ހަތަރު ދުވަހުގެ މުއްދަތަކަށް ހުއްޓާލާފައި އޮތް ގަތުލުޢާއްމު، ދާއިމީ ކޮށް ހުއްޓާލުމަށް އދ އިން ގޮވާލައިފިއެވެ.
އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވިދާޅުވީ ހަނގުރާމަ އިތުރަށް ކުރިއަށް ނުގެންގޮސް މިހާރުން މިހާރަށް ހުއްޓާލަން ޖެހޭ ކަމަށާއި އިސްރާއީލުގެ ގަތުލު ޢާއްމު ހަތަރު ދުވަހަށް މެދުކަނޑާލުމަށް އެއްބަސްވުމުގެ ސަބަބުން ޣައްޒާއަށް އެހީ ފޯރު ކޮށްދިނުމަށް މަގު ފަހިވި ކަމަށެވެ. މި އެހީ ތަކަކީ އެތައް ހަފްތާއެއް ވަންދެން އޭގެ ބޭނުން ޣައްޒާއަށް ޖެހިފައިވާ އެހީ ތަކެއް ކަމަވެސް އެންޓޯނިއޯ ވިދާޅުވިއެވެ.
އޭނާ ވިދާޅުވި ގޮތުގައި އެހީގެ ގޮތުގައި ފޯރުކޮށްދެވުނު ތަކެތިން އޭގެ ބޭނުން ޖެހިފައިވާ 1.7 މިލިއަން މީހުނަށް ނުވާނެ ކަމަށާއި މިކަމުގެ ސަބަބުން އެގައުމުގެ ރައްޔިތުންގެ ހާަލަތު ދާނީ ދުވަހެއް ދުވަހަކަށް ގޯސްވަމުންކަމަށެވެ.
"އެ އެއްބަސްވުމަށް މެދުވެރިވި މަޝްވަރާ ކުރިއަށް ގެންދަން ޖެހޭ. ޣައްޒާ އާއި އިސްރާއީލާއި ފުޅާ ސަރަހައްދުގެ ރައްޔިތުންނަށްޓަކައިވެސް ކުރިއަށްމިދާ އިންސާނީ ހަނގުރާމަ ހުއްޓާލަންޖެހޭ"
އެންޓޯނިއޯ ވިދާޅުވިއެވެ.
ހަނގުރާމަ ހަތަރު ދުވަހަށް މެދުކަނޑާލުމުގެ އެއްބަސްވުން ޤާއިމް ކުރުމަށް އެންމެ އިންކޮށް އުޅުނު ތިން ގައުމު ކަމުގައިވާ ޤަތަރާއި އެމެރިކާ އާއި މިސްރަށް އޭނާ ވަނީ ތައުރީފްވެސް ކޮށްފައެވެ.
މިދިޔަ އޮކްޓޫބާރު މަހުގެ ހަތް ވަނަ ދުވަހު ޣައްޒާއަށް އަނިޔާވެރި އިސްރާއީލު ސިފައިން ދޭން ފެށި ހަމަލާތަކުގައި މިހާތަނަށް 14،854 ފަލަސްތީން ރައްޔިތެއް ވަނީ ޝަހީދުވެފައެވެ. އަދި މިހަމަލާތަކުގައި އެތައް ބަޔަކު ވަނީ ޒަހަމްވެފައި އެވެ.
Advertisement
This content is created and paid for by advertisers and does not involve Voice Journalists
