ޣައްޒާގެ ހޮސްޕިޓަލްތައް ހުސްކުރުމަށް ކުރާ މަސައްކަތްތަކުގައި ވޯލްޑް ހެލްތް އޯގަނައިޒޭޝަނަށް އެއްބާރުލުން ނުދިނުމަށް ފަލަސްޠީނުގެ ހެލްތް މިނިސްޓްރީ އިން ނިންމައިފިއެވެ.

ފަލަސްޠީނުގެ ހެލްތް މިނިސްޓްރީގެ ތަރުޖަމާނު އަޝްރަފް އަލް ޤުދްރާ އާއި ހަވާލާ ދީ އަލްޖަޒީރާގައި ބުނެފައިވަނީ އެމިނިސްޓްރީ އިން ޣައްޒާގެ ހޮސްޕިޓަލްތަކުގައި ޒަޚަމްވެފައި ތިބި މީހުންނާއި ބަލިމީހުން އަދި މެޑިކަލް ސްޓާފުން ހުސްކުރުމަށް ޑަބްލިޔު އެޗްއޯ އަށް އެެއްބާރުލުން ނުދިނުމަށް ނިންމައިފައިވާ ކަމަށެވެ.

ފަަލަސްޠީނުގެ ހެލްތް މިނިސްޓްރީގެ މިފަދަ ނިންމުމަކަށް އައިސްފައިވަނީ އިޒްރާއިލްގެ ޔަހޫދީން ޣައްޒާގެ އެންމެ ބޮޑު ހޮސްޕިޓަލް ކަމަށްވާ އަލް ޝިފާ ހޮސްޕިޓަލްގެ ޑިރެކްޓަރ މުޙައްމަދް އަލް ސަލްމިއްޔާ ހައްޔަރު ކުރުމާއި ގުޅިގެނެވެ.

އަޝްރަފް އަލް ޤަދްރާ ވިދާޅުވެފައިވަނީ އިޒްރާއިލުން، ހޮސްޕިޓަލްތަކުގައި މަސައްކަތް ކުރާ މުވައްޒަފުން ހައްޔަރުކުރުމުގެ ޒިންމާ ނަގަން ޖެހޭނީ ޔޫއެން އިން ކަމަށެވެ. އަދި އިޒްރާއިލްގެ ސިފައިން އަނިޔާވެރިކަމާއި އެކު މެޑިކަލް ސްޓާފުންނާއި މެދު އަމަލު ކޮށްފައިވާ ކަން ވެސް އަޝްރަފް ވަނީ އަލްޖަޒީރާ އާއި ވާހަކަ ދައްކަވަމުން ފާހަގަކުރައްވައިފައެވެ.

ހަތަރު ދުވަހަށް ހަމަލާތައް ހުއްޓާލުން ކުރިއަށް އޮތް 24 ގަޑިއިރު ތެރޭގައި އިޢްލާނުކުރާނެ ކަމަަށް އިޒްރާއިލުން ބުނެފައިވީނަމަވެސް އިޒްރާއިލުން އަދި އެކަން އިޢްލާނު ކޮށްފައެއް ނުވެއެވެ. އަދި ރެއާއި މިއަދުވެސް އިޒްރާއިލުން ދަނީ ޣައްޒާއަށް ހަމަލާތައް ދެމުންނެވެ.

އިޒްރާއިލުން މިއަދު ވަނީ ޣައްޒާގައި ހުންނަ އަލް އިންދޮނީސީ ހޮސްޕިޓަލް، 4 ގަޑިއިރުތެރޭގައި ހުސްކުރުމަށް އަންގައިފައެވެ. އެެއެންގުން އެންގި އިރުވެސް އިޒްރާއިލްގެ ސިފައިން ތިބީ އިންދޮނީސީ އޮތީ ހިޞާރުކޮށްފައެވެ.

އިޒްރާއިލުން އިންދޮނީސީ ހޮސްޕިޓަލް ހުސްކުރުމަށް އެންގިއިރު އެހޮސޕްިޓަލްގެ ތެރޭގައި 200 ޕޭޝަންޓުން ތިބި ކަމަށެވެ. އަދި އިޒްރާއިލުން އެންގި އެއެންގުން އެންގުމުގެ ކުރިން އިއްޔެ އެހޮސްޕިޓަލުން 450 ޕޭޝަންޓަކު ބޭރު ކުރެވިފައިވާ ކަމަށެވެ. ހޮސްޕިޓަލުން މީހުން ބޭރުކުރުމަށް ބޭނުންކުރި އެމްބިޔުލާންސްގައި ފަހަރަކު 6 ބަލި މީހުން އުފުލައިފައިވާ ކަމަށެވެ.

މީގެ އިތުރުން އިންދޮނީސީ ހޮސްޕިޓަލްގެ ތެރޭގައި ޝަހީދުވެފައި ތިބި 65 މީހެއްގެ ހަށިގަނޑު ވަޅުލެވޭނެ ގޮތެއް ނެތިފައި އެބަހުރި ކަމަށްވެސް އަލްޖަޒީރާގައި ބުނެފައިވެއެވެ.