އައްޑޫ ސިޓީ ގްރޫޕު މާރާމާރީ އާއި ގުޅިގެން 4 މީހަކު ހައްޔަރުކޮށްފިއެވެ.

ދިވެހި ފުލުހުންގެ ހިދުމަތުން ބުނީ، އައްޑޫ ގްރޫޕް މާރާމާރީއާ ގުޅިގެން 4 މީހަކު ކޯޓު އަމުރެއްގެ ދަށުން ރޭގެ ވަގުތެއްގައި ހައްޔަރުކޮށްފައިވާ ކަމަށެވެ. އަދި ހައްޔަރު ކުރިީ އުމުރުން 18 އަހަރުގެ މީހަކާއި 19 އަހަރުގެ މީހަކާއި 20 އަހަރު އަދި 23 އަހަރުގެ މީހެއް ކަމަށް ވެސް ބުނެފައިވެއެވެ.

މިއާއެކު ފުލުހުން ބުނީ، އެ އެންމެންނަކީ ވެސް ދިވެހި ފިރިހެނުން ކަމަށެވެ.

އައްޑޫގައި ހުކުރު ދުވަހުގެ ރޭގައި ހިނގި ގުރޫޕް މާރާމާރީގައި 30 އަހަރުގެ ދިވެހި ފިރިހެނެއް ޒަޚަމް ކޮށްލާފައިވާއިރު އެ ޒުވާނާގެ ހާލު ސީރިއަސްކަމުގައި ހޮސްޕިޓަލާއި ހަވާލާދީ ފުލުހުން ބުނެއެވެ. 

އެނގިފައިވާ ގޮތުގައި ހިތަދޫގައި ރޭ ހިނގި މާރާމާރީގައި ދެ ގްރޫޕުގެ ދެމެދު ކުރިމަތިލުމެއް ހިނގި އިރު ދެ ގްރޫޕުން ވެސް ތިބީ ތޫނު ހަތިޔާރު ހިފައިގެންނެވެ.

އައްޑޫސިޓީގައި ހިންގި މާރާމާރީ އާ ގުޅިގެން އެސިޓީގެ ސަލާމަތާއި ރައްކާތެރިކަން ވަރުގަދަކުރުމަށް މާލެއިން ފުލުހުންގެ ޓީމްތަކެއް ފޮނުއްވުމުގެ މަސައްކަތް ކުރަމުންދާ ކަމަށް ރޭ ފުލުހުން ވަނީ ބުނެފަ އެވެ. 

އެގޮތުން ފުލުހުން ބުނީ، 2023 ނޮވެންބަރު މަހުގެ 29 ވަނަ ދުވަހުގެ ވަގުތެއްގައި މާލޭގައި ހިނގާދިޔަ މާރާމާރީއާއި، ޑިސެމްބަރުމަހުގެ 1 ވަނަ ދުވަހުގެރޭ އައްޑޫ ސިޓީގައި ހިނގާފައިވާ މާރާމާރީއާއި ގުޅިގެން މާލެއާއި އައްޑޫ ސިޓީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ހާއްސަ އޮޕަރޭޝަން ތަކެއް ހިންގުމަށް ނިންމާފައިވާ ކަމަށެވެ.

އެގޮތުން އައްޑޫސިޓީގެ ސަލާމަތާއި ރައްކާތެރިކަން ބެލެހެއްޓުމަށްޓަކައި މާލެއިން އިތުރު ޓީމުތަކެއް އެ ސިޓީއަށް ފޮނުވުމުގެ މަސައްކަތް ކުރަމުން އަންނަ ކަމަށް ފުލުހުން ވަނީ ބުނެފައެވެ.