ވަރީގެ މައްސަލައެއްގައި ކޯޓަށް ދިޔަ އަންހެނަކަށް ފޯނުންގުޅި ގާޒީގެ މައްސަލަ ބަލާ ކޮމިޓީގެ ބައްދަލުވުމުން ސިއްރުކޮށްފިއެވެ.

މިމައްސަލައިގައި ޝާމިލްވާ ގާޒީއަކީ ހދ.ކުޅުދުއްފުށީ މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމްއެވެ.

އޭނާގެ މައްސަލަ ރައްޔިތުންގެ މަޖިލީހުން ބަލާ ޖުޑިޝިއަރީ ކޮމެޓީގެ މިއަދުގެ ބައްދަލުވުން ވަނީ ސިއްރުކޮށްފައެވެ.

Advertisement

މިމައްސަލައާއި ގުޅިގެން، މީގެ ކުރިން ހދ.ޖުޑީޝަލް ދާއިރާގެ އިސްމެޖިސްޓްރޭޓްގެ މަޤާމުގައި ހުންނެވި އަލީ އާދަމުގެ މަޤާމުގެ ދަރަޖަ ވަނީ ދަށްކޮށްފައެވެ.

ޖުޑީޝިއަލް ސާވިސް ކޮމިޝަނުން ވިދާޅުވީ، ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް ހުށަހެޅި ފަރާތަކަށް މެޖިސްޓްރޭޓް އަލީ އާދަމް ގުޅައި މެސެޖުކޮށް، ޝަރީއަތުގެ ބޭރުން އެކި ވާހަކަތައް ދައްކައި ހެދިކަން، ލިބިފައިވާ ހެކިތަކުންނާއި އޭނާގެ އިއުތިރާފުން ސާބިތުވާކަމާއި، އަދި އޭނާ ކޮށްފައިވާ މެސެޖުތައް ހުރި ގޮތަށް ބަލާއިރު، އޭނާ މަސައްކަތްކޮށްފައި ވަނީ ނުނިޔަތެއްގައި ނުބައި މަޤްސަދެއް އޮވެގެންކަން ވެސް ސާބިތުވެފައިވާ ކަމަށެވެ.

މިއަދު 10:00 ޖެހިއިރު، ފެށި އެ ކޮމެޓީއަށް އަލީ އާދަމް ވަނީ ހާޒިރުވެފައެވެ. މީގެ ކުރިން އެ ކޮމެޓީއަށް އޭނާ ހާޒިރުވެފައެއް ނުވެއެވެ. އެހެންވެ މިއަދަށް އެންމެ ފަހު ފުރުސަތު ދިންއިރު، އެ ކޮމެޓީ ފައްޓަވަމުން މުޤައްގަރިރު ވިދާޅުވީ، ކަމާއި ބެހޭ ފަރާތްތައް ގެނެސްގެން ސުވާލު ކުރާއިރު، ނަންތައް ކިޔަން ޖެހޭތީ، މެންބަރުން އިއުތިރާޒު ނުކުރާނަމަ ކޮމެޓީ ސިއްރު ކުރަން ބޭނުންވާ ކަަމަށެވެ. އަދި މެންބަރުންގެ ހުއްދައާއެކު އެ ޖަލްސާ ވަނީ ސިއްރު ކޮށްފައެވެ.