ރައީސް އިބްރާހިމް މުހައްމަދު ޞާލިހުގެ ސަރުކާރުން ހިންގާފައިވާ ބޯހިޔާވަހިކަމުގެ ސްކީމުތައް އަލުން ރިވިއުކޮށް، އެއަށް ބަދަލުގެނައުމުގެ މަސައްކަތް މި ސަރުކާރުން ކުރާނަމަ، ހީނުކުރާވަރުގެ ގެއްލުންތަކެއް ސަރުކާރަށް ލިބިގެން ހިނގައިދާނެ ކަމަށް ވިދާޅުވެ ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރު ހަސަން ޒަރީރު އިންޒާރު ދެއްވައިފި އެވެ.
ޒަރީރު މިފަދައިން ގޮވާލައްވާފައި ވަނީ ރައްޔިތުންގެ މަޖިލީހުގެ މި އަހަރުގެ 3 ވަނަ ދައުރުގެ 27 ވަނަ ޖަލްސާގައި، އަންނަ އަހަރަށް ލަފާކޮށް ސަރުކާރުން ހުށައަޅާފައިވާ ދައުލަތުގެ ބަޖެޓަށް ބަހުސްކުރައްވަމުން ނެވެ.
ޒަރީރު ވިދާޅުވީ ނިމިދިޔަ ރިޔާސީ އިންތިޚާބުގައި ރައީސުލްޖުމްހޫރިއްޔާ ރައްޔިތުންނަށް ދެއްވި އެންމެ ބޮޑު ޔަގީންކަމަކީ އެއްވެސް ރައްޔިތަކަށް ސަރުކާރުން ދިން ގޯއްޗެއް ނުވަތަ ފްލެޓެއް އަތުނުލައްވާނެ ކަމުގެ ޔަގީންކަން ކަމަށެވެ.
އަޑުފުޅަށް ބާރުލައްވާފައި، ތަކުރާރުކޮށް އެ ވާހަކަތަށް އެހެން ވިދާޅުވި ނަމަވެސް، ވެރިކަމުގެ މަސްއޫލިއްޔަތުތަކާއި ހަވާލުވެވަޑައިގަތުމަށް ފަހު އެމަނިކުފާނުގެ ނިޔަތް ވަރަށް ބޮޑަށް ޚަރާބުވަމުން އަންނަ މަންޒަރު ފެނިވަޑައިގަންނަވާ ކަމަށް ޒަރީރު ވިދާޅުވި އެވެ.
"އަދި މި އުޅެނީ ރަނގަޅަށް ހަފްތާއެއް ވެސް ނުވެގެން. އެންމެ ފުރަތަމަ އެ ވިދާޅުވީ 50 އެތައް އަހަރެއްގެ ތެރޭގައި ފުރަތަމަ ފަހަރަށް މާލޭގެ ރައްޔިތުންނަށް ދިން ގޯތިތައް، ލޮކޭޝަން ބަދަލުވެދާނެއޭ، އެ ވެދާނެ މާލެ އަތޮޅުން ބޭރަށް ވެސް، ދެން އެ ވިދާޅުވީ ފްލެޓުތައް ރިވިއުކޮށްފާނަމޭ، ރިވިއުކުރާއިރު، ލިސްޓުން އެ ބޭފުޅުން ބޭނުންނުވާ އެންމެން އުނިވެސް ވެދާނެ"
މަތިވެރި ދާއިރާގެ މެމްބަރު ޒަރީރު
ބޯހިޔާވަހިކަމުގެ މަޝްރޫއުތައް ހިންގެވުމަށް ރައީސުލްޖުމްހޫރިއްޔާ ޑރ މުއިއްޒުގެ ސަރުކާރުގެ ވިސްނުން ހުރި ގޮތަށް ބަލާއިރު، އިޚްލާސްތެރި ނިޔަތެއްގައި އެކަން ކުރައްވަން އުޅުއްވާކަން ފާހަގަނުކުރެވޭ ކަމަށް ޒަރީރު ވިދާޅުވި އެވެ.
އެގޮތުން ޑރ މުއިއްޒުގެ ސަރުކާރުގައި ބޯހިޔާވަހިކަމަށް ހިންގަވާނެ އެންމެ ބޮޑު މަޝްރޫއުގެ ގޮތުގައި އިއުލާނުކުރައްވާފައިވާ ފުށިދިއްގަރު ފަޅު މަޝްރޫއަށް ޒަރީރު ވަނީ ފާޑުވިދާޅުވެފަ އެވެ.
ޒަރީރު ވިދާޅުވީ، ނިމިގެން ދިޔަ ސަރުކާރުން މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް މާލެ ސަރަހައްދުން ބިން ހިއްކުމުގެ މަޝްރޫއުތައް ފައްޓަވާފައިވާ ކަމަށެވެ.
