މި މަހުގެ 20 ވަނަ ދުވަހު ހުޅުމާލެ ސެންޓްރަލް ޕާކް ކައިރީގައި ކާރަކާއި ތިން ސައިކަލެއް ޖެހި ހިނގި ނުރައްކާތެރި އެކްސިޑެންޓްގައި އަނިޔާވެ ހާލު ސީރިއަސްވި ދެމީހުންގެ ތެރެއިން އެކަކު މިއަދު ނިޔާވެއްޖެއެވެ.

ލިބުނު އަނިޔާތަކަށް ވެންޓިލޭޓަރުގައި ފަރުވާދެމުން ދަނިކޮށް ރޭ ދަންވަރު 2:06 ހާއިރު ނިޔާވީ 59 އަހަރުގެ އިސްމާޢީލް ވަޙީދެވެ. 

މި އެކްސިޑެންޓުގައި 4 މީހަކަށް އަނިޔާވެފައިވާއިރު ފިރިހެންމީހާގެ އިތުރުން އަނިޔާވި އަންހެން މީހާގެ ހާލުވެސް ސީރިއަސް ކަމަށް އޭޑީކޭ ހޮސްޕިޓަލުން ވަނީ މައުލޫމާތު ދީފައެވެ.

Advertisement

އަންހެންމީހާ އަދިވެސް އޮތީ އައިސީޔޫގައެވެ. އެހެންނަމަވެސް އޭނާގެ ހާލު މިހާރު ސްޓޭބަލް ވަމުން އަންނަ ކަމަށް އޭޑީކޭއިން ވަނީ ބުނެފައެވެ.

މި އެކްސިޑެންޓްގައި ކާރު ދުއްވަން އިން މީހާގެ ބަންދަށް 7 ދުވަސް ޖަހައި ޕޮލިހުން އަންނަނީ މައްސަލަ އިތުރަށް  ތަހުގީގުކުރަމުންނެވެ.

އިއްޔެ މެންދުރުވެސް ހުޅުމާލެ އަށް ހައިވޭއިން އަރާ ހިސާބުގައި ކާރަކާއި ދެ ސައިކަލު ޖެހި ނުރައްކާތެރި އެކްސިޑެންޓެއް ވަނީ ހިނގާފައެވެ.