އިސްރާއީލުން ޣއްޒާއަށް ދެމުން ގެންދާ ހަމަލާތައް 4 ދުވަހަށް ހުއްޓާލި މުއްދަތު އެއަށްވުރެވެސް އިތުރުކުރެވޭނެކަމުގެ ފެހި ސިގްނަލް ލިބިފައިވާކަމަށް މިސްރުން ބުނެފިއެވެ.

މިސްރުގެ ސްޓޭޓް އިންފޮމޭޝަން ސާވިސް (އެސްއައިއެސް) ގެ ވެރިޔާ ދިއާ ރަޝްވާން މިއަދު ވިދާޅުވީ ޣައްޒާގެ ހަނގުރާމަވަގުތީ ގޮތުން ހުއްޓާލި މުއްދަތު އެއް ދުވަސް ނުވަތަ ދެ ދުވަހަށް އިތުރުކޮށްފާނެ ހުރިހާ ފަރާތަކުން ވެސް ފެހު ސިގްނަލްތަކެއް ލިބިފައިވާ ކަމަށެވެ.

އެސްއައިއެސް އިން ނެރުނު ބަޔާނެއްގައި ބުނެފައި ވަނީ ހަނގުރާމަ ވަގުތީ ގޮތުން ހުއްޓާލުމުގެ މުއްދަތު ހަތަރު ދުވަހަށް ވުރެ އިތުރުކުރުމާ ގުޅޭ ގޮތުން އެއްބަސްވުމަކަށް އައުމަށް ހުރިހާ ފަރާތްތަކާ އެކު ފުޅާދާއިރާއެއްގައި މަޝްވަރާ ކުރަމުން އަންނަ ކަމަށާއި އޭގެ މާނައަކީ އެދުވަސްތަކުގެ ތެރޭގައި "ޣައްޒާގައި ބަންދުކޮށްފައިވާ އިތުރު މީހުންނާއި އިސްރާއީލުގެ ޖަލުތަކުގައި ތިބި ފަލަސްތީނުގެ ގައިދީން ދޫކޮށްލުން" ކަމަށެވެ.

މިސްރުގެ ސްޓޭޓް އިންފޮމޭޝަން ސާވިސް (އެސްއައިއެސް) ގެ ވެރިޔާ ދިއާ ރަޝްވާން--

ރަޝްވާން ވިދާޅުވި ގޮތުގައި ޣައްޒާގައި އަޅުވެތިކޮށްފައިވާ 13 މީހުންނާއި އިސްރާއީލުގެ ޖަލުތަކުގައި ބަންދުކޮށްފައިވާ ފަލަސްތީނުގެ 39 މީހުންގެ ލިސްޓެއް ލިބިފައިވާ ކަމަށާއި އެމީހުން ދޫކޮށްލަން އިސްރާއީލުން ނިންމާފައިވާކަމަށެވެ.

މީގެ އިތުރުން ރަޝްވާން ހާމަކުރެއްވި ގޮތުގައި ޣައްޒާގެ އުތުރަށް ދަތުރުކުރި އިންސާނީ އެހީ ހިފައިގެން ދިޔަ 50 އުޅަނދު ރައްކާތެރިކަމާއި އެކު މިއަދު ވަނީ ރަފާހު ބޯޑަރު ހުރަސްކޮށްފައެވެ.

 މިދިޔަ ބުދަ ދުވަހު އިސްރާއީލާއި ހަމާސް އިން ވަނީ މިސްރާއި ގަތަރާއި އެމެރިކާއިން ބައިވެރިވި ބައްދަލުވުމެއްގެ ތެރެއިން ޣައްޒާގައި ހިނގަމުންދާ ހަނގުރާަމަ 4 ދުވަހުގެ މުއްދަތަކަށް ހުއްޓާލުމުގެ އެއްބަސްވުމަކަށް އައިސްފަ އެވެ.

ހަނގުރާމަ ހުއްޓާލުމުގެ އެއްބަސްވުމުގައި ހިމެނެނީ ޣައްޒާގައި ހިނގަމުންދާ ހުރިހާ ޢުދުވާނުތަކެއް ހުއްޓުވުމާއި، ފަލަސްތީނުގެ 2.4 މިލިއަން ރައްޔިތުންނަށް އިންސާނީ އެހީ ފޯރުކޮށްދިނުމެވެ.

ކާބޯތަކެއްޗާއި، ފެނާއި، ސިއްހީ ސާމާނާއި، ތެޔޮ ހިފައިގެން ޖުމްލަ 200 އެހީ އުޅަނދު ހުކުރު ދުވަހު ވަނީ މިސްރާއި ޣައްޒާއާ ދެމެދު އޮންނަ ރަފާހު ބޯޑަރު ހުރަސްކޮށް ޣައްޒާއަށް ވަދެފަ އެވެ.