ފަލަސްޠީނުގެ ޣައްޒާއަށް އިޒްރާއިލުން ދެމުންދިޔަ ހަމަލާތައް 4 ދުވަހަށް މެދު ކަނޑަލައިފައި ވީނަމަވެސް، ހުޅަނގުއައްސޭރީގައި އަދިވެސް އިޒްރާއިލުން ދަނީ މީހުން ޝަހީދުކުރަމުންނެވެ.

އެގޮތުން ރޭވެސް ހުޅަނގު އައްސޭރީގައި ހިންގި މިލިޓަރީ ރެއިޑްގައި 6 މީހަކު ޝަހީދުކޮށްލައިފައިވެއެވެ.

އަލްޖަޒީރާގައި ބުނެފައިވަނީ އިޒްރާއިލް ސިފައިން ހުޅަނގުއައްސޭރީގެ ޖެނީންގައި ހިންގި މިލިޓަރީ ރެއިޑެއްގައި ފަލަސްޠީނުގެ ފަސް މީހަކު ޝަހީދު ކޮށްލައިފައިވާ ކަމަށެވެ. އެރެއިޑްގައި 18 މީހަކު ޒަޚަމްވެފައިވާ ކަމަށެވެ. އިޒްރާއިލުން ޖެނީންގައި ހިންގި މިލިޓަރީ ރެއިޑް 12 ގަޑިއިރަށް ދެމިގެން ދިޔަ ކަމަށާއި، ޒަޚަމްވި މީހުންގެ ތެރެއިން ދެމީހެއްގެ ޙާލަތު ވަރަށް ގޯސް ކަމަށް އަލްޖަޒީރާގައި ބުނެފައިވެއެވެ.

މީގެއިތުރުން ނާބުލުސްގެ ދެކުނުގައި އޮންނަ ޔުތްމާ އަވަށާއި، ޖެނީންގެ ދެކުނުގައި އޮންނަ އަލްޤިބްތިއްޔާ އާއި އަލްބިއްރާ އަވަށުގައި ހިންގި މިލިޓަރީ ރެއިޑްގައި ތިން މީހަކު ޝަހީދު ކޮށްލައިފައިވެއެވެ.

ފަލަސްޠީނުގެ ރެޑް ކްރެސެންޓުން އަލްޖަޒީރާއަށް ބުނެފައިވަނީ އިޒްރާއިލް ސިފައިން، ފަލަސްޠީނުގެ ޒުވާނެއް ކަމަށްވާ މަޙްމޫދް އަބޫ ހާއިޖާ އޭނާގެ ގޭގައި ޒަޚަމްވެފައި އޮތުމުން ހޮޕިޓަލަށް ގެންދިޔުމަށް ދިޔަ ރެޑްކްރެސެންޓުގެ އެމްބިޔުލާންސަށް ހުރަސް އަޅައި އެސަރަހައްދަށް ވަނުން ގަސްދުގައި ލަސްކުރުވާފައިވާ ކަމަށެވެ.

އިޒްރާއިލް ސިފައިން ހުރަސްއެޅުމުގެ ސަބަބުން އެޒުވާނާ ގެެއިން ނެރެވިފައިވަނީ އެޒުވާނާ ޝަހިދުވި ފަހުން ކަމަށް އަލްޖަޒީރާގައި ބުނެފައިވެއެވެ.

މީގެއިތުރުން އަލްޖަޒީރާގައި ބުނެފައިވަނީ ޖެނީންގެ މައި ދެހޮސްޕިޓަލް ވަނީ އިޒްރާއިލް ސިފައިން ބަރުހަތިޔާރާއި އެކު އައިސް ވަށަލައި ހިޞާރުކޮށްފައި ކަމަށެވެ.