މަދަނީ މިންގަނޑުން ބައްޕަ ސާބިތުނުވި މައްސަލަ ބަންޑާރަ ނައިބުގެ އޮފީހުން އަނބުރާ ގެންގޮސްފި އެވެ.

މި މައްސަލައަކީ ދައުލަތުގެ ބެލުމުގެ ދަށުގައި ހުރި ކުއްޖަކަށް ދިވެހި ރައްޔިތުކަން ދިނުމަށްޓަކައި، މަދަނީ މިންގަނޑުން އެ ކުއްޖާގެ ބައްޕަ ސާބިތު ނުކުރެވޭނެކަމަށް ހައިކޯޓުން ނިންމި މައްސަލައެކެވެ.

އެމައްސަލައިގެ ޙުކުމް ސުޕްރީމް ކޯޓުގައި އޭޖީ އޮފީހުން ކުރިން އިސްތިއުނާފު ކޮށްފައިވީ ނަމަވެސް މިހާރު ވަނީ އެ މައްސަލަ އަނބުރާ ގެންގޮސްފަ އެވެ.

މި މައްސަލައާއި ގުޅޭ ގޮތުން ބަޔާނެއް އާންމުކޮށް ބަންޑާރަ ނައިބުގެ އޮފީހުން ބުނެފައިވަނީ އެ މައްސަލަ އަލުން ބަލައި މުރާޖަޢާ ކުރުމަށް ފަހު ކޯޓުގައި އިސްތިއުނާފު މައްސަލަ އިތުރަށް ކުރިޔަށް ގެންދިއުމަށް ނުފެންނާތީ މައްސަލަ އަނބުރާ ގެންދިއުމަށް ނިންމާފައިވާ ކަމަށެވެ.

މިމައްސަލައިގައި ހިމެނޭ ކުއްޖާއަކީ އިންޑޮނޭޝިއާގެ އަންހެނަކާއި ދިވެހި ފިރިހެނެއްގެ ދަރިއެކެވެ.

އިންޑޮނޭޝިއާގެ އެއަންހެންމީހާއާއި ދިވެހި ފިރިހެން މީހާ ކައިވެނި ކޮށްފައިވަނީ 19 އޭޕްރިލް 2009 ގައި ސްރީލަންކާގަ އެވެ. ކައިވެނި ކުރިތާ ގާތްގަނޑަކަށް 5 މަސް ވެސް ނުވަނީސް އެ ދެމީހުންނަށް އަންހެން ދަރިއަކު ވަނީ ލިބިފައެވެ. އެކުއްޖާ އުފަންވެފައިވަނީ 2009 ވަނަ އަހަރުގެ ސެޕްޓެމްބަރު މަހުގެ 9 ވަނަ ދުވަހު އައިޖީއެމްއެޗް ހޮސްޕިޓަލްގަ އެވެ.

ކުއްޖާ އުފަންވިއިރު، އެދެމީހުންގެ ކައިވެނި ރާއްޖޭގައި ރެޖިސްޓާ ކޮށްފަ އެއްނުވެއެވެ. އެ ދެމީހުން ކައިވެނި ރެޖިސްޓާ ކުރެވިފައިވަނީ 2008 ވަނަ އަހަރުގެ ޖަނަވަރީ މަހުގެ 5 ވަނަ ދުވަހު ގައެވެ. ކުއްޖާގެ ވަގުތީ އުފަންދުވަހުގެ ސެޓްފިކެޓެއް ހެއްދިފައިވަނީ 2010 ވަނަ އަހަރުގެ މެއި މަހުގެ 30 ވަނަދުވަހު އެވެ.

ކުއްޖާގެ މަންމަ ކަމަށްވާ އިންޑޮނޭޝިއާގެ އެ އަންހެންމީހާ ކުއްޖާ ވިހެއުމަށްފަހު، ކުޑަ ދުވަސްކޮޅެއްގެ ތެރޭގައ،ި ޕާސްޕޯޓު އާކުރުމަށް ކަމަށްބުނެ ކުއްޖާ އާ ވަކިން ދިވެހިރާއްޖެއިން ފުރައިގެން ދިޔުމަށްފަހު އެނބުރި އައިސްފައިނުވެއެވެ.

ކުއްޖާގެ މަންމަ ކުއްޖާ ދޫކޮށް ފުރައިގެން ދިޔަފަހުން ކުއްޖާ ބެލެހެއްޓުމުގެ ޒިންމާ އަދާކުރަމުންދިޔައީ ކުއްޖާގެ ބައްޕަ ފަރާތު މާމާއެެވެ.

އެއަށްފަހު، ކުއްޖާ ބެލެން ނެތް ކަމަށް ބުނެ ޖެންޑާ މިނިސްޓްރީއަށް ހުށައެޅުނު ޝަކުވާއާއިއެކު، އެކުއްޖާއާއި ބެހޭ މައުލޫމާތު އެމިނިސްޓްރީއިން ވަނީ ސާފުކޮށްފައެވެ.

އެމިނިސްޓްރީ އިން ބެލިބެލުމުން ކުއްޖާ ވިހެއި އިރު އެދެމީހުންގެ ކައިވެނި ރެޖިސްޓާ ނުކޮށް އޮތުމުން، ކުއްޖާ ބަލަހައްޓަމުން ދިޔަ ޢާއިލާގެ އެއްވެސް ފަރާތަކާއި ކުއްޖާއާ ޝަރުޢީ އަދި ޤާނޫނީ އެއްވެސް ގުޅުމެއް ނެތް ކަމަށް އެ މިނިސްޓްރީއަށް ވަނީ އެނގިފައެވެ.

