އިޒްރާއިލްގެ ހައްދުފަހަނަ އެޅި ޔަހޫދީ ސިފައިން ފަލަސްޠީނުގެ ހުޅަނގުއައްސޭރިން ގިނަ ބަޔަކު ހައްޔަރުކޮށްފިއެވެ.

އަލްޖަޒީރާގައި ބުނެފައިވަނީ ރޭ އެކަނިވެސް އިޒްރާއިލުން ހުޅަނގު އައްސޭރީގައި ހިންގަމުންދާ މިލިޓަރީ ރެއިޑްތަކުގައި 45 އަކަށް ވުރެ ގިނަ މީހުން ހައްޔަރުކޮށްފައިވާ ކަމަށެވެ.

އޭގެތެރެއިން ގިނަ ބަޔަކު ހައްޔަރުކޮށްފައިވަނީ އަލް ޤުދުސް ގެ ކައިރީގައި އޮންނަ ބިއްދޫ އަވަށުން ކަމަށް އަލްޖަޒީރާގައި ބުނެފައިވެއެވެ.

އަލްޖަޒީރާގައި ބުނެފައިވަނީ އިޒްރާއިލުން ހައްޔަރުކުރި ކުރި މީހުންގެ ޢަދަދު އިތުުރުވެގެން ދާނެ ކަމަށް ލަފާކުރާ ކަމަށެވެ. ސަބަބަކީ ތުއްބަސް، އަރީހާ އަދި ބައިތް ލަޙަމްގައި އިޒްރާއިލްގެ މިލިޓަރީ ރެއިޑްތައް ކުރިއަށް ގެންދަމުންދާ ކަމަށެވެ.

އަދި އިޒްރާއިލްގެ މިލިޓަރީ ރެއިޑް ތަކުގެ މައިގަނޑު އަމާޒަކަށް ހަދައިފައިވަނީ ތުލްކަރަމް ކަމަށްވެސް އަލްޖަޒީރާގައި ބުނެފައިވެއެވެ.

ތުލްކަރަމްގައި އިޒްރާއިލް ސިފައިން ގިނަ އަދަދަށް ތިބިކަމަށާއި، އޭގެއިތުރުން ބަލައި ފާސްކުރާ ކުއްތާ ތައް އެސަރަހައްދުގެ އެއްގެއިން އަނެއް ގެއަށް ދާ މަންޒަރާއި، މުޅި ތުލްކަރަމްގެ މަތިން ޑްރޯންތައް އުދުހޭ މަންޒަރުތައް ފެންނަމުން ދާ ކަމަށް އަލްޖަޒީރާ އަށް ރިޕޯޓް ކޮށްފައިވާ އެމީޑިއާގެ ނޫސްވެރިޔާ ބުނެފައިވެއެވެ.

އަދި މަންޒަރުތަކުން ފެނިގެންދަނި އިއްޔެ ޖެނީންގައި އިޒްރާއިލް ސިފައިން ހިންގި ރެއިޑްގެ މަންޒަރުތައް ތަކުރާރުވާތަން ކަމަށްެވެސް އަލްޖަޒީރާގައި ބުނެފައިވެއެވެ.

7 އޮކްޓޫބަރުން ފެށިގެން ހުޅަނގުއައްސޭރިން މިހާތަނަށް 242 މީހަކު ވަނީ ޝަހީދުކޮށްލައިފައެވެ. އަދި އޭގެ ތެރޭގައި 50 ކުޑަކުއްޖަކުވެސްް ހިމެނެއެވެ. މީގެއިތުރުން 2750 މީހަކު ވަނީ ޒަޚަމްވެފައެވެ. އަލްޖަޒީރާގައި ބުނެފައިވަނީ އިއްޔެ އާއި ހަމައަށް 3325 މީހަކު ވަނީ ހައްޔަރުކޮށްފައެވެ.