެރި މުޖުތަމަޢުއެއް އުފެއްދުން. އެ މުޖުތަމަޢު އުފެއްދުމަށްޓަކައި ދައުލަތުގެ ޗާޕްޚާނާ އެއް އުފެއްދޭނެ. އަދި ކުތުބުޚާނާތައް އިތުރަށް ތަރައްގީ ކުރުމުގެ މަސައްކަތް ކުރިއަށްދާނެ. ހަފްތާ 14 ގެ ތެރޭގައި މި މަސައްކަތް ފެށޭނެ"
ތަރިކަ އާއި ސަގާފަތާއި ބެހޭ ވުޒާރާގެ ވަޒީރު އާދަމް ނަޞީރު އިބްރާހީމް
މިއަދުގެ ނޫސްވެރިންގެ ބައްދަލުވުމުގައި މިނިސްޓަރު ވަނީ، ދިވެހި ގައުމާ، ތާރީޚާއި، ސަގާފަތާއި، ދިވެހިންގެ ޖިއޮގްރަފީ އާއި އާދަކާދައަށް ދަރިވަރުން އަހުލުވެރި ކުރުވާނެ ވަކި މާއްދާއެއް ތަޢާރަފް ކުރުމަށް ރައީސް މުޢިއްޒުގެ މެނިފެސްޓޯ ގައި ހިމެނިފައިވާކަން ފާހަގަކުރައްވައި، އެކަން ކުރިއަށް ގެންދަވާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists