ގެދޮރުވެރިންގެ ސްކީމްގެ ދަށުން 4،000 ފްލެޓް ދީފައިވަނީ ދޮގު މައުލޫމާތުތަކެއްގެ މައްޗަށް ބިނާކޮށްކަމަށް މަޖިލީހުގެ ހެންވޭރު ދެކުނު ދާއިރާގެ އެމްޑީޕީ މެމްބަރު ހުސެއިން ޝަހީމް (އަނދުން ހުސެއިން) ވިދާޅުވެއްޖެއެވެ.
ރައީސް ސޯލިހު ސަރުކާރުން ދިން ގޯތިތައް މި ސަރުކާރުން އަތުލަން އުޅޭ ކަމަށް ބުނެ މަޖިލީހަށް ހުށަހެޅި ގަރާރުގައި ބަހުސްގައި ކުރައްވަމުން އެމްޑީޕީގެ ދިފާއުގައި ވަކާލާތު ކުރެއްވުމުގެ ބަދަލުގައި ހުސެއިން ވިދާޅުވީ އެ ފްލެޓުތަކަށް ޕޮއިންޓް ދިން ގޮތް ރަނގަޅު ނޫން ކަމަށެވެ. އަދި ރައީސް އިބްރާހިމް މުހައްމަދު ސޯލިހު އެޅި 4،000 ފްލެޓް ދީފައި ހުރި ފަރާތްތަކުގެ ލިސްޓް ރިވިއުކުރުމަށްވެސް ވަނީ ގޮވާލައްވާފައެވެ.
"ކަނޑައެޅިގެން ސައްހަ ނޫން މައުލޫމާތު ލައިގެން ޕޮއިންޓް ދެވޭނެ ކަމަށް ކަނޑައެޅީ ފުރަތަމަ 4،000 ފްލެޓު ދެވޭނެ ކަމަށް އޮތް އޮތުން އަޅުގަނޑު ބަލައެއް ނުގަންނަން. އެއީ އަޅުގަނޑުމެންގެ ސަރުކާރުގެ ސްޓޭޓް މިނިސްޓަރަކު، ނޫނީ މިނިސްޓަރަކު ފްލެޓް ދެއްވި ނަމަވެސް. އަޅުގަނޑުގެ ދާއިރާގެ ޖެހިގެން ހުރި ގެއަށް ލިބިފަ އަނެއް ގެއަށް ނުލިބުނީމަ އަޅުގަނޑު ދެނެއް ނުޖެހޭ ޕޮއިންޓް ދިން ގޮތް ކިޔައިދޭކަށް."
ހުސައިން ވިދާޅުވިއެވެ.
މިކަމުންވެސް ސިފަވަނީ ހުރިހާ އެޕްލިކޭޝަންގައި މައުލޫމާތުގެ ތެދު ދޮގު ބަލާނެ ވަގުތެއް ނުލިބުނު ކަމަށްބުނެ ބަހަނާ ތަކެއް ދެއްކުން ކަމަށްވެސް އެބޭފުޅާ ވިދާޅުވިއެވެ.
ވެރިކަމުގެ ފަސް އަހަރު ނިންމިއިރު ސަރުކާރުގެ ވަޒީރުންނާއި ނައިބު ވަޒީރުންނަށް މިކަން އޮންނަން ޖެހޭނީ މީހަކު ޖަހާފަ ދިންހާ އެއްޗަކަށް ފްލެޓު ދޭނެ އުސޫލަކަށް ނޫންކަމަށާއި ރަނގަޅަށް ލިސްޓް ބަލާފިއްޔާ އެ ހައްގުވާ ގިނަ ބަޔަކު ހިމެނުމުގެ ފުރުސަތު އެބައޮތްކަމަށް ވެސް ހުސައިން ވިދާޅުވިއެވެ.
މި ފްލެޓްތައް ދޫކުރި ގޮތާއިމެދު ހިތްހަމަނުޖެހިގެން އާންމުން ވަނީ އެ މައްސަލަ އޭސީސީއަށް ވެސް ހުށައަޅާފައެވެ. ފްލެޓް ތައް ދޫކުރުމާއި ގުޅޭގޮތުން މި ސަރުކާރުގެ ހައުސިން މިނިސްޓަރ ވިދާޅުވީ ފްލެޓްތައް ބެހުމާއި މެދު އިތުރަށް ގޮތެއް ނިންމާނީ އޭސީސީއިން އެ މައްސަލަ ބަލައި ނިންމުމުންކަމަށެވެ.
Advertisement
This content is created and paid for by advertisers and does not involve Voice Journalists
