ކުރީ ސަރުކާރުން ރާވާފައިވާ ގޮތަށް ތިލަފުށި ހިއްކުމުގެ މަޝްރޫއު ކުރިއަށް ގެންގޮސްފިނަމަ އެ ސަރަހައްދުގައި ކުރިއަށްދާ ގިނަ ވިޔަފާރި ތަކަށް ގެއްލުންވާނެތީ، ވިޔަފާރިވެރިންގެ ފަރާތުން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ޕެޓިޝަނެއް ހުށައަޅައިފިއެވެ.
ވިޔަފާރިވެރިން ހުށައެޅި ޕެޓިޝަންގައި ބުނެފައި ވަނީ ތިލަފުށީގެ ފަޅުތެރެއިން ސަރަހައްދެއް ހިއްކުމަށް 18 ޑިސެންބަރުގައި ހިއްކުމަށް ހަމަޖެހިފައިވާތީ، އެސަރަހައްދުގައި ހުރި އުނޅަދުތައް 7 ދުވަހުގެ ތެރޭގައި ނެގުމަށް އަންގާފައިވާކަމަށެވެ.
ސަރުކާރުން މި މަޝްރޫއު ކުރިއަށް ގެންދިއުމަށް ނިންމަވާފައިވާ ސަރަހައްދަކީ ކުދި އެތައް ވިޔަފާރިއެއްގެ ހަރަކާތްތައް ހިނގަމުން އަންނަ ސަރަހައްދެއްކަމަށާއި، އެ ވިޔަފާރިތައް ހިންގުމަށް އެ ސަރަހައްދުން ބިން ހޯދީވެސް އެ ސަރަހައްދުގެ މޫދާއި ފަޅު ބޭނުންކޮށްގެން ރާއްޖޭގެ އިޤުތިޞާދަށް ފައިދާވާ މަސައްކަތްތަކެއް ކުރުމުގެ މަގްސަދުގައިކަމަށް ވެސް އެ ޕެޓިޝަނުގައި ބުނެފައިވެއެވެ.
އެގޮތުން އެ ސަރަހައްދުގައި ކުރިއަށް ދާ ވިޔަފާރިތަކުގެ ތެރޭގައި ލޭންޑިން ކްރާފްޓު ބަނުމާއި، އުޅަނދުފަހަރު ބޭނުންކޮށްގެން އެއް ތަނުން އަނެއް ތަނަށް މުދާ އުފުލުމާއި، ބަނދަރު ހެދުމާއި، އެއާޕޯޓު ތަރައްޤީކުރުމާއި، ބިން ހިއްކުމާއި، ރިވެޓުމެންޓު ޖެހުމާއި، ގޮނޑުދޮށް ހިމާޔަތްކުރުމުގެ މަޝްރޫޢުތައް ހިންގުން ފަދަ މަސައްކަތްތައްކުރާ ވިޔަފާރިތައް ހިމެނޭއިރު، އެ ސަރަހައްދު ސަރުކާރުން ހިއްކައިފިނަމަ އެ ހުރިހާ ވިޔަފާރި ތަކެއްވެސް ހުއްޓޭނެ ކަމުގައި އެ އެ ޕެޓިޝަނުގައި ބުނެފައިވެއެވެ.
ތިލަފުށީން ސަރުކާރުން ހިއްކުމަށް ކަނޑައަޅާފައިވާ ސަރަހައްދަކީ ކުންފުނިތަކުން ވަރަށް ބުރަ މަސައްކަތް ކޮށްގެން ވަރަށް އުދަގުލުން އަމިއްލައަށް ހިއްކި ސަރަހައްދެއްކަން ވިޔަފާރިވެރިން ވަނީ ފާހަގަ ކޮށްފައެވެ.އެެހެންކަމުން އެ ސަރަހައްދުގެ މޫދު ހިއްކައިފިނަމަ މިހާރު ހިނގަމުންދާ ވިޔަފާރީގެ މަސައްކަތްތައް އެކީ ހުއްޓި، އެ ވިޔަފާރިތަކަށް ބޮޑެތި ގެއްލުންތަކާއި ކުރިމަތިލާންޖެހޭނެ ކަމުގެ ކަންބޮޑުވުން އޮތްކަމަށް އެ ވިޔަފާރިވެރިން ބުނެއެވެ.
މިފަދަ ބޮޑެތި ގެއްލުން އެސަރަހައްދުގައި ކުރިއަށްދާ ވިޔަފާރި ތަކަށް ލިބެނޭތީ އެ މަސައްކަތް ހުއްޓުވައިދެއްވަން ރައީސް ޑރ.މުޢިއްޒުގެ އަރިހުން އެ ވިޔަފާރިވެރިން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
