ރައްޔިތުން އެދޭ އަމާޒަށް ޤައުމު ގެންގޮސްދެއްވުމަށް ރައީސް ޑރ.މުޢިއްޒަށް އެންމެ ފުރިހަމައަށް އެއްބާރުލުންދީ އަދި އެމަނިކުފާނަށް އިތުބާރުކުރައްވާ ރައީސް ޑރ. މުއިއްޒު ހަވާލުކުރެއްވި ޤައުމީ މަސްޢޫލިއްޔަތު އެމަނިކުފާނުގެ ލަޔާޣަތާ ޤާބިލިއްޔަތު ތަންދިން އެންމެފުރިހަމައަކަށް އަދާކޮށްދިނުމަކީ ޢަޒުމެއް ކަމުގައި މަސްވެރިކަމާއި ކަނޑުގެ ވަޞީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ޕީޕީއެމް/ޕީއެންސީގެ އެތެރޭގައި އުފެދުނު ދެބަސްވުންތަކަށްފަހު، އެކޯލިޝަންގެ ލީޑަރ، ކުރީގެ ރައީސް ޔާމިން ޕީޕީއެމްއިން ވަކިވެ ވަޑައިގަންނަވާ އައުޕާޓީއެއް އުފައްދަވާކަން އިއުާނުކުރެެއްވުމަށްފަހު އެކަމުގެ ތައްޔާރީތައް ކުރިއަށްދާ ދަނޑިވަޅުގައި މިނިސްޓަރ ޝިޔާމްކުރެއްވި ޓުވީޓެއްގައި ވިދާޅުވީ، އުމާ ރައްޔިތުންނަށް އިޚުލާސްތެރި މަސައްކަތްތަކެއް ކޮށްދީ ދިވެހީން ގެނައި މި އުއްމީދީ ސަރުކާރު ދަމަހައްޓަން އެންމެކުރީސަފުގައި މަސައްކަތްކޮށްދިނުމަކީ އެމަނިކުފާނުގެ ޢަޒުމެއް ކަމުގައެވެ.
މީގެ އިތުރުން އެމަނިކުފާނުގެ ޓުވީޓުގައި ވަނީ، 19 ވަނަ މަޖިލީހާއެކު ޕާޓީގެ ނައިބުރައީސެއްގެވެސް މަސްޢޫލިއްޔަތާއެކު މަޖިލީހުގައި އިދިކޮޅު ޕާޓީއެއްގެ ގޮތުގައި މަދު މެންބަރުންކޮޅަކާއެކު ސަރުކާރު ޖަވާބުދާރީ ކުރުމުގެ މުހިއްމު މަސްޢޫލިއްޔަތު ވެގެންގޮއްސްފައިވަނީ ބުރަ އަދި އެހާމެ އުނދަގޫ މަސައްކަތެއް ކަމުގައިކަން ފާހަގަކުރައްވައިފައެވެ.
މީގެއިތުރުން ޕީޕީއެމްގެ ރައީސް، ރައީސް ޔާމީން ޙައްޤުނޫން ސިޔާސީ ޙުކުމެއްގައި ޖަލުގައި ޤައިދުކޮށްގެން އެމަނިކުފާނުގެ އިންތިޚާބީ ޙައްޤު ސަރުކާރުން ނިގުޅައިގަނެގެން ކުރިމަތިކުރުވި ދަތި ދުވަސްތައް ވެގެން ދިޔައީ އެންމެ ބޮޑު ގޮން ޖެހުމަށް ކަމުގައިވެސް ޝިޔާމްގެ ޓުވީޓުގައި ވަނީ ފާހަގަކުރައްވައިފައެވެ.
ދާއިރާތަކުގެ ލޮބުވެތި ރައްޔިތުންގެ އިތުރުން ޕާޓީގެ ލީޑަރޝިޕް، ޕީޖީ ގްރޫޕް މެންބަރުން، ސެނެޓަރުން، ދާއިރާތަކުގެ ރައީސުން، ރަށްރަށުގެ ސްޓިއަރިންގ ކޮމިޓީތަކުން އަދި ޚާއްޞަކޮށް ޕާޓީގެ އާއްމު މެންބަރުންގެ އިތުރުން ރާއްޖޭގެ މީޑިޔާތަކުން ލިބުނީ އާދަޔާ ޚިލާފު ފުރިހަމަ އެއްބާރުލެއްވުމެކެވެ. ނަތީޖާއަކަށްވީ ﷲ ގެ ތަނަވަސް ރަޙުމަތުން 2023 ގެ ރިޔާސީ އިންތިޚާބު ދިވެހީންގެ ކެންޑިޑޭޓު ޑރ.މުޢިއްޒު ވަރަށް ތަނަވަސް އަޣުލަބިއްޔަތަކުން އެތައް ބައެއްގެ ލޯތްބާ އެހީތެރިކަމާއެކު ކާމިޔާބުކުރެއްވުމެވެ. އިންތިޚާބުގައި އެހީތެެރިވެ ދެއްވި ހުރިހާ ފަރާތްތަކަށް މިއަދުވެސް ހިތުގެ އެންމެ ފުންމިނުން އިޚުލާސްތެރިކަމާއެކު ޝުކުރު ދަންނަވަމެވެ.
މިނިސްޓަރ ޝިޔާމް
ހަމަ އެޔާއެކު މިނިސްޓަރ ޝިޔާމް ވިދާޅުވީ، އިންތިޚާބީ ރައީސެއްގެ ގޮތުގައި ރައީސް ޑރ. މުޢިއްޒު އޭރުގެ ސަރުކާރަށް ކުރެއްވި ފުރަތަމަ އިލްތިމާސަކީ ރައީސް ޔާމީން ކުޑަމިނުން ގެކޮޅަށް ބަދަލު ކޮށްދެއްވުން ކަމަށާއި ޖެހިގެން އައިދުވަހު ރައީސް ޔާމީން ގެކޮޅަށް ބަދަލުކުރެވުނު ކަމަށެވެ.
ހަމަ އެޔާއެކު ރައީސް ޑރ.މުޢިއްޒުގެ ސަރުކާރަކީ ރައްޔިތުންގެ ވަރަށް ބުރަ މަސައްކަތްޕުޅުތަކެއްގެ ފޮނި ނަތީޖާކަމަށާއި ސަރުކާރު ގެނެވުނީ ރައްޔިތުން 5 އަހަރު މަގުމަތީ ވަރަށް ބޮޑެތި ޤުރުބާނީތަކެއް ވެގެންކަން ފާހަގަކުރައްވައި މިނިސްޓަރ ވިދާޅުވީ ރައީސް ޑރ. މުޢިއްޒު އާއެކު ރައްޔިތުންގެ ވަރަށްގިނަ އުންމީދުތަކެއް އެބަހުރިކަމަށެވެ.
މީގެ އިތުރުން މިނިސްޓަރ ގެ ޓުވީޓުގައިވަނީ، އިހުނެކޭ އެއްގޮތައް ހުރިހާ ބޭފުޅުންގެ އެހީތެރިކަމާ އެއްބާރުލެއްވުމާ ހެޔޮ ދުޢާއަށް އެދިވަޑައިގެން ރައީސް ޑރ. މުއިއްޒުގެ ޒަޢާމަތަކީ ދިވެހީންނަށް ފަހި ފާގަތި ޒަޢާމަތެއް ކަމުގައި ލެއްވުން އެދި اللهގެ ހަޟުރަތުގައި ދުޢާދަންނަވާކަމުގައި ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
