ރައްޔިތިންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ އަބްދުاللهގެ އިތުބާރުނެތް ކަމުގެ މައްސަލަ ތާވަލުކޮށްފިއެވެ.

އީވާގެ އިތުބާރު ނެތްކަމުގެ މައްސަލަ އެޖެންޑާކޮށްފައިވަނީ މިއަންނަ އާދީއްތަ ދުވަހު މަޖިލީހުގެ ޖަލްސާއަށެވެ.

އީވާގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނީ، 50 މެންބަރުންގެ ސޮޔާއިއެކީއެވެ. އީވާގެ އިތުބަރުނެތް ކަމުގެ މައްސަލަ ހުށައަޅައިފައިވަނީ އެމްޑީޕީއެގެ 49 މެންބަރުންނާއި މިނިވަން މެންބަރު ނޮޅިވަރަމް ދާއިރާގެ މުހައްމަދު ނަޝީދު (މޮސްޓާ)ގެ ސޮޔާއިއެކުއެވެ.

މަޖިލީހުގެ ނައިބު ރައީސް އީވާއަށް އިތުބާރު ނެތްކަމުގެ މައްސަލައިގެ ނޯޓިސް ފޮނުވާފައިވަނީ މި މަހު 20ވީ ހޯމަ ދުވަހުއެވެ.

އެހެންކަމުން މަޖިލީހު ޤަވާއިދުގައި ބުނާގޮތުން މި އަންނަ މަހުގެ 4ވަނަ ހޯމަ ދުވަހުގެ ނިޔަލަށް ވަގުތު ދިނުމަށްފަހު ބާއްވާ އެންމެ ފުރަތަމަ ބައްދަލުވުމުގައި އެ މައްސަލަ ކުރިޔަށް ދާނެއެވެ.

އެގޮތުން އިތުބާރު ނެތްކަމުގެ މައްސަލައާއި ގުޅިގެން އާދީއްތަ ދުވަހު އީވާ ޖަވާބުދާރީވުމުގެ ފުރުސަތު ދިނުމަށް މަޖިލީހުގެ އާނމު ކޮމިޓީއިންވަނީ ނިންމާފައެވެ.

އީވާގެ އިތުބާރު ނެތްކަމުގެ މައްސަލަ ނެގުމަށް މަސައްކަތް ކުރަމުންދަނީ އެމްޑީޕީއިންނެވެ. އެޕާޓީއިމް ބުނެފައިވަނީ، އީވާގެ އިތުބާރުނެތްކަމުގެ މައްސަލަ ނެގުމަށް މަސައްކަތް އަލުންފެށީ ރައީސް ނަޝީދު ރައްޔިތުންގެ މަޖިލީހުގެ ރިޔާސަތުން ދުރުކުރުމަށް އިތުބާރުނެތްކަމުގެ މައްސަލަ ނެގި އިރު އީވާގެ އަމަލުތައް ހުރިގޮތުން ކަމަށެވެ.

އީވާ މަޖިލީހަށް އިންތިޙާބުކުރެވުނީ އެންމެ ބޮޑު ޕާޓީ، އެމްޑީޕީގެ ޓިކެޓެއްގައެވެ. ނަމަވެސް އީވާ ވަނީ އެ ޕާޓީގެ ކެންޑިޑޭޓުންގެ އިގުރާރާ ހިލާފުވެފައި ކަމަށާއި އެހެންކަމުން މަޖިލީހުގެ މެޖޯރިޓީ އޮންނަ ޕާޓީ، އެމްޑީޕީއަށް އީވާގެ އިތުބާރު ނެތްކަމަށް އެ ޕާޓީއިން ހުށަހެޅި ގަރާރުގައި ބުނެފައިވެއެވެ.