ދިވެހި ކުޑަކުއްޖަކު ބަލަން މާލޭގެ ގެއެއްގައި ގެންގުޅުނު މެއިޑެއް އެކުއްޖާއަށް އަނިޔާކުރި ކަމުގެ ތުހުމަތުގައި ހައްޔަރުކުރި މެއިޑް ކުށައް އެއްބަސްވެއްޖެއެވެ.
ކުއްޖާއަށް އަނިޔާކުރި ކަމުގެ ތުހުމަތުގައި ފުލުހުން ހައްޔަރަށް ގެންގޮސްފައިވަނީ އުމުރުން 22 އަހަރުގެ ސަންދީޕު ކޯރު ނަމަކަށް ކިޔާ އިންޑިޔާއަށް ނިސްބަތްވާ އަންހެނެކެވެ. މިމައްސަލައިގައި މި އަންހެން މީހާ ހައްޔަރު ކޮށްފައިވަނީ މިދިޔަ މަހުގެ 26 ވަނަ ދުވަހުއެވެ.
މިމައްސަލަ ފެންމަތިވި ފުރަތަމަ ކޮޅުގައި އެއަންހެންމީހާ އެކުއްޖާއަށް އަނިޔާކުރާ މަންޒަރު ދައްކުވައިދޭ ވީޑިއޯ އެއް ވަނީ ސޯޝަލް މީޑިއާގައި ޢާންމުވެފައެވެ.
ސަންދީޕް ކޯރުގެ ބަންދު މުއްދަތު ޖެހުމަށް އިއްޔެ ކްރިމިނަލް ކޯޓަށް ވަނީ ހާޒިރު ކޮށްފައެވެ. ކޯޓުގެ ކުރިމައްޗަށް ހާޒިރު ކުރުމުން އޭނާ ބުނެފައިވަނީ އެކަމަކީ އޭނާގެ އަތުން ކުރެވުނު ކަމެއް ކަމަށާއި އެކަމަށް މަޢާފަށް އެދޭ ކަމަށެވެ.
ކުޑަކުއްޖާއަށް އަނިޔާކުރި މައްސަލައިގައި ބިދޭސީ އަންހެން މީހާގެ މައްޗަށް ދައުވާކުރުމަށް 10 ދުވަސް ތެރޭގައި ޕީޖީއަށް ފޮނުވާނެ ކަމަށްވެސް ފުލުހުން ކޯޓުގައި ވަނީ ބުނެފައިވެއެވެ.
މި މައްސަލައިގައި ސަންދީޕް ކުއްޖާއަށް އަނިޔާކުރާ މަންޒަރު ފެންނަ ވީޑިއޯވެސް ހެކީގެ ގޮތުގައި ހުށަހަޅާފައިވެއެވެ. އޭނާގެ ފުރަތަމަ ބަންދު މަޖިލީހުގައި ފުލުހުން ކޯޓުގައި ބުނެފައިވަނީ ވީޑިއޯ އިން ކުއްޖެއްގެ ގައިގާ ޖަހާފައިވާ ކަމަށް ބެލެވޭ ކަމަށެވެ.
Advertisement
This content is created and paid for by advertisers and does not involve Voice Journalists
