އިޒްރާއިލް ރައްްޔިތުން މިހާރު އެމީހުންގެ ބޮޑުވަޒީރު ނަތަންޔާހޫ އަށް ތާއީދު ނުކުރާ ކަމަށް ތުރުކީވިލާތުގެ ރައީސް ރަޖަބް ޠައްޔިބް އުރްދުޣާން ވިދާޅުވެއްޖެއެވެ.
އުރްދުޣާން މިހެން ވިދާޅުވީ އަލްޖީރިއާ އާއި ތުރުކީވިލާތް ގުޅިގެން ބޭއްވި ބިޒްނަސް ފޯރަމް އެއްގައި ވާހަކަދައްކަވަމުންނެވެ.
އުރްދުޣާން ވިދާޅުވީ އިޒްރާއިލްގެ ބޮޑުވަޒީރަކީ، ޣައްޒާގައި އޭނާ އިސްވެހުރި ޤަޠުލްޢާންމު ތަކުގެ ކުށުގައި، އިންޓަރނޭޝަނަލް ކްރިމިނަލް ކޯޓުގެ ކުރިމައްޗަށް ހާޒިރުކުރަން ޖެހިފައިވާ މީހެއް ކަމަށެވެ.
“ނަތަންޔާހޫގެ ނަން އެދަނީ އޮއްސެން، އެންމެ ކުޑަމިނުން އިޒްރާއިލްގެ މީހުންވެސް ނަތަންޔާހޫ އަށް ތާއީދު ނުކުރޭ” އުރްދުޣާން ވިދާޅުވެފައިވެެއެވެ.
އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރާއިލްގެ ހަމަލާތަކުގެ ސަބަބުން ޣައްޒާގެ 1400 އަށްވުރެ ގިނަ މީހުން ވަނީ ޝަހީދުވެފައެވެ. އަދި މިލިއަނަކަށް ވުރެ ގިނަ މީހުން ވަނީ ބޯހިޔާވަހިކަން ގެއްލިފައެވެ.
“އިޒްރާއިލްގެ ހަމަލާތަކުން އެމީހުންގެ އަސްލު އެނގިގެން ހިނގައްޖެ، އިޒްރާއިލާއި އެމީހުންގެ ސަޕޯޓަރުންގެ އަސްލު ހަޤީޤީ ނިޔަތް ސާފުވެގެން ހިނގައްޖެ، އިޒްރާއިލުން ޣައްޒާގައި ހިންގި ޖަރީމާތައް، އިންސާނިއްޔަތާއި ޚިލާފަށް ހިންގި ޖަރީމާތަކަށް އަދަބު ދިނުމަކީ ވަރަށް މުހިންމުކަމެއް” އުރްދުޣާންގެ ވާހަކައިގައި ވިދާޅުވެފައިވެއެވެ.
އިޒްރާއިލް ސިޔާސަތުތަކަކީ ބަލައިގަނެވޭނެ، ޤަބޫލްކުރެވޭނެ ސިޔާސަތުތަކެއް ނޫން ކަމަށާއި، އެމީހުންގެ މަޤްޞަދަކީ ފަލަސްޠީނުގެ ބިން ގަދަކަމުން ފޭރި ގަތުން ކަމަށެވެ.
Advertisement
This content is created and paid for by advertisers and does not involve Voice Journalists
