"ގެދޮރުވެރިޔާ" ސްކީމްގެ ދަށުން ހުށަހަޅާފައިވާ ފޯމުތަކުގެ ސައްހަކަން ކަށަވަރު ކުރުމަށް ހައުސިން މިނިސްޓްރީގެ ފަރާތުން އެކްސަސް ލިބިފައި ނުވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.
ރައްޔިތުން މަޖިލީހުގެ މިނިވަން މުވައްސަސާތަކާއި ބެހޭ ކޮމީޓީގައި ވާހަކަ ދައްކަވަމުން އޭސީސީގެ ރައީސް އާދަމް ޝާމިލް ވިދާޅުވީ ފަންނީ ބައެއް ކަންކަން ޓެކްނިކަލީ ހަމަޖައްސަން ޖެހޭކަމަށް އޭސީސީއަށް މިނިސްޓްރީގެ ފަރާތުން މައުލޫމާތު ލިބިފައިވާކަމަށެވެ. އަދި ފްލެޓް އަށް އެދި ހުށައަޅާފައިވާ ފޯމްތަކުގެ ސައްހަކަން ކަށަވަރުކުރުމަށް ޕޯޓަލްއަށް ވަނުމަށް އެކްސަސް ދިނުމަށް ހައުސިން މިނިސްޓްރީގައި އެދިފައިވާނެ ކަމަށާއި ނަމަވެސް އަދި އެކްސަސް ނުލިބޭ ކަމަށެވެ.
"ލިޔެކިއުމަށް ފައިލްތަކާއި އެއްޗެހި އެބަ ލިބޭ މިނިސްޓްރީން. ނަމަވެސް ސިސްޓަމް އެންމެ މުހިންމީ. އަދި އޭސީސީއަކަށް އެކްސަސްއެއް ނުލިބެ ސިސްޓަމަކަށް."
ޝާމިލް ވިދާޅުވިއެވެ.
މި ބައްދަލުވުމުގައި އޭސީސީން ބުނީ ފްލެޓް ތަކުގެ މައްސަލައަކީ އެ އިދާރާއިން ވަރަށް ބޮޑު އިސްކަމެއް ދީގެން ބަލާ މައްސަލައެއް ކަަމަށާއި، އެކަމަށް ހާއްސަކޮށް އެކުލަވާލައިފައިވާ ޓީމުން ކެނޑިނޭޅި މަސައްކަތް ކުރަމުންދާ ކަމަށެވެ.
ޝާމިލް ވިދާޅުވީ އޭސީސީގައި ހުރި ކެޕޭސިޓީ ބޭނުންކޮށްގެން ވީ އެންމެ އަވަހަކަށް މައްސަލަ ނިންމުމަށް މަސައްކަތް ކުރަމުންދާކަމަށެވެ.
މިމައްސަލައާއި ބެހޭގޮތުން ވާހަކަފުޅު ދައްކަވަމުން އޭސީސީގެ ނައިބު ރައީސް އަބްދުއްސަލާމް ވެސް ވިދާޅުވީ މި މައްސަލައިގައި އެ ކޮމިޝަނުން ވަކި ޓީމެއް އެކުލަވާލައިގެން ކޮންމެ ދުވަހަކު ވެސް މައްސަލަ ބްރީފް ކުރަމުން ގެންދާ ކަމަށާއި މައްސަލަ އާއި މެދު ފާހަގަވާ ކަންތައްތައް ކޮންމެ ދުވަހަކު މެންބަރުންނަށް ހިއްސާ ކުރައްވާ ކަމަށެވެ.
އޭސީސީން މިފަދައިން ބުނެފައިވާއިރު ގައުމީ ތަރައްގީއާއި ތަރިކައިގެ ކޮމިޓީގައި ވާހަކަފުޅު ދައްކަވަމުން ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވެފައިވަނީ ފްލެޓްތަކުގެ ފޯމުތަކުގެ ސައްހަކަން ކަށަވަރު ކުރުމަށް އޭސީސީއަށް ފޯމުތަކުގެ މައުލޫމާތުގެ އެކްސަސް މިހާރު ދީފައިވާނެ ކަމަށެވެ.
Advertisement
This content is created and paid for by advertisers and does not involve Voice Journalists
