މާލޭގެ ކޮންމެސް އެއް މިސްކިތެއްގައި އިނގިރޭސިބަހުން ޚުތުބާ ކިޔުމާއިމެދު ޢާއްމުންގެ ޚިޔާލަށް އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދު އެދިވަޑައިގެންފިއެވެ. 

ޑރ. ޝަހީމް ފޭސްބުކުގައި ކުރެއްވި ޕޯސްޓެއްގައި ވިދާޅުވީ، ރާއްޖެ އަކީ ވަރަށް ގިނަ ބިދޭސީން މަސައްކަތް ކުރާ ގައުމެއް ކަމަށެވެ. ޚާއްސަކޮށް މާލޭގައި ވަރަށް ގިނަ އަދަދަކަށް ބޭރުގެ މަސައްކަތްތެރިން އުޅެމުންދާ ކަމަށެވެ.

އެހެންކަމުން، މާލޭގެ ކޮންމެވެސް އެއް މިސްކިތެއްގައި އިނގިރޭސިބަހުން ޚުތުބާ ކިޔުމާއިމެދު ރައްޔިތުންގެ ޚިޔާލު ބަލާލަން ބޭނުންވާ ކަމަށް ވަޒީރު ވިދާޅުވި އެވެ. 

Advertisement

"މިހެން މި ދެންނެވީ މަސައްކަތުގެ ސުލޫކާއި، އަޚްލާޤު، އަދި ދީންވެރިކަން އިތުރުވުމުގައި އެމީހުން ދަންނަ ބަހުން އިއްވޭ ޚުތުބާގެ މުހިންމު ކަމަށް ފެންނާތީއެވެ." 

ޑރ. ޝަހީމް އިތުރަށް ވިދާޅުވީ، ފޭސްބުކުގެ އެ ޕޯސްޓަކީ އަދި ހަމައެކަނި އާއްމުންގެ ޚިޔާލު ހޯދާލުމަށް ކުރި ޕޯސްޓެއް ކަަމަށެވެ. 

ޑރ. ޝަހީމްގެ އެ ޕޯސްޓަށް ކޮމެންޓް ކުރި އެންމެންހެން ވަނީ އެއީ ވަރަށް ރަނގަޅު ޚިޔާލެއް ކަން ފާހަގަކޮށްފައެވެ. އަދި އެއް ބަޔަކު ވަނީ ރާއްޖޭގައި އެންމެ ގިނައިން ދިރިއުޅޭ ބޭރުގެ މީހުން ބަންގްލަދޭޝް އަށް ނިސްބަތްވާކަން ފާހަގަކޮށް އެ ބަހުން ޚުތުބާ ކިޔުމާއިމެދު ޚިޔާލުފާޅުކޮށްފައެވެ.