އެގޮތުން ގުޅިފަޅާއި ގިރާވަރު ފަޅު ހިއްކައިގެން، މާލެ ސަރަހައްދުގައި ދިރިއުޅޭ ރައްޔިތުންގެ ބޯހިޔާވަހިކަން ކަށަވަރުކޮށްދިނުމަށް ގޯއްޗާއި ފްލެޓު ދޫކުރުމުގެ މަޝްރޫއުތަކެއް ފައްޓަވާފައިވާކަން ޒަރީރު ފާހަގަކުރެއްވި އެވެ.
އެއާއެކު އޭނާ ވަނީ އެ މަޝްރޫއުތައް އެ ގޮތަށް ހުއްޓާ، ރައްޔިތުންގެ ބޯހިޔާވަހިކަން ކަށަވަރުކޮށްދޭނެކަމަށް ބުނެ އަލުން ބަލުން އަގުބޮޑުކޮށް ބިން ހައްކަން ފެށުމުގެ ބޭނުމެއް ނެތް ކަމަށެވެ.
އޭގެ ބަދަލުގައި ސަރުކާރުގެ ހެޔޮ ނިޔަތެއް އޮތް ނަމަ ހިއްކާފައިވާ ބިންތަކުގައި ބޯހިޔާވަހިކަމުގެ މަޝްރޫއުތައް ކުރިއަށް ގެންދެވުން ކީއްތޯ ޒަރީރު އެއްސެވި އެވެ.
އެއާއެކު އޭނާ ވަނީ ކުރީ ސަރުކާރުން ދޫކޮށްފައި ހުރި ގޯއްޗާއި ފްލެޓުތަކަށް އިތުރު ބަދަލުތައް ނުގެނައުމަށް ސަރުކާރަށް ގޮވާލާފަ އެވެ. އަދި އެ މަޝްރޫއުތައް ރިވިއުކުރަން މަސައްކަތްކޮށްފި ނަމަ އޭގެ ސަރުކާރަށް ގެއްލުމެއް ވެދާނެކަމުގެ އިންޒާރު ވެސް ޒަރީރު ދެއްވާފައި ވެއެވެ.
"އަޅުގަނޑު ޑރ މުއިއްޒަށް ގޮވާލަން! މަނިކުފާނޭ ތިޔަހެން ނަހައްދަވާށޭ! ދިވެހިރައްޔިތުންނަށް.. ޚާއްސަކޮށް މާލޭ ރައްޔިތުންނަށް ދީފައި މިވާ 4000 ފްލެޓާއި އަދި ދީފައި މިވާ ގޯއްޗާއި، މި ތަންތަނާއި ނުބެހޭށޭ! އަތުނުލާށޭ! އެ ތަނަށް އަތްލާން އުޅެގެން ވާނެ ގޮތަކީ އަތް ފިހޭ ގޮތް ވާނީ"
މަތިވެރި ދާއިރާގެ މެމްބަރު ޒަރީރު
ގެދޮރުވެރިޔާ ސްކީމުގެ ދަށުން ރައީސް އިބްރާހިމް މުހައްމަދު ޞާލިހުގެ ދައުރުގެ ފަހުކޮޅުގައި ބަހާލާފައިވާ 4000 ފްލެޓާއި ގުޅޭ ގިނަ ޝަކުވާތަކެއް ވަނީ އެންޓިކޮރަޕްޝަން ކޮމިޝަނަށް ހުށައަޅާފަ އެވެ.
އެ ސްކީމުގެ ދަށުން ފްލެޓް ލިބޭނެ މީހުން ކަނޑައަޅާފައިވަނީ އުސޫލުން ބޭރުން ސަރުކާރުން ބޭނުންވާ ވަކި ގޮތަކަށް ކަމަށް ބުނެ، ސަރުކާރު ބަދަލުވެ ކުރިއަށް ދިޔަ އިންތިގާލީ މަރުހަލާގައި އާންމު ރައްޔިތުން ވަނީ ބޯހިޔާވަހިކަމުގެ ކަންކަން އޭރު ބަލަހައްޓަމުން ދިޔަ ޕްލޭނިން މިނިސްޓްރީގެ ތެރެއަށް ވަދެ އިހުތިޖާޖު ވެސް ކޮށްފަ އެވެ.
އޭގެ އިތުރުން ކުރީ ސަރުކާރުން އިންތިޚާބުތެރޭގައި އުސޫލުން ބޭރުން ނެރުނު އެ ލިސްޓު ބާތިލުކޮށް، ޕޮއިންޓުދޭ އުސޫލު ކަނޑައަޅާ، ހަމަހަމަ ކަމާއި އިންސާފުވެރިކަމާއެކު ފްލެޓު ލިބޭ ފަރާތްތައް ހޮވުމަށް އާންމު ރައްޔިތުން ވަނީ ރައީސުލްޖުމްހޫރިއްޔާ ޑރ މުއިއްޒުގެ ސަރުކާރަށް ގޮވާލާފަ އެވެ.
Advertisement
This content is created and paid for by advertisers and does not involve Voice Journalists
