ކުޑަކުދިންނަށް ކުރާ ކުރާ އެކި ބާވަތުގެ އަނިޔާއާ ގުޅޭ ގިނަ މަައްސަލަތަކެއް މި ރިޕޯޓްކޮށްފައިވާ ކަމަށް އިޖުތިމާޢީ އަދި އާއިލީ ތަރައްގީއާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ. 

އެ ވުޒާރާގެ ތަފާސް ހިސާބުތަކުން ދައްކާ ގޮތުގައި މިދިޔަ އޮކްޓޫބަރު މަހު ޖުމްލަ 205 މައްސަލަ ވަނީ ހުށަހަޅާފައެވެ. އޭގެ ތެރެއިން 90 މައްސަލަ އަކީ ކުދަކުދިންނަށް ކުރެވޭ އެކި އަނިޔާތަކާއި ގުޅުން ހުރި މައްސަލަތަކެވެ. ވުމާއެކު މިދިޔަ މަހު އެ ވުޒާރާއަށް ހުށަހެޅުނު މައްސަލަތަކުގެ ތެރެއިން އެންމެ ގިނައީ ކުޑަކުދިންނަށް އަނިޔާކުރުމުގެ މައްސަލައެވެ. 

ކުޑަކުދިންގެ އަނިޔާގެ މައްސަލަތަކުގައި އޮކްޓޫބަރު މަހު އެންމެ ގިނައިން ހުސަހެޅިފައިވަނީ ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ މައްސަލައެވެ. އެ ގޮތުން އެ ބާވަތުގެ 25 މައްސަލަ މިދިޔަ މަހު ވަނީ ރިޕޯޓުކޮށްފައިވެއެވެ.

އޭގެ އިތުރުން ކުޑަކުދިނަށް ޖިސްމާނީ އަނިޔާ ކުރުމުގެ 19 މައްސަލަ، ކުޑަކުދިންނަށް ކުރާ ޖިންސީ އަނިޔާގެ 16 މައްސަލައާއި އިހުމާލުގެ 15 މައްސަލަ އޮކްޓޫބަރު މަހު ހުށަހަޅާފައިވެއެވެ.

އެހެންކުދިންގެ ފަރާތުން ގަނާލިބުމާއި ފުރައްސާރައިގެ ޝިކާރައަކަށް ވުމުގެ ފަސް މައްސަލަ އާއި ނަފްސާނީ އަނިޔާގެ ހަތަރު މައްސަލައާއި އެހެން ކުދިންގެ ފަރާތުން އިންޓަރނެޓް މެދުވެރިކޮށް ގަނާ ލިބުމުގެ ތިން މައްސަލައެއް ވެސް ހުށަހަޅާފައިވާ ކަމަށް އެ ވުޒާރާއިން މައުލޫމާތު ދެއްވައެވެ.

ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 36 މައްސަލަ މިދިޔަ މަހު ހުށަހަޅާފައިވާ ކަމަށްވެސް އެ ވުޒާރާއިން މައުލޫމާތު ދެއްވައެވެ.

އެފަދަ މައްސަލަތަކުގެ ތެރެއިން އެންމެ ގިނައިން ރިޕޯޓްކޮށްފައިވަނީ ނަފްސާނީ އަނިޔާ ކުރުން ނުވަތަ އަނގަ ބަހުން ކުރެވޭ އަނިޔާގެ މައްސަލައެވެ. އެ ބާވަތުގެ 16 މައްސަލަ ވަނީ ހުށަހަޅާފައެވެ.

އޭގެ އިތުރުން ޖިސްމާނީ އަނިޔާ ކުރުމުގެ 15 މައްސަލަ، ބިރުދެއްކުމުގެ ގޮތުން ކުރެވޭ ކަންކަމުގެ ތިން މައްސަލަ، ޖިންސީ ހާނިއްކަ ކުރުމުގެ އެއް މައްސަލަ އަދި ގަދަކަމުން ޖިންސީ ގޯނާ ކުރުމުގެ އެއް މައްސަލަ ހުށަހަޅާފައިވާ ކަމަށްވެސް ތަފާސްހިސާބުތަކުން ދައްކައެވެ.