ލިޔުމުން ޖަވާބު ހޯދުމަށް އެދި ކުރީގެ އިސްލާމިކް މިނިސްޓަރު ޑރ އަހުމަދު ޒާހިރަށް މިދިޔަ އަހަރު ފޮނުއްވި ސުވާލުތަކުގެ ޖަވާބުތައް މިއަދުގެ މަޖިލީހުގެ ޖަލްސާގައި އިއްވުމުން ސުވާލު ހުށަހެޅުއްވި މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ނުރުހުން ފާޅުކުރައްވައިފިއެވެ.
ބޮންޑޭ ވަނީ، ލިޔުމުން ޖަވާބު ފޮނުއްވުމަށް އެދި ޑރ. ޒާހިރަށް ޖުމުލަ 10 ސުވާލު ހުށަހަޅުއްވާފައެވެ.
އެ ސުވާލު ތަކުގެ ޖަވާބު މިއަދުގެ ޖަލްސާގައި އިއްވުމުގެ ކުރިން މަޖިލީހުގެ ރައީސް މުހައްމަދު އަސްލަމް ވަނީ އެ ސުވާލު ތަކަކީ ކުރީ ސަރުކާރުގެ ވަޒީރުންނާއި ކުރެވުނު ސުވާލުތަކެއް ކަމަށާށ އެ ސުވާލު ތަކުގެ ޖަވާބުވެސް ކުރީގެ ވަޒީރުން މަޖިލީހަށް ފޮނުއްވާފައި ހުރިކަން ފާހަގަކުރައްވާފައެވެ.
އެ ސުވާލުތައް މަޖިލީހުގެ ތަޅުމުގައި އިއްވަވަމުން ބޮންޑޭވަނީ އެ ސުވާލުތައް ފޮނުއްވުނުތާ އަހަރަކަށް ވުރެ ގިނަ ދުވަސް ވެފައިވާކަން ތަކުރާރުކޮށް ފާހަގަކުރައްވާފައެވެ.
ބޮންޑޭގެ ދިހަ ސުވާލުގެ ޖަވާބު އިއްވަވައި ނިމުމުން އަސްލަމް ވަނީ، އެމަނިކުފާނު މަޖިލީހުގެ ރިޔާސަތާއި ހަވާލުވެވަޑައިގެންނެވި އިރު، ލިޔުމުން ޖަވާބު ހޯއްދެވުމަށް އެދި 50 ސުވާލު ފޮނުއްވާފައިވާ ކަމަށް ވިދާޅުވެފައެވެ.
އަދި ކުރިއަށް އޮތް ތަނުގައި ލިޔުމުން ހުށަހަޅާ ސުވާލުތަކުގެ ޖަވާބު ވީހާވެސް އަވަހަށް، މަޖިލީހުގެ ގަވާއިދު ބުނާ މުއްދަތުގެ ތެރޭގައި އެ ޖަވާބުތައް ލިބޭނެ އިންތިޒާމު ހަމަޖައްސާނެ ކަމަށްވެސް އަސްލަމް ވިދާޅުވި އެވެ.
"އަޅުގަނޑު ވެސް ގަބޫލުކުރަން މީގެ އެއް އަހަރު ކުރިން މެންބަރުން ފޮނުއްވި ސުވާލުތަކުގެ ޖަވާބު މަޖިލީހަށް ލިބި، އެހެންނަމަވެސް މަޖިލީހުގައި ޖަވާބުތައް އިއްވިފައި ނުވާކަން. ކުރިއަށް އޮތް ތަނުގައި އިރާދަކުރެއްވިޔާ މެންބަރުން ކުރައްވާ ސުވާލު ތަކުގެ ޖަވާބު، މަޖިލީހުގެ ގަވާއިދު ބަޔާންކުރާ މުއްދަތުގެ ތެރޭގައި މަޖިލީހުގެ އިތުރު ޖަލްސާ ބާއްވައިގެން ކަމަށް ވިޔަސް އެ ސުވާލުތަކުގެ ޖަވާބު ލިބޭނެ އިންތިޒާމު ހަމަޖައްސާނެ ވާހަކަ ދަންނަވަން."
މަޖިލީހުގެ ރައީސް މުހައްމަދު އަސްލަމް
ބޮންޑެ ކުރީގެ އިސްލާމިކް މިނިސްޓަރާއި ކުރެއްވި ސުވާލުތަކުގެ ތެރޭގައި، ޒަކާތު ފަންޑާއި، ހައްޖު ކޯޕަރޭޝަނުން ކުރި ހައްޖު ދަތުރާއި ކޮވިޑްގެ ތެރޭގައި ހިންގާފައި ހުރި ހަރަދުތަކާ ގުޅޭ ގޮތުން ކުރައްވާފައިވާ ސުވާލުތައް ހިމެނެއެވެ.
Advertisement
This content is created and paid for by advertisers and does not involve Voice Journalists