އެކަމާއިގުޅިގެން ކުއްޖާ ދައުލަތުގެ ބެލުމުގެ ދަށަށް ގެނައުމަށްފަހު, އެ ކުއްޖާއަކީ ދިވެހި ރައްޔިތެއްކަމަށް ކަނޑައަޅައި ދިނުމަށާއ،ި ދިވެހިރައްޔިތެއްގެ ހައިސިއްޔަތުން ދިވެހިރާއްޖޭގެ ޤާނޫނުއަސާސީ އާއި ޤާނޫނުތަކާއި ޤަވާޢިދުތަކުގެ ދަށުން ލިބެންޖެހޭ އެންމެހައި ޙައްޤުތައް ކުއްޖާއަށް ލިބިގެންވާކަމަށް ކަނޑައަޅައި ދިނުމަށް އެދި ދައުލަތުން އެންމެ ފުރަތަމަ މައްސަލަ ހުށަހެޅީ ސިވިލް ކޯޓަށެވެ.

ނަމަވެސް ކުއްޖާގެ ނަސަބު ސާބިތު ކުރުމާއި ގުޅޭ މައްސަލައެއް ފެމިލީ ކޯޓަށް ހުށައެޅިފައިވުމާއި، އެ މައްސަލަ ނުނިމެނީސް ސިވިލް ކޯޓަށް ހުށަހަޅާފައިވާ މައްސަލަ ކުރިއަށް ނުގެންދެވޭނެ ކަމަށް މައްސަލައިގައި ޝަރީޢަތް ނިމުނު ގޮތުގެ ރިޕޯޓުގައިވެއެވެ.

ސިވިލް ކޯޓުން އެ ނިންމުން ނިންމި އިރު، ފެމިލީ ކޯޓަށް ހުށަހެޅި ނަސަބު ސާބިތުކުރުމުގެ މައްސަލަ ހުށަހަޅަންޖެހޭ ފޯމު ހުށަހަޅާފައި ނުވުމާއި އެފަދަ މައްސަލައެއް ހުށަހަޅާއިރު ފުރިހަމާވާންޖެހޭ ކަމަށް އާއިލާއާ ބެހޭ ޤާނޫނުގައި ބުނާ ޝަރުތުތައް ފުރިހަމަ ނުވާތީ އަދި މަދަނީ މިންގަނޑުން ބައްޕަ ސާބިތުކުރުމަކީ ފެމިލީ ކޯޓުން ބަލަމުންދާ މައްސަލަތަކުގެ ތެރޭގައި ހިމެނޭ ބާވަތުގެ މައްސަލައަކަށް ނުވާތީ، އެ ކޯޓުން އެ މައްސަލަ ނުބެލޭނެ ކަމަށް ވަނީ ނިންމާފައެވެ.

ފެމިލީ ކޯޓުގެ ނިންމުން ދައުލަތުން ހައި ކޯޓުގައި އިސްތިއުނާފްކުރީ މިސަބަބާއި ހުރެއެވެ.

ހައި ކޯޓުގައި މިމައްސަލަ ބެއްލެވީ، ފަނޑިޔާރު މުހައްމަދު ސަލީމް، ފަނޑިޔާރު މުހައްމަދު ނިޔާޒް އަދި ފަނޑިޔާރު ހުޒައިފާ މުހައްމަދު އެވެ. މައްސަލައިގެ ރިޔާސަތު ބެލެހެއްޓެވީ ފަނޑިޔާރު ނިޔާޒެވެ.

މި މައްސަލައިގައި ހައި ކޯޓުން ބުނީ މި ދެ މީހުން ސައްހަ ކައިވެންޏެއް ކުރި ކަމަށް ބެލި ނަމަވެސް ކުއްޖާ އުފަންވެފައިވަނީ ކައިވެނިކުރި ކަމަށް ބުނާ ތާރީހުން ފެށިގެން ހަތަރު މަހާއި 20 ދުވަސް ފަހުން ކަމަށެވެ.

އެކަމަކު ވިހޭއިރު ބަނޑަށް 37 ހަފްތާ ކަމަށް ޖަހައި އަދި ނުވަ މަސް ކަމަށް ލިޔެފައި އެތަން ކަނޑާލާފައި ވެސް އެ ފޯމުގައި އޮތް ކަމަށް ޙުކުމުގައި ބުނެފައިވެއެވެ.

މީގެއިތުރުން ”ޝަރުޢީ ބައްޕަ" އާއި "ޤާނޫނީ ބައްޕަ" އަކީ ދިވެހިންގެ އަޤީދާއާއި ދުރު ކަމެއް ކަމަށް މައްސަލަ ބެއްލެވި ފަނޑިޔާރުން ވަނީ ވިދާޅުވެފައެވެ. 

މައްސަލަ ބެއްލެވި ފަނޑިޔާރުން އިއްތިފާޤްވެ ވަޑައިގެންފައިވަނީ ފެމިލީ ކޯޓުން ނިންމި ނިންމުމަކީ އެންމެ ރަނގަޅު ނިންމުމެއް ކަމަށެވެ.