ކިޔެވުމާއި އެއްވަރަށް ކުޅިވަރުގައިވެސް ކުދިން ކުރިއަށް ގެންދިއުމަކީ މުހިންމުކަމެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙަންމަދު ވިދާޅުވެއްޖެއެވެ.

ހޮނިހިރު ދުވަހުގެ ހަވީރު ހެންވޭރު ފުޓްބޯޅަ ދަނޑުގައި ބޭއްވި ނެސްލޭ ކިޑްސް ނެޓްބޯލް ފެސްޓް 2023 ނިންމުމުގެ ރަސްމިއްޔާތުގައި ވާހަކަ ދައްކަވަމުން މެޑަމް ސާޖިދާ ވިދާޅުވީ، ކުދިންގެ ހެދިބޮޑުވުމަށް ކުޅިވަރަކީ ޖިސްމާނީ އަދި ނަފްސާނީ ދުޅަހެޔޮކަމަށް މުހިންމު ދައުރެއް އަދާކުރާ ކަމެއްކަމަށެވެ.

ކުޅިވަރު ކުޅުމަކީ ހަމައެކަނި ވަނަ ހޯދުމަށް ކުރާކަމެއްގެ ބަދަލުގައި، އެއީ އެކަމުން ހަށިގަނޑަށް ފައިދާ ކުރުވަނިމި ކަސްރަތެއް ލިބިދޭ ކަމެއްކަމުގައި ބަލައިގެން ކުރިއަށްދިއުމަށް އެކަމަނާވަނީ އެދިވަޑައިގަނެފައެވެ.

Advertisement

މިނިސްޓްރީ އޮފް އެޑިއުކޭޝަނާއި، މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންއާއި ގުޅިގެން ފިއޮންޓި ސްޕޯޓްސް އެކަޑަމީން އިންތިޒާމުކޮށްގެން ބޭއްވި މި ފިއެސްޓާ ކުރިއަށް ގެންގޮސްފައިވަނީ 2023 ނޮވެންބަރު 30އިން 2023 ޑިސެންބަރު 2އަށެވެ.

މާލޭގެ ސުކޫލުތަކަށް ހުޅުވާލައިގެން ކުރިއަށްގެންދިޔަ މި މުބާރާތުގައި އެކި ސްކޫލްތަކުން ޖުމްލަ 1000 އަށްވުރެ ގިނަ ކުދިން ވަނީ ބައިވެރިވެފައެވެ.

ރައީސްގެ އަނބިކަނބަލުން މެޑަމް ސާޖިދާ ވަނީ މި މުބާރާތުގެ ފައިނަލް މެޗްތައް ބައްލަވާލައްވައި، މުބާރާތުގެ ޗެމްޕިއަން ޓީމަށް މެޑަލްވެސް ހަވާލުކޮށްދެއްވާފައެވެ.