މާލެ ސަރަހައްދުގައި ފަޅު ފަޅުން ގޯތު ދޫކުރެވޭ ނަމަ، ރާއްޖޭގެ އެހެން ރަށް ރަށުގައިވެސް ފަޅުން ގޯތި ދުކުރެވޭނެ ކަމަށް ގެދޮރުވެރިކަމާއި، ބިމާއި، އުމްރާނީ ތަރައްގީއާ ބެހޭ ވުޒާރާގެ ވަޒީރު ޑރ. ޢަލީ ހައިދަރު އަޙުމަދު ވިދާޅުވެއްޖެއެވެ. 

ނިމިދިޔަ ސަރުކާރުން ގެދޮރުވެރިޔާސްކީމްގެ ދަށުން ދޫކޮށްފައިވާ ފްލެޓްތަކާ ގުޅިގެން، މި ސަރުކާރުން ނިންމާފައިވާ ކަންކަމާ ގުޅޭގޮތުން މަޢުލޫމާތު ސާފުކުރުމަށް، ހައުސިންގް މިނިސްޓްރީގެ ބޭފުޅުން ހާޒިރުކޮށްގެން މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން މިއަދު ބޭއްވި ބައްދަލުވުމުގައި އުނގޫފާރު ދާއިރާގެ މުޙައްމަދު ވަޙީދު (ވައްޑެ) ވަނީ، ކުރީގެ ރައީސް، އިބްރާޙީމް މުހައްމަދު ޞާލިހު ގެ ސަރުކާރުން، މާލެ ސަރަހައްދުން ގޯތި ދޫކުރި އިރު، ފަޅުން ގޯތި ދީފައިވާކަން ފާހަގަކުރައްވައި ، ރާއްޖޭގެ އެހެން ސަރަހައްދު ތަކުގައިވެސް އެހެން އެކަން ނުކުރެވެންވީ ކީއްވެތޯ ސުވާލު ކުރައްވާފައެވެ. 

މިއަދުގެ ކޮމިޓީ ބައްދަލުވުމުގެ ތެރެއިން--ފޮޓޯ/މަޖިލިސް 

ވައްޑެގެ އެ ސުވާލަށް ޖަވާބު ދެއްވަމުން ޑރ. ހައިދަރު ވިދާޅުވީ، ފަޅުން ގޯތި ދެވޭނެތޯ ނުވަތަ ނޫންތޯ، އެއީ ގާނޫނީ ގޮތުން ސުވާލު އުފެދިފައިވާ ކަމެއް ކަމަށެވެ. އަދި، ޞާލިހުގެ ސަރުކާރުން ފަޅުން ގޯތި ދޫކޮށްފައިވަނީ ގަވާއިދު އިސްލާހުކޮށްގެން ފަޅުން ގޯތި ދެވޭގޮތް ހަދައިގެން ކަމަށެވެ. 

އެހެންކަމުން، މާލެ ސަރަހައްދުން އެފަދައިން ގޯތި ދެވޭ ނަމަ އެހެން ސަރަހުންވެސް ދެވޭނެ ކަމަށް މިނިސްޓަރު ވިދާޅުވި އެވެ. 

މާލެ ސަރަހައްދަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް މާލޭ ރަށްވެހިންނަށް ގޯތި ދޫކުރުމަށް ކުރީގެ ރައީސް ޞާލިހުގެ ސަރުކާރުން، ވަނީ ގުޅީފަޅުން މަދުވެގެން 2,000 ގޯތި އަދި ގިރާވަރު ފަޅު ހިއްކައި, އެބިމުންވެސް މަދުވެގެން 2,000 ގޯތި އަދި އުތުރު ތިލަފަޅުންވެސް ގޯތި ދެއްވާނެ ކަމަށް ވަޢުދުވެ ވަޑައިގެން، އެ ސަރަހައްދު ތަކުގެ ފަޅު ތަކުން ގޯތި ލިބިފައިވާ ކަމުގެ ލިޔުންވެސް ހަވާލު ކޮށްފައެވެ